Fréttablaðið - 30.04.2008, Blaðsíða 8
8 30. apríl 2008 MIÐVIKUDAGUR
STJÓRNMÁL Sú skoðun Jóns Sig-
urðssonar, fyrrverandi formanns
Framsóknarflokksins, að Ísland
eigi að sækja um aðild að Evrópu-
sambandinu gengur lengra en
ályktun flokksþings Framsóknar á
síðasta ári. Hún gengur líka lengra
en fyrri yfirlýsingar Jóns um Evr-
ópumál.
Í grein í Morgunblaðinu í gær
sagði Jón að Íslendingar eigi ekki
að bíða lengur með framtíðará-
kvarðanir um aðildarumsókn að
Evrópusambandinu; tími umsókn-
ar sé kominn.
Formaður og varaformaður
Framsóknarflokksins eru ósam-
mála um raunhæfi þessarar skoð-
unar Jóns og samtöl við flokks-
menn leiddu í ljós skiptar skoðanir
um ágæti þess að greinin birtist.
Töldu sumir hana geta skaðað
flokkinn en aðrir sögðu hana
heppilega til að draga fram ólíkar
áherslur manna.
Guðni Ágústsson, formaður
Framsóknarflokksins, hefur farið
fyrir andstæðingum aðildar.
Hann segir að eins og nú hátti til
sé ekki hægt að kljást við við-
fangsefnið sem Jón setji fram í
grein sinni, það er aðildarum-
sókn, því stjórnmálaumræðan
hafi ekki snúist um það grund-
vallaratriði sem breyting stjórn-
arskrárinnar er. „Stjórnarskráin
er algjörlega vanbúin undir málið
og Samfylkingin og þeir stjórn-
málamenn sem mest tala um Evr-
ópusambandið hafa ekki krafist
þess í ríksstjórnarsamstarfinu að
henni verði breytt,“ segir Guðni.
Valgerður Sverrisdóttir vara-
formaður segir hins vegar grein
Jóns athyglisverða og „orð í tíma
töluð“. Aðspurð segist hún sam-
mála hverju orði sem í henni
standi.
Guðni telur skoðun Jóns nú í
ósamræmi við fyrri skoðanir
hans. „Jón Sigurðsson kenndi
mér þá mikilvægu lexíu að við
myndum aldrei sækja um aðild í
veikleika heldur, ef við ætluðum
það einhvern tíma í framtíðinni,
myndum við gera það í styrk-
leika.“ Spurður hvort grein Jóns
muni hafa áhrif á aðildarumræð-
una innan flokksins segist Guðni
enga skoðun hafa á því. Valgerð-
ur er á hinn bóginn þeirrar skoð-
unar. „Já, auðvitað mun hún hafa
áhrif. Allir í flokknum meta Jón
mjög mikils og auðvitað hefur
hann yfirburða þekkingu á þess-
um málum.“ Valgerður telur
skoðun Jóns í samræmi við stefnu
flokksins; þar sé öllu haldið
opnu.
Siv Friðleifsdóttir þingflokks-
formaður segir Jón endurspegla
viðhorf hluta flokksmanna.
„Innan Framsóknarflokksins eru
öfl sem vilja ganga í Evrópusam-
bandið, öfl sem vilja bíða og sjá
og öfl sem vilja ekki í ESB undir
neinum kringumstæðum. Ég vil
fara eftir stefnu flokksins sem er
að undirbúa okkur og hvorki loka
dyrum né sækja um strax.“ Fyrst
af öllu þurfi að breyta stjórnar-
skránni og aðlaga hana nýjum
veruleika í alþjóðasamstarfi. Siv
segir grein Jóns mjög afgerandi
og því kunni hún að hafa einhver
áhrif á umræðuna innan flokks-
ins. Málið verði eflaust rætt á
næsta flokksþingi og ekki sé úti-
lokað að einhverjar áherslubreyt-
ingar verði. bjorn@frettabladid.is
Birkir Jón Jónsson þingmað-
ur segir grein Jóns endur-
spegla mikla umræðu um
Evrópusambandið í þjóðfé-
laginu. Umræðan sé
skiljanleg í ljósi efnahags-
ástandsins nú. „Þetta er
væntanlega lausn Jóns á því
úrlausnarefni,“ segir Birkir.
Hann segir alla upplýsta
umræðu um Evrópusam-
bandið góða enda leggi
menn enn þá mismunandi skilning í sum
hugtök.
Það er mat Birkis að almennt sé fólk óráðið
en meirihluti þjóðarinnar vilji skoða málin og
ræða án þess að gefa sér niðurstöðuna
fyrirfram. „Framsóknarflokkurinn hefur haft
forystu í Evrópuumræðunni og það er
mikilvægt að hann haldi því forystuhlutverki
sínu,“ segir Birkir.
Umræðan góð
BIRKIR JÓN
JÓNSSON
Titringur í Framsókn
Framsóknarmenn greinir á um ágæti þeirrar skoðunar fyrrverandi formanns
þeirra að Ísland eigi að sækja um aðild að Evrópusambandinu. Sú skoðun geng-
ur nokkuð lengra en stefna flokksins. Skjálftavirkni mældist í Framsókn í gær.
FORYSTA FRAMSÓKNAR Siv Friðleifsdóttir þingflokksformaður, Guðni Ágústsson formaður og Valgerður Sverrisdóttir varaformaður.
FRÉTTABLAÐIÐ/VILHELM
Höskuldur Þórhallsson
þingmaður segir grein Jóns
um margt ágæta. „Hún er
liður í upplýstri umræðu, og
það er jú stefna flokksins að
spurningunni um aðild verði
fyrst svarað eftir slíka
umræðu. Aftur á móti er ég
mjög ósammála niðurstöðu
greinarinnar og tel, með
vísun í ályktun flokksins, að
langvarandi jafnvægi og
stöðugleiki í efnahagsmál-
um sé meginforsenda í málinu. Sú er ekki
staðan í dag og fyrst verðum við að ná tökum á
þeim málum.“
Höskuldur segir það liggja fyrir að skiptar
skoðanir séu innan Framsóknarflokksins um
Evrópumálin og þar fari fram opinská
umræða. Grein Jóns sé hvorki upphaf né endir
þeirrar umræðu.
Ósammála Jóni
HÖSKULDUR
ÞÓRHALLSSON
Magnús Stefánsson þing-
maður segir Jón hafa greint
ágætlega þau stóru mál sem
liggja undir í Evrópusam-
bandsmálinu.
„Jón telur tíma til kominn
að við óskum eftir viðræð-
um og gengur þar með
lengra en ég hef gert,“ segir
Magnús sem vill að samn-
ingsmarkmið verði mótuð
og á grundvelli þeirra verði
þjóðin látin kjósa um hvort
sækja eigi um eða ekki. Hann bendir á að þó
Jón segist vilja sækja um komi afstaða hans
til aðildar ekki fram í greininni.
Magnús segir mikla umræðu um málið í
grasrót flokksins og þar séu skiptar skoðanir.
„Ég hugsa að innlegg Jóns verði til að efla þá
umræðu en það er ekki gott að segja til um
hvort fylgismönnum aðildar fjölgi.“
Ágæt greining
MAGNÚS
STEFÁNSSON
Bjarni Harðarson þingmaður
segir Jón hafa sveigt af fyrri leið.
„Greinin er ekki í neinu samræmi
við stefnu Framsóknarflokksins
og hún er heldur ekki í neinu sam-
ræmi við það sem Jón talaði fyrir
á meðan hann var formaður. Hann
lagði áherslu á að annars vegar
hefðu menn gildi þjóðhyggjunnar
hugstæð og hins vegar að ef til
aðildar kæmi færum við ekki í
ESB í veikleika. Hann hefur nú
skipt um skoðun en ég get ekki séð
að það tengist með nokkrum hætti
þeim flokki sem hann veitti for-
ystu.“
Bjarni telur ekki að grein Jóns
muni hafa mikil áhrif á skoðun
framsóknarmanna. „Hún mun
ekki kúvenda skoðunum manna.
Það er mjög skýrt að andstaða við
aðildarviðræður, og það með
aðild, er meiri innan Framsóknar-
flokksins en annarra flokka. Það
er alveg sjálfsagt að þessi
minnihlutahópur láti í sér heyra
enda fylgismenn ESB í mikilli
baráttu og vilja nýta sér óstöðug-
leikann í hagkerfinu til að koma
sjónarmiðum sínum á framfæri.“
Í ósamræmi við fyrri yfirlýsingar
BJARNI HARÐARSON
JÓN SIGURÐSSON Fyrrverandi formaður Framsóknarflokksins.
Markmið
Samskipti Íslendinga við Evrópu-
sambandið byggjast fyrst og fremst
á samningnum um Evrópska
efnahagssvæðið. Full ástæða er til
þess að þróa frekar það samstarf
þar sem það á við. Langvarandi
jafnvægi og varanlegur stöðugleiki
í efnahagsmálum er ein megin-
forsenda hugsanlegrar aðildar að
Evrópusambandinu. Þannig geta
íslendingar byggt ákvarðanir sína
á styrkleika og í samræmi við sinn
eigin þjóðarmetnað, sem frjáls þjóð.
Leiðir
■ Spurningunni um hvort Ísland
eigi að gerast aðili að Evrópusam-
bandinu verður fyrst svarað í kjölfar
upplýstrar almennrar umræðu óháð
flokkadráttum.
■ Nauðsynlegt er að stjórnarskrá
Íslands verði aðlöguð nýjum veru-
leika í Evrópu- og alþjóðasamstarfi,
meðal annars til þess að tryggja að
þátttaka Íslands í því sé hafin yfir
allan vafa í nútíð og framtíð.
■ Framsóknarflokkurinn lýsir sér-
stakri ánægju með störf Evrópu-
nefndar flokksins. Framsóknarflokk-
urinn er eini stjórnmálaflokkurinn
á íslandi sem unnið hefur að skil-
greiningu samningsmarkmiða fyrir
Íslands hönd, ef til aðildarviðræðna
við Evrópusambandið kæmi.
Fyrstu skref
Til að tryggja framtíðarhagsmuni
þjóðarinnar er mikilvægt að stöðugt
sé unnið að stefnumótun og mark-
miðasetningu Íslands í Evrópusam-
starfi. Mikilvægt er að Framsóknar-
flokkurinn verði áfram leiðandi afl í
Evrópuumræðu á Íslandi.
ÁLYKTUN FRAMSÓKNAR UM EVRÓPUMÁL
Stangaveiði
Stangveiði á vatnasvæði Elliðavatns hefst 1. maí.
Veiðileyfi eru seld á Kríunesi og Elliðavatni.
Á sömu stöðum geta félagar úr Sjálfsbjörg, unglingar
(innan 16 ára aldurs) og ellilífeyrisþegar í Reykjavík
og Kópavogi fengið afhent veiðileyfi án greiðslu.
Veiðifélag Elliðavatns
1 Hvaða starfsstétt samþykkti
kjarasamninga á mánudag?
2 Hvað heitir forsætisráðherra
Finnlands, sem er í opinberri
heimsókn á Íslandi?
3 Fyrir hverja syngur Ingó,
söngvari Veðurguðanna, ekki?
SVÖRIN ERU Á SÍÐU 42
VEISTU SVARIÐ?