Fréttablaðið - 25.06.2006, Blaðsíða 8
8 25. júní 2006 SUNNUDAGUR
Kynntu þér stóru, sterku og fallegu tjaldvagnana frá Camp-let, uppáhalds
ferðafélaga Íslendinga um áratuga skeið!
... og fríið verður frábært
með Camp-let
Kletthálsi 13 // s. 587 6644 // www.gisli.isUmboðsmaður á Akureyri: Bílasalinn.is // Hjalteyrargötu 2
Savanne er nýr og spennandi
kostur frá Camp-let
Áfast fortjald
Gott rými
Pottþéttur tjalddúkur
Áföst eldhúseiningLéttur en nýðsterkur
Hár tjaldvagn
á 13" dekkjum
FRAMVINDA BAUGSMÁLS FRÁ UPPHAFI
■ Snemma árs 2002
- Hreinn Loftsson varar stjórn Baugs við því að von gæti verið á aðgerðum samkeppnisyfirvalda gegn
félaginu eftir fund með Davíð Oddssyni, þáverandi forsætisráðherra.
■ 28.ágúst 2002
- Efnahagsbrotadeild ríkislögreglustjóra gerir húsleit í höfuðstöðvum Baugs Group við Súðarvog í
Reykjavík. Leitin á rætur að rekja til ásakana Jóns Geralds Sullenberger, forsvarsmanns Nordica, um
auðgunarbrot Tryggva Jónssonar og Jóns Ásgeirs Jónssonar. Rannsóknin beinist í upphafi að því að Jón
Ásgeir og Tryggvi, stjórnendur Baugs, hafi látið Baug greiða tilbúna og ranga reikninga vegna kaupa á
skemmtibátnum Thee Viking. Sakargiftir lúta einnig að því að gefinn hafi verið út tilhæfulaus reikningur
í nafni Nordica að undirlagi stjórnenda Baugs og hann síðan gjaldfærður hjá Baugi.
- Sama dag vinnur kaupsýslumaðurinn Philip Green að yfirtökutilboði í fataverslanakeðjuna Arcadia
ásamt Jóni Ásgeiri og Baugi.
■ 29.ágúst 2002
- Jón Ásgeir Jóhannesson, Tryggvi Jónsson og fleiri eru yfirheyrðir hjá efnahagsbrotadeild ríkislögreglu-
stjóra.
■ 6.september 2002
- Stjórn Arcadia ákveður að taka tilboði Green, án þátttöku Jóns Ásgeirs og Baugs, upp á rúmlega
hundrað milljarða króna. Arcadia vildi ekki halda áfram samningaviðræðum við Jón Ásgeir og Baug
vegna lögregluaðgerðanna í höfuðstöðvum fyrirtækisins.
■ 3. mars 2003
- Davíð Oddsson forsætisráðherra er gestur á Morgunvakt Ríkisútvarpsins. Þar segir hann að Hreinn
Loftsson hafi sagt við sig að Jón Ásgeir hefði nefnt það, að bjóða þyrfti Davíð þrjú hundruð milljónir
króna til þess að láta af andstöðu gagnvart fyrirtækinu. Jón Ásgeir vísaði því á bug. Hann segir í viðtali
við Morgunblaðið, að svo virtist sem Davíð hafi ekki vitað hvernig hann ætti að bregðast við þeim
upplýsingum sem fram komu í Fréttablaðinu nokkrum dögum fyrr, um að Davíð hefði rætt við Hrein
um Jón Gerald Sullenberger og Nordica.
■ 17.nóvember 2003
- Fulltrúar embættis skattrannsóknarstjóra ríkisins og lögreglunnar gera húsleit hjá Baugi Group og
Gaumi. Gögn er varða rekstur fyrirtækjanna á árunum 1998 til 2002 eru tekin.
■ 29. apríl 2004
- Lögreglan í Lúxemborg leggur hald á gögn um Baug og Gaum í Kaupthing Bank í Lúxemborg. Aðgerðin
er liður í rannsókn efnahagsbrotadeildar.
■ 7.janúar 2005
- Baugi Group er gert að greiða 465 milljónir króna við endurálagningu ríkisskattstjóra fyrir árin 1998
til 2002.
■ 1. júlí 2005
- Jón Ásgeir Jóhannesson, Jóhannes Jónsson, Kristín Jóhannesdóttir, Tryggvi Jónsson, fyrrverandi forstjóri
Baugs, og endurskoðendurnir Stefán Hilmarsson og Anna Þórðardóttir, eru ákærð í Baugsmálinu.
Tæplega þriggja ára rannsókn á Baugsmálinu er þar með lokið. Ákæran er í fjörutíu liðum.
■ 20. september 2005
- Stærstum hluta Baugsmálsins, eða 32 liðum af fjörutíu, er vísað frá í Héraðsdómi Reykjavíkur, vegna
ágalla á ákærum.
■ 24. september 2005
- Fréttablaðið flytur af því fréttir að Styrmir Gunnarsson, ritstjóri Morgunblaðsins, Kjartan Gunnarsson,
framkvæmdastjóri Sjálfstæðisflokksins og Jón Steinar Gunnlaugsson, núverandi Hæstaréttardómari, hafi
fundað um Baugsmálið mánuðum áður en ákært var í því. Styrmir Gunnarsson staðfestir í samtali við
Fréttablaðið að hann hafi talað um málið við Kjartan og Jón Steinar, með það fyrir augum að aðstoða
Jón Gerald Sullenberger. Styrmir staðfestir að hann hafi beðið blaðamann Morgunblaðsins, Ásgeir
Sverrisson núverandi ritstjóra Blaðsins, þýða texta fyrir Jón Gerald og biður Jónínu Benediktsdóttur í
tölvubréfi að „eyða fingraförum Morgunblaðsins af þessu skjali og senda það síðan til Jóns Geralds.“
■ 10. október 2005
- Hæstiréttur staðfestir frávísunarúrskurð héraðsdóms.
■ 11. október 2005
- Bogi Nílsson ríkissaksóknari tekur við málinu fyrir hönd ákæruvaldsins.
■ 14. október 2005
- Bogi Nílsson segir sig frá málinu vegna tengsla við starfsmenn KPMG endurskoðunar, er tengjast
endurskoðunarstarfi fyrir Baug. Í framhaldinu skipar Björn Bjarnason, dómsmálaráðherra, Sigurð Tómas
Magnússon saksóknara í Baugsmálinu.
■ 14. nóvember 2005
- Þinghald hefst vegna átta ákæruliða sem eftir standa í Baugsmálinu.
■ 17. nóvember 2005
- Jón H.B.Snorrason, saksóknari hjá efnahagsbrotadeild Ríkislögreglustjóra, segir sig frá þeim hluta
Baugsmálsins sem enn er fyrir dómi. Sigurður Tómas Magnússon flytur málið fyrir hönd ríkissaksókn-
ara.
■ 15. mars 2006
- Ákærðu í Baugsmálinu eru sýknaðir í héraðsdómi Reykjavíkur.
■ 17. mars 2006
- Bréf er sent úr dómsmálaráðuneytinu til bandarískra dómsmálayfirvalda þar sem óskað er eftir aðstoð
við yfirheyrslur á einstaklingum í Bandaríkjunum er tengjast Baugsmálinu. Verjendur sögðu Björn
Bjarnason, dómsmálaráðherra, vera með þessu að hafa bein áhrif á framgang málsins en því hefur
skrifstofustjórinn í ráðuneytinu, Stefán Eiríksson, neitað. Aðeins hefði verið um formlega beiðni að ræða
sem yrði að fara í gegnum ráðuneytið.
■ 4. apríl 2006
- Ákveðið er að endurákæra í 19 af 32 ákæruliðum sem áður var vísað frá í Baugsmálinu. Jón Ásgeir
Jóhannesson, Tryggvi Jónsson og Jón Gerald Sullenberger eru nú ákærðu í málinu.
■ 27. apríl 2006
- Baugsmálið vegna endurákæru þingfest í Héraðsdómi Reykjavíkur. Verjendur ákærðu krefjast
frávísunar á málinu.
■ 20. júní 2006
- Jón Ásgeir Jóhannesson, Kristín Jóhannesdóttir, Stefán Hilmarsson og Tryggvi Jónsson boðuð til
yfirheyrslu í nýju sakamáli.
■ 21. júní 2006
- Munnlegur málflutningur hefst vegna frávísunarkröfu ákærðu. Settur saksóknari krefst þess að málið
fái efnismeðferð en því mótmæla verjendur harðlega. Úrskurður Arngríms Ísberg, sem skipaður var
dómari í seinna málinu í stað Péturs Guðgeirssonar sem var dómari í fyrra málinu, liggur fyrir innan
þriggja vikna.
Nýtt Baugsmál virðist í upp-siglingu. Fjórir einstaklingar, Jón Ásgeir Jóhannesson,
forstjóri Baugs, Kristín Jóhannes-
dóttir systir Jóns Ásgeirs, Stefán
Hilmarsson endurskoðandi, og
Tryggvi Jónsson, fyrrverandi
forstjóri Baugs, hafa verið boðuð til
yfirheyrslu hjá ríkislögreglustjóra.
Öll tengjast þau fyrirtækjunum
Baugi, Gaumi ehf. og Fjárfari ehf.
Líklegt má telja að þetta marki
nýtt upphaf í málaferlum er tengjast
fyrirtækinu Baugi, en um hið
svonefnda Baugsmál hefur verið
rætt sem viðamesta og flóknasta
efnahagsbrotamál íslenskrar réttar-
sögu.
Segir málin ekki tengjast
Yfirheyrt verður í sumar vegna
meintra brota gegn skattalögum,
lögum um bókhald, lögum um árs-
reikninga og almennum hegningar-
lögum í tengslum við rekstur
félaganna Baugs Group hf.,
Fjárfestingafélagsins Gaums ehf.
og Fjárfars ehf. á árunum 1998 til
2002. Samtals nema brotin rúmlega
190 milljónum króna.
Að sögn Jóns H. Snorrasonar,
yfirmanns efnahagsbrotadeildar
ríkislögreglustjóra, tengjast brotin
sem yfirheyrt er vegna, ekki því
máli sem nú er til meðferðar í
Héraðsdómi Reykjavíkur. Ljóst er
þó að rannsóknin sem stuðst er við
vegna málsins sem settur saksókn-
ari, Sigurður Tómas Magnússon,
vonast til þess að geta tekið til
efnismeðferðar í héraðsdómi, er sú
sama og leiðir til yfirheyrslnanna
sem framundan eru í sumar.
Gestur Jónsson, lögmaður Jóns
Ásgeirs, hefur sagt það gagnrýnis-
vert að skjólstæðingur sinn skuli
kallaður til yfirheyrslu þegar verið
er að reka gegn honum mál fyrir
dómi en Jón H. Snorrason segir
ekkert vera athugavert við yfir-
heyrslurnar. „Lögum samkvæmt
ber að reka öll mál á hendur sama
sakborningi á sama tíma,“ sagði
Gestur fyrir dómi þegar hann gerði
grein fyrir því að Jón Ásgeir hefði
verið kallaður til yfirheyrslu.
Jón segir sakarefnin vegna yfir-
heyrslnanna í sumar ekki vera þau
sömu og í málinu sem nú er til
umfjöllunar. Málin séu því
eðlisólík.
Jón segir Jón Ásgeir hafa mátt
búast við því að vera kallaður til
yfirheyrslu. „Skattstjóri gerði Jóni
Ásgeiri það ljóst skömmu fyrir
áramótin 2004 til 2005 að meint brot
yrðu send til ríkislögreglustjóra,“
sagði Jón H. Snorrason í samtali við
Fréttablaðið á dögunum.
Málið fái efnislega meðferð
Sigurður Tómas hefur lagt á það
þunga áherslu að endurákæruefnin,
sem um er deilt fyrir dómstólum
nú, fái efnislega meðferð. Að auki
segir hann það nauðsynlegt fyrir
trúverðugleika íslenskra dómstóla
að þeir geti tekið á flóknum og viða-
miklum efnahagsbrotamálum efnis-
lega, sérstaklega þar sem „fyrir
kæmu efnaðir menn sem hefðu kost
á því að fá færa lögfræðinga til liðs
við sig,“ eins og Sigurður Tómas
komst að orði fyrir dómi.
Samtals nema upphæðirnar sem
ákært er vegna í málinu 358,6 millj-
ónum króna. Í fyrsta ákærulið máls-
ins, sem er næstum fjórar síður af
þeim tuttugu sem ákæran telur, er
Jóni Ásgeiri gefið að sök að hafa
beitt stjórn Baugs blekkingum í
auðgunarskyni með því að leyna því
að hann væri raunverulegur
seljandi hlutafjárins í Vöruveltunni,
áður rekstrarfélags verslananna
10-11, ásamt eignarhaldsfélaginu
Fjárfari sem hann var í forsvari
fyrir. Auk þess er Jón Ásgeir
sakaður um að „vekja hjá stjórn
Baugs hf. þá hugmynd að seljandi
hlutafjárins ásamt Fjárfari ehf.
væri Helga Gísladóttir,“ sem áður
var eigandi 10-11 ásamt manni
sínum. Samtals er tjónið og auðgunin
sögð í fyrsta lið endurákæru nema
um 200 milljónum króna.
Sigurður Tómas lagði á það
áherslu í málflutningi vegna
frávísunarkröfu ákærðu, að málið
ætti sér sjö mánaða aðdraganda og
því þyrfti að rekja málsatvik í
nákvæmnisatriðum í ákæru. Því
gæti ákæran virst flókin, en hjá því
væri einfaldlega ekki komist.
Endurákæra byggð á sömu gögn-
um og áður
Verjendur sakborninga hafa sagt
endurákæruna í málinu óskiljan-
lega. „Líklega hefur enginn maður
lesið endurákæruna í þessu máli
jafn oft og ég, en samt finnst mér
hún fullkomlega óskiljanleg,“ sagði
Gestur í upphafi máls þegar hann
rökstuddi þá skoðuna sína að vísa
þyrfti málinu frá í heild sinni. Ein
helsta röksemd verjenda fyrir frá-
vísun hefur verið sú að ákæruvaldið
hafi ekki sett fram ný gögn sem gefi
tilefni til þess að varpa skýrara ljósi
á meint brot sakborninga í málinu.
Þannig hafi dómarinn ekki neinn
annan kost en að vísa málinu frá,
líkt og hann gerði í fyrra málinu.
Settur saksóknari mótmælir
þessu og segir ákæruvaldið vera að
fara að kröfum Hæstaréttar með
því að laga annmarka á ákærunni
sem vísað var frá dómi 10.október.
Nú er þess beðið að Arngrímur
Ísberg, dómari í málinu sem endur-
ákæran byggir á, kveði upp úrskurð
um hvort málinu skuli vísað frá
dómi. Ef sú yrði niðurstaðan, er ljóst
að Baugsmálinu lýkur ekki þótt frá-
vísunin yrði staðfest í Hæstarétti.
Það heldur áfram.
magnush@frettabladid.is
Baugsmál - nýtt upphaf í sjónmáli
FJAÐRAFOK Í KRINGUM JÓN ÁSGEIR Baugsmálið hefur vakið mikla athygli bæði í innlendum og erlendum fjölmiðlum. Starfsemi Baugs
er að langstærstum hluta erlendis en um níutíu prósent af starfsemi félagsins er þar. Hér sjást fjölmiðlamenn sækja að Jóni Ásgeiri fyrir
framan Héraðsdóm Reykjavíkur. FRÉTTABLAÐIÐ/E.ÓL
Útlit er að fyrir að Baugsmálinu verði fram haldið, hvernig
sem niðurstaðan verður í dómsmálinu sem nú er til með-
ferðar fyrir dómstólum. Fjórir einstaklingar hafa verið
kallaðir til yfirheyrslu hjá ríkislögreglustjóra í nýju saka-
máli. Málflutningi vegna frávísunarkröfu ákærðu er lokið.