Fréttablaðið - 01.03.2008, Blaðsíða 67
LAUGARDAGUR 1. mars 2008 43
A
nders Graff hefur
verið edrú í rúm
þrjú ár, eða réttara
sagt 9. febrúar síð-
astliðinn voru þrjú
ár síðan hann varð
edrú. Hann hefur búið sér gott og
edrú líf á Íslandi og er nýkominn
úr leyfi í Svíþjóð þar sem hann hélt
upp á þriggja ára afmælið, edrú í
þrjú ár! Anders fór meðal annars á
AA-fund í heimaborginni sinni,
Landskrona, til að halda upp á
afmælið.
Lovísa Christiansen, forstöðu-
kona í Krýsuvík, tók á móti Anders
í Krýsuvík fyrir þremur árum og
hugsaði með sér þegar hún sá hann
fyrst að nú væru Svíarnir farnir að
senda þangað fólk til að deyja.
„Hann var svo illa farinn þegar
hann kom hingað að hann gat ekki
gengið en hann er þvílíkt krafta-
verk í dag,“ segir hún.
Engin tré
Anders lýsir því þegar hann kom
fyrst til Íslands. Hann kom hingað
í hálfgerðum hríðarbyl og leist
ekkert á umhverfið, vildi helst
bara fara heim aftur. „Þegar ég
vaknaði morguninn eftir var snjór-
inn farinn og þegar ég leit út um
gluggann minnti landslagið á tungl-
ið, engin tré að sjá neins staðar,
engir fuglar, ekkert líf. Það var
hræðilegt. Ég hugsaði bara með
mér, hvað í fjandanum er ég að
gera hérna?“
Anders þekkti ekki til AA-sam-
takanna á þessum tíma en í Krýsu-
vík kynntist hann tólf sporunum og
AA. Hann byggði smám saman upp
krafta til að taka þátt í daglegu lífi,
sinna verkefnum og fara út að
ganga. „Ég fór ekki út úr skólanum
í mánuð. Ég gat ekki gengið óstudd-
ur og vildi ekki fara út en svo kom
að því að ég varð uppiskroppa með
afsakanir. Þau tóku undir hendurn-
ar á mér og við fórum í göngutúr í
40-50 mínútur sem venjulega hefði
tekið fimm mínútur. Eftir einn og
hálfan mánuð fór ég að fá ýmis
verkefni og smám saman komst ég
til lífsins aftur.“
Anders ákvað að búa á Íslandi
þar til hann væri kominn vel á fæt-
urna í sinni edrúmennsku. Það
hefur gengið vel. Hann hefur tekið
ökuprófið aftur, fengið sér íbúð og
vinnu. Hann byrjaði fyrst að vinna
við uppvask á Hótel Reykjavík
Centrum árið 2005 og vann þar í
nokkra mánuði og hefur svo fikrað
sig áfram í starfi. Hann hefur nú
starfað við byggingavinnu og sem
rafvirki um nokkurt skeið.
Síðasti Svíinn
Anders segist eiga Krýsuvík og
Íslandi líf sitt að þakka. Hann segir
að viðhorfin gagnvart alkóhólist-
um séu allt önnur hér en í Svíþjóð
og miklu jákvæðari. Íslenskir
atvinnurekendur taki því með
jákvæðum hætti þegar hann segi
sögu sína, komi til móts við sig og
hvetji sig áfram. Einn vinnuveit-
andi kalli sig „my hero“. Viðhorfin
í Svíþjóð séu hins vegar: „Hvern
fjandann ert þú að gera hér?“ Svíar
geti lært af Íslendingum að hafa
jákvæð viðhorf.
Anders er síðasti Svíinn sem hefur
komið í meðferð í Krýsuvík. Með-
ferðarheimilið tók á móti fjölmörg-
um Svíum fyrir nokkrum árum en
eftirspurnin var svo sveiflukennd
og Lovísa segir að sér hafi þótt svo
miður að geta ekki nýtt auð pláss
til að taka Íslendinga í meðferð að
ákveðið hafi verið að hætta að taka
á móti Svíum þegar fjármögnun
hafi fengist í staðinn. Hún finni
hins vegar fyrir vaxandi eftirspurn
frá Svíþjóð núna.
Í Stokkhólmi er starfandi AA-
hópur, fyrrverandi skjólstæðingar
Krýsuvíkur, sem hittast einu sinni í
viku. Þeir, sem lengst hafa verið
edrú, hafa verið það í sjö ár.
Kraftaverk úr Krýsuvík
SÍÐASTI SVÍINN Anders Graff var síðasti Svíinn sem hefur komið í meðferð í Krýsuvík. Hann kom hingað til lands fyrir þremur
árum illa farinn af drykkjuskap en hefur haldið sér edrú og náð að fóta sig og byggja upp gott líf á Íslandi. Hann er rafvirki að
mennt og starfar sem slíkur hér á landi. FRÉTTABLAÐIÐ/VILHELM
Anders Graff var við dauðans dyr þegar hann
kom til Íslands fyrir þremur árum svo illa farinn
af drykkju að hann gat varla gengið, líkaminn al-
veg búinn. Anders segist eiga Krýsuvík og Íslandi
líf sitt að þakka. Hann starfar nú sem rafvirki í
Reykjavík. Guðrún Helga Sigurðardóttir spjallaði
við hann.