Fréttablaðið - 03.03.2008, Blaðsíða 56
24 3. mars 2008 MÁNUDAGUR
sport@frettabladid.is
Ragnar Óskarsson verður ekkert meira með liði sínu,
USAM Nimes, á þessu tímabili í frönsku úrvalsdeildinni í
handbolta eftir að hafa orðið fyrir meiðslum.
„Ég fékk slæmt högg á hnéð í leik í desember og í
samráði við sjúkraþjálfara liðsins var sú ákvörðun tekin að
ég myndi hvíla í sex vikur og reyna að jafna mig á þessu
og jafnframt styrkja mig í hnénu. Ég var svo kominn
á fullt aftur og var að vonast til þess að vera laus við
meiðslin þegar þau tóku sig upp aftur um síðustu helgi
í sigurleik gegn Sélestat,“ sagði Ragnar, sem ætlar að
fara í aðgerð.
„Þetta fór eiginlega á versta veg þar sem hnéð
heldur ekki lengur. Krossbandið er ekki slitið en
það hefur orðið fyrir nógu miklu hnjaski til þess
að það gerir ekki lengur sitt gagn. Ég er búinn
að velta því mikið fyrir mér hvað ég eigi að gera í
stöðunni og hef komist að þeirri niðurstöðu að það
sé best fyrir mig að fara í aðgerð og ég mun fara í
hana á næstu dögum. Með aðgerðinni get ég verið
viss um að þetta verði lagað almennilega, í stað þess að vera
alltaf að vona að hnéð haldi og svo framvegis,“ sagði Ragnar,
sem hefur áður lent í svipuðum meiðslum.
„Það er auðvitað mjög leiðinlegt að lenda í þessu. Ég
sleit krossbandið í sama hné fyrir sex árum þannig að ég
veit hvernig þetta ferli virkar og veit hvað maður þarf að
gera, sem hjálpar mér örugglega. Það eru að minnsta kosti
sex mánuðir sem krossbandið þarf til þess að jafna sig
eftir aðgerðina og það er í raun engin töfralausn til í þessu
dæmi,“ sagði Ragnar, sem lætur mótlætið ekki á sig fá.
„Ég ætla bara að nálgast þetta á jákvæðum nótum
og nota tímann vel til að vinna í sjálfum mér bæði
líkamlega og andlega og gera mig kláran fyrir næsta
tímabil. Ég kem bara jafn sterkur eða
enn sterkari til baka eftir meiðslin en ég
á enn tvö ár eftir af samningi mínum
við USAM Nimes og ætla mér að klára
síðustu árin í boltanum á fullu,“ sagði
Ragnar ákveðinn.
HANDBOLTAKAPPINN RAGNAR ÓSKARSSON: FER Í AÐGERÐ Á HNÉ OG VERÐUR FRÁ Í MINNST SEX MÁNUÐI
Ætla mér að koma sterkari til baka eftir meiðslin
KÖRFUBOLTI Helena Sverrisdóttir
hélt uppteknum hætti og lék vel
með liði sínu TCU í 87-57
sigurleik gegn UNLV í bandaríska
háskólaboltanum í fyrrinótt.
Helena skoraði 15 stig og hitti
úr fimm af sjö skotum sínum
undir körfunni og hitti úr fimm af
sex vítaskotum og var stigahæst
leikmanna TCU. Enn fremur tók
Helena flest fráköst leikmanna
TCU, eða sex, og átti þrjár
stoðsendingar á þeim 25 mínútum
sem hún spilaði. - óþ
Háskólakörfuboltinn í USA:
Helena stiga-
hæst í sigri
STÖÐUG Helena hefur jafnan verið með
betri leikmönnum TCU í vetur.
TCU/KEITH ROBINSON
FÓTBOLTI Eggert Gunnþór Jónsson,
19 ára, hefur vakið mikla athygli
fyrir frammistöðu sína með
Hearts í skosku úrvalsdeildinni í
fótbolta í vetur en í nýlegu viðtali
hans við Edinburgh Evening
News kvaðst hann einbeittur að
ná betri árangri með liðinu.
„Þetta hefur verið frábært
tímabil á persónulegum nótum, að
fá loks tækifæri í byrjunarliðinu,
en ég er enn að læra og þarf að
leggja mikið á mig til þess að
þróa leik minn áfram. Liðinu er
því miður ekki búið að ganga sem
best miðað við væntingar en það
eru þó ákveðin batamerki á leik
okkar eftir að Stephen Frail tók
við starfi knattspyrnustjóra,“
sagði Eggert Gunnþór en Hearts
er sem stendur í sjöunda sæti
deildarinnar eftir 0-3 sigur gegn
Inverness í fyrradag. - óþ
Eggert Gunnþór Jónsson:
Batamerki eftir
að Frail tók við
> Aðstoðarþjálfari brátt tilkynntur
Guðmundur Guðmundsson, nýráðinn landsliðsþjálfari,
vinnur nú hörðum höndum ásamt HSÍ að því að finna
sér aðstoðarmann og nú mun leitin vera langt komin. „Ég
reikna með því að leitinni ljúki brátt og málið er í fullri
vinnslu. Þetta gæti legið ljóst fyrir á þriðjudag eða mið-
vikudag og kannski fyrr,“ sagði Guðmundur í samtali við
Fréttablaðið í gær. Hann vildi þó vitanlega ekki
tjá sig um hver eða hverjir væru í sigtinu fyrr
en málið væri frá-
gengið en Óskar
Bjarni Óskarsson,
þjálfari nýkrýndra
bikarmeistara Vals,
hefur sterklega verið orðaður við
stöðuna undanfarið.
FÓTBOLTI Ívar Ingimarsson var í
byrjunarliði Reading á ný á
laugardag þegar liðið náði mikil-
vægum sigri gegn Middlesbrough
með marki James Harper á loka-
sekúndunum á Riverside-leik-
vanginum. Brynjar Björn Gunnars-
son var ekki í liði Reading vegna
þrálátra meiðsla í nára sem hafa
haldið honum lengi frá keppni.
Ívar, sem bar fyrirliðabandið að
nýju í leiknum, var afar sáttur í
viðtali sem birtist á heimasíðu Sky
Sports í gær.
„Þetta er vonandi vendipunktur
hjá okkur á tímabilinu,“ sagði Ívar
en Reading hafði tapað átta leikj-
um í röð í ensku úrvalsdeildinni
þar á undan og hafði ekki unnið
leik síðan liðið lagði Sunderland
að velli á Madejski-leikvanginum
22. desember síðastliðinn.
„Þegar átta leikir tapast í röð
hefur það augljóslega áhrif á
sjálfstraustið og ég er afar stoltur
og ánægður með að við höfum nú
náð að enda það slæma gengi,“
sagði Ívar, sem er bjartsýnn á
framhaldið.
„Vonandi getum við byggt ofan
á þennan leik og fengið fullt sjálfs-
traust fyrir næsta leik í deildinni,
gegn Manchester City. Allir lögðu
sitt af mörkum gegn Middles-
brough og þannig þarf það að vera
út leiktímabilið,“ sagði Ívar.
Reading er sem stendur í fallsæti
en með jafn mörg stig og Íslend-
ingaliðið Bolton, þar sem Grétar
Rafn Steinsson og Heiðar Helgu-
son leika, sem er í sautjánda sæti.
„Þetta er erfið staða sem við
erum komnir í og við gerum okkur
alveg fyllilega grein fyrir því.
Leikmenn Reading lögðu gríðar-
lega mikla vinnu á sig á sínum
tíma til þess að geta loks spilað í
bestu deild í heiminum, ensku
úrvalsdeildinni, og við þurfum
klárlega að leggja allt í sölurnar
til þess að hanga uppi í ár,“ sagði
Ívar raunsær í viðtali við Sky
Sports í gær. - óþ
Íslendingaliðið Reading náði loksins að vinna leik í ensku úrvalsdeildinni í fyrradag eftir átta tapleiki í röð:
Vonandi vendipunktur á tímabilinu
FYRIRLIÐINN Ívar Ingimars-
son fór fyrir sínum mönnum
á Riverside-leikvanginum í
fyrradag og kvaðst bjartsýnn
á framhaldið í viðtali við Sky
Sports. NORDIC PHOTOS/GETTY
HANDBOLTI Nokkrir Íslendingar
voru í eldlínunni þegar leikið var í
Meistaradeild Evrópu í handbolta
í gær. Snorri Steinn Guðjónsson
og Ásgeir Örn Hallgrímsson léku í
sigurleik GOG Svendborg gegn
Pick Szeged og Alfreð Gíslason og
lærisveinar hans Guðjón Valur
Sigurðsson og Sverre Andreas
Jakobsson gerðu góða ferð til
Slóveníu og sigruðu þar RK Gor-
enje Velenje. Róbert Gunnarsson
var hvíldur vegna veikinda.
Snorri Steinn, Ásgeir Örn og
félagar þeirra í GOG Svendborg
eru í fínni stöðu í 4. riðli Meistara-
deildar Evrópu eftir 28-25 heima-
sigur danska liðsins gegn ung-
verska liðinu Pick Szeged í gær.
Snorri Steinn Guðjónsson var
ágætlega sáttur þegar Fréttablað-
ið náði tali af honum í gærkvöldi.
„Þetta var ágætur sigur en það
þurfti svo sem ekki frábæra spila-
mennsku af okkar hálfu til þess að
innbyrða sigur í leiknum. Við
vorum þremur mörkum undir í
hálfleik og náðum að bæta leik
okkar nógu mikið í síðari hálfleik
til þess að vinna leikinn,“ sagði
Snorri Steinn, sem skoraði fjögur
mörk í leiknum. GOG Svendborg
er í öðru sæti riðilsins á eftir stór-
liði Barcelona en bæði lið eru með
sex stig á meðan Pick Szeged og
slóvenska liðið Celje Lasko eru
jöfn í 3.-4. sæti með tvö stig hvort
þegar tveir leikir eru eftir í riðlin-
um. GOG Svendborg mætir
Barcelona í úrslitaleik um topp-
sæti riðilsins og Snorri Steinn er
spenntur yfir því.
Úrslitaleikur gegn Barcelona
„Það er gaman að fá svona stóran
leik og við mætum bara fullir
sjálfstrausts til Barcelona um
næstu helgi eftir að hafa unnið
fyrri leik liðanna í Danmörku. Við
stefndum að því að vera í barátt-
unni við Barcelona um toppsætið
og það er bara mjög jákvætt að
það sé niðurstaðan þó svo að
Barcelona sé vissulega sigur-
stranglegra,“ sagði Snorri Steinn.
Gummersbach eygir von
Íslendingaliðið Gummersbach er
nú komið upp að hlið Montpellier í
2. riðli Meistaradeildarinnar eftir
21-29 sigur liðsins gegn slóvenska
liðinu RK Gorenje Velenje í gær.
Gummersbach og Montpellier eru
með fjögur stig þegar tveir leikir
eru eftir en Ciudad Real, lið Ólafs
Stefánssonar, er á toppi riðilsins
með sex stig.
Alfreð Gíslason var afar sáttur
með leik sinna manna í gær.
„Þetta var virkilega góður leik-
ur hjá okkur og ég var sérstaklega
ánægður með vörnina þar sem
Sverre Andreas átti góðan leik.
Guðjón Valur var með fimm mörk
og stóð sig einnig vel en Róbert
var veikur og ég ákvað að hvíla
hann fyrir leikinn gegn Montpelli-
er á miðvikudag, sem er úrslita-
leikur fyrir okkur. Það væri gaman
að geta átt tölfræðilega möguleika
á efsta sætinu í lokaleiknum gegn
Ciudad Real,“ sagði Alfreð í við-
tali við Fréttablaðið í gærkvöldi.
omar@frettabladid.is
Íslendingar á flugi í Meistaradeildinni
Íslendingaliðin GOG Svendborg frá Danmörku og Gummersbach frá Þýskalandi unnu sína leiki í Meistara-
deild Evrópu í handbolta í gær. Bæði lið standa vel að vígi fyrir síðustu tvær umferðir riðlakeppninnar.
GUMMERSBACH Á ENN VON
Alfreð Gíslason og lærisveinar hans eiga
enn von í Meistaradeild Evrópu eftir
sigurinn í gær. NORDIC PHOTOS/GETTY
EKKERT GEFIÐ EFTIR Landsliðsmaðurinn Ásgeir Örn Hallgrímsson stendur hér í ströngu í baráttunni með GOG Svendborg í leik í
Meistaradeild Evrópu. NORDIC PHOTOS/GETTY