Fréttablaðið - 07.11.2007, Blaðsíða 21

Perla Rós Árnadóttir er fimm ára stelpa í Kópa-
voginum sem veit fátt skemmtilegra en að vera
í prinsessuleik en á þó ýmis önnur áhugamál,
enda snjöll stelpa hér á ferð.
„Mér finnst skemmtilegast að leika mér með dótið
mitt en uppáhaldsdótið mitt er hjólið. Mér finnst
gaman að fara í hjólatúr með mömmu og pabba en
annars geymum við bara hjólið úti í geymslu,“ segir
Perla Rós og þegar hún er spurð hvort hún sé ekki
alltaf með hjálm á hjólinu svarar hún játandi á inn-
soginu og bætir við alvarleg: „Maður er með hjálm
svo maður meiði sig ekki á höfðinu og svo að haus-
kúpan brotni ekki.“
Næst snýr Perla Rós sér að jólunum sem hún
hlakkar mikið til. „Á jólunum fær maður dót ef
maður þarf að fá dót og það er gaman að opna pakka,“
segir hún ánægð en þessi jólin langar hana helst að
fá dúkku með þrjá hunda. En hvað borðar Perla Rós
á jólunum? „Bara önd með brauði,“ segir hún.
Perla Rós er á leikskólanum Hvarfi og finnst henni
það vera góður leikskóli og unir sér þar vel. „Mér
finnst skemmtilegast að leika mér bæði úti og inni.
Ég og Birgitta og Eva María erum að fara í fótbolta í
dag,“ segir hún full tilhlökkunar og þrátt fyrir að
hafa gaman af að hamast í fótbolta og leika sér með
bíla er Perla Rós líka mikil dama og þegar spurt er
hvaða leikir henni finnist skemmtilegastir stendur
ekki á svarinu: „Mömmó og prinsessuleikur,“ segir
hún einlæg og bætir við: „Ég var einu sinni í prins-
essubol og á alls konar prinsessudót.“
Prinsessuáhuginn er augljóslega mikill þar sem
Perla Rós ætlar að verða Þyrnirós þegar hún verður
stór. En ætlar hún þá bara að sofa og sofa? „Þyrnirós
var ekki bara sofandi, hún svaf bara pínu og þegar
hún vaknaði fór hún að leika sér með dótið sitt,“
segir Perla Rós ákveðin. „Ef ég væri prinsessa þá
myndi ég vilja eiga heima í Vík í stóru húsi með
kertum og mamma og pabbi væru með mér þar,“
bætir hún við dreymandi en í Vík búa amma og afi
sem gaman er að heimsækja.
Perla Rós á tvö yngri systkini og er ábyrgðarfull
stóra systir. „Ég kenni litlu systur minni og ég sýni
henni hvernig maður á að hegða sér,“ útskýrir Perla
Rós en hún á líka lítinn bróður. „Litli bróðir minn er
góður en hann er alltaf við hliðina á mömmu og
pabba,“ segir hún og finnst hann greinilega þurfa
töluverða athygli þó að hún sé augljóslega stolt af
litla manninum. Með þeim orðum kveðjum við litlu
prinsessuna í Kópavogi sem trítlar spennt í leikskól-
ann á leið í fótbolta.
Ætlar að verða Þyrnirós