Fréttablaðið - 29.02.2008, Blaðsíða 22

22 29. febrúar 2008 FÖSTUDAGUR
taekni@frettabladid.is
Vefurinn: Vísindavefurinn
Starfsmenn Háskóla Íslands og aðrir vitrir
menn svara öllum mögulegum og ómögu-
legum spurningum notenda vefjarins.
www.visindavefur.is
Tölvusérfræðingarnir
Marcus J. Carey og Andy
Malone kenna Íslendingum
að verja tölvukerfin sín á
öryggisráðstefnu sem lýkur
í dag. Í byrjun ráðstefn-
unnar sýndi Marcus fram
á veikleika íslenskra tölvu-
kerfa með því að brjótast
inn í kerfi Reykjavíkur-
borgar og Skífunnar.
„Það hefur verið ákveðin sak-
leysisára í kringum Ísland, sem
er mjög ánægjulegt, en þið eruð
að færa ykkur inn á leikvöll stóru
strákanna með fjármálafyrirtæk-
in, bankana og fleiri fyrirtæki,“
segir Andy Malone, skoskur Mic-
rosoft-fyrirlesari og fram-
kvæmdastjóri tölvufyrirtækisins
Quality Training í Skotlandi.
„Fyrirtækin eru að fara inn á
alheimsvettvang, og þar er ýmiss
konar öryggisáhætta sem þau
verða að vera tilbúin að takast á
við.“
Andy er annar aðalfyrirlesari
öryggisráðstefnunnar Dive deep-
er sem lýkur í Smárabíói í dag.
Ráðstefnunni er meðal annars
ætlað að sýna íslenskum kerfis-
stjórum þær aðferðir sem tölvu-
þrjótar nota til að brjótast inn í
tölvukerfi, og hvernig hægt sé að
verjast þeim. Íslenska tölvu-
kennslufyrirtækið iSoft heldur
ráðstefnuna.
Hinn aðalfyrirlesarinn er Mar-
cus J. Carey, fyrrverandi dul-
málssérfræðingur hjá banda-
ríska sjóhernum. Hann hefur
einnig kennt liðsmönnum banda-
rísku alríkislögreglunnar, FBI,
um tölvuöryggi.
Á ráðstefnunni sýndi Marcus
hversu berskjölduð mörg tölvu-
kerfi eru í rauninni með því að
brjótast inn í þau á nokkrum mín-
útum uppi á sviði bíósalsins.
Meðal tölvukerfa sem fengu að
vera sýnidæmi voru kerfi Reykja-
víkurborgar og Skífunnar. Allt
var þetta þó gert undir eftirliti,
enda voru fulltrúar Ríkislög-
reglustjóra á staðnum til að læra
um tölvuöryggi.
„Við brutumst inn í kerfin til að
sýna hvernig það er gert, og
kenna fólki hvernig það getur
aukið öryggið í sínum tölvukerf-
um,“ segir Marcus. „Til að sýna
þeim hvernig hægt sé að nota
tólin sem tölvuþrjótarnir nota
gegn þeim.“
„Einu sinni var hinn dæmigerði
tölvuþrjótur unglingur að fikta í
kjallaraherberginu sínu, en núna
snýst þetta allt um að græða pen-
inga,“ segir hann. „Hvatinn er
fjárhagslegur; hvernig sé hægt
að nálgast viðkvæmar upplýsing-
ar fyrirtækja og fá fyrir þær
pening.“
Hann segir stærsta öryggis-
vandamálið hjá íslenskum fyrir-
tækjum, og fyrirtækjum um allan
heim, vera hversu lítið þau viti af
sjálfum vandanum. „Þau vita
ekki að þau eru berskjölduð, að
einhver geti ráðist á þau og stolið
frá þeim upplýsingum. Síðan
þegar það gerist vita þau ekki
hvað þau eiga að gera.“
salvar@frettabladid.is
Brutust inn í tölvukerfi fyrir
fullum sal gesta í Smárabíói
Framkvæmdastjórn Evrópusam-
bandsins hefur sektað bandaríska
tölvurisann Microsoft um sem
nemur 88,5 milljörðum króna.
Þetta er hæsta sekt sem hefur
nokkurn tímann fallið í máli af
þessari tegund.
Brot Microsoft fólst í því að
hlýða ekki refsingu fram-
kvæmdastjórnarinnar frá 2004,
þar sem fyrirtækið var sakfellt
fyrir að misnota markaðsráðandi
aðstöðu sína. Þá var Microsoft
skipað að veita samkeppnisaðil-
um aðgang að ákveðnum hluta
forritskóða Windows-stýrikerfis-
ins. Það gerði fyrirtækið ekki.
Við sektina bætast 49 milljarða
króna sekt síðan 2004 og 27,5
milljarða sekt frá 2006. Samtals
hefur Microsoft því greitt um 165
milljarða króna til Evrópusam-
bandsins í sektir. - sþs
Hlýddu ekki refsingu:
Microsoft fær
háa sekt frá ESB
„Það er bara gott að þetta sé búið, nú
getum við farið að einbeita okkur að Blu-
Ray,“ segir Gunnar Ingvarsson, vörustjóri hjá
BT. Þar á hann við stríðið sem háð hefur
verið milli háskerpustaðlanna Blu-Ray og
HD DVD undanfarin ár. Því lauk í síðustu
viku með uppgjöf Toshiba, sem stendur að
baki HD DVD. Blu-Ray vann.
„Við höfum alltaf hikað við að taka skref-
ið í aðra hvora áttina út af þessu stríði því
enginn vill sitja uppi með úreltar vörur. Það
sama gildir um neytendur, þeir hafa haldið
að sér höndum á meðan það var óvíst hvor
staðallinn yrði ofan á.“
Í grunninn eru HD DVD og Blu-Ray tvær
mismunandi en svipaðar leiðir til að sýna
myndefni í háskerpugæðum. Báðar nota
þær diska af sömu stærð og venjulegir
DVD-diskar sem settir eru í þar til gerðan
mynddiskaspilara. Munurinn felst í tækninni
sem er undir vélarhlífinni, sem gerir það að
verkum að Blu-Ray-diskar virka ekki í HD
DVD spilurum og öfugt.
Neytendur hafa því hingað til þurft að
fjárfesta í mynddiskaspilara vitandi það að
hann gæti orðið úreltur innan skamms.
Fyrir vikið hafa viðtökurnar við þessari nýju
tækni verið dræmari en menn áttu von á.
Nú, þegar enginn vafi leikur á hvaða tækni
verður til staðar í framtíðinni, er vonast til
að neytendur taki við sér.
„Sölulega er þetta mjög jákvætt, nú
þúrfum við ekki að vera með tvær útgáfur
af sömu myndunum,“ segir Gunnar. „Það
skipti í sjálfu sér engu máli hvor yrði ofan á
svo lengi sem annar hvor myndi vinna.“
Hann segir fáa háskerpuspilara hafa selst
hér heima af skiljanlegum ástæðum, allir
hafi verið
að bíða eftir
útkomunni.
„Nú þegar hún
er komin
þá byrjar
boltinn
að
rúlla.“
TÆKNISPJALL: GUNNAR INGVARSSON, VÖRUSTJÓRI HJÁ BT
Feginn að stríðinu er loksins lokið
Apple uppfærir fartölvurnar
sínar
Apple uppfærði MacBook og MacBook
Pro-fartölvurnar sínar á dögunum.
Báðar fengu þær hraðari örgjörva,
meira vinnsluminni og stærri harðan
disk. Dýrasta útgáfa MacBook Pro-
tölvunnar fékk þar að auki
skjákortsuppfærslu,
og státar nú af 512
megabæta GeForce
8600 GT skjákorti.
Fjölsnertimöguleikinn
sem hin fislétta MacBook Air kynnti til sögunnar
fyrr á árinu er nú einnig til staðar í MacBook og MacBook Pro-
tölvunum.
Unglingar hættir að kaupa tónlistardiska
Helmingur bandarískra unglinga keypti ekki einn einasta tónlistargeisladisk í
fyrra. Þetta er niðurstaða rannsóknar sem markaðsgreiningarfyrirtækið NPD
Group hefur gert. Þetta er töluverð aukning frá árinu 2006, þegar 38 prósent
unglinga keyptu engan geisladisk með tónlist. Stóraukin lögleg tónlistarsala í
gegnum netið gæti verið ein orsök þessarar þróunar, en iTunes-verslun Apple
varð í vikunni næstvinsælasta tónlistarverslun í Bandaríkjunum.
Fundu sjávarskrímsli á Svalbarða
Steingerðar leifar stærsta sjávarskrímslis heims hefur verið grafið upp á Sval-
barða. Um er að ræða fimmtán metra langa sjávarrisaeðlu sem hafði nægan
bitkraft til að bíta meðalfólksbíl í sundur. Það voru norskir vísindamenn sem
fundu hina 150 milljón ára gömlu steingervinga.
Pakistan: Við lokuðum ekki
YouTube
Yfirvöld í Pakistan harðneita því að
hafa borið ábyrgð á YouTube-bilun
sem varð í vikunni. Myndbandavef-
urinn vinsæli lá niðri um nokkurra
klukkustunda skeið um allan heim
rétt eftir að Pakistanar lokuðu á
aðgang að síðunni innan sinna landa-
mæra. Ástæðan fyrir lokuninni var myndband sem hýst var á YouTube, þar sem
meint guðlast fór fram.
SÉRFRÆÐINGAR Andy Malone og Marcus J. Carey tóku stjórnendur tölvudeilda
íslenskra fyrirtækja í kennslustund í Smárabíói í gær og í dag. FRÉTTABLAÐIÐ/STEFÁN
MICROSOFT Þarf að opna veskið vegna
brota á evrópskum samkeppnislögum.
TÆKNIHEIMURINN