Fréttablaðið - 16.06.2008, Blaðsíða 48
24 16. júní 2008 MÁNUDAGUR
sport@frettabladid.is
HANDBOLTI Einn efnilegasti hand-
boltamaður landsins, Aron
Pálmars son, hefur samið við þýska
félagið Lemgo og gengur líklega í
raðir félagsins næsta sumar. Aron
fór til reynslu hjá félaginu síðasta
vetur og heillaði forráðamenn
félagsins upp úr skónum. Lemgo
sótti það hart að fá samning við
Aron í kjölfarið og nú hafa samn-
ingar tekist.
„Það er allt klappað og klárt og
ég er búinn að skrifa undir svo-
kallaðan „pre-contract“ við félag-
ið þannig að þeir eru búnir að eign-
ast mig. Ég mun spila næsta tíma-
bil með FH og eftir það ætla þeir
að sjá til hvort ég sé orðinn nógu
góður og sterkur til að koma út. Ég
myndi segja að það væru allar
líkur á því að ég fari næsta sumar,“
sagði Aron við Fréttablaðið í gær.
„Félagið er búið að vera í miklu
sambandi við mig síðustu mánuði.
Mér leist ekkert á það sem þeir
voru að bjóða mér í upphafi. Ég er
búinn að senda þeim nokkur gagn-
tilboð og á endanum náðum við
saman. Þetta er tveggja ára samn-
ingur og þeir eiga mig en hafa
ekki keypt mig. Ég er enn samn-
ingsbundinn FH til tveggja ára en
ef Lemgo vill fá mig næsta sumar
mun félagið bara kaupa mig,“
sagði Aron, sem er að verða 18 ára
gamall.
Þegar Aron fer til Lemgo verð-
ur hann þriðji Hafnfirðingurinn
hjá þýska liðinu. Logi Geirsson
hefur leikið þar undanfarin ár og
Vignir Svavarsson byrjar að spila
með liðinu næsta vetur.
Aron neitar því ekki að vera í
sjöunda himni með að hafa náð
saman við Lemgo og hann segir
stóra drauminn vera að rætast.
„Þetta er alveg frábært. Ég er
rosalega ánægður með þetta. Ég
mun taka vel á því í vetur svo ég
verði klár í þýska boltann eftir eitt
ár.
Þetta er sannkallað drauma-
félag til að spila með. Lemgo er
orðið ríkasta félagið í Þýskalandi
núna og stefnan hjá þeim er sett á
titil á næstu tveim til þrem árum
þannig að það er frábært að koma
inn í svona umhverfi. Svo skemmir
ekki fyrir að bæði Logi og Vignir
eru þarna. Verðum þarna þrír
Hafnfirðingar, það verður geð-
veikt,“ sagði Aron kampakátur en
hann hafði einnig fengið fyrir-
spurnir frá öðrum liðum í Þýska-
landi sem og í Danmörku.
henry@frettabladid.is
Aron samdi við Lemgo
FH-ingurinn efnilegi Aron Pálmarsson er búinn að semja við þýska stórveldið
Lemgo og gengur að öllu óbreyttu í raðir félagsins næsta sumar. Hann mun því
leika næsta vetur með FH í úrvalsdeild áður en hann heldur utan.
Á LEIÐ TIL LEMGO Aron Pálmarsson er þriðji Hafnfirðingurinn sem semur við þýska
stórliðið Lemgo. FRÉTTABLAÐIÐ/VALLI
Topplið Landsbankadeildar karla blómstrar bæði í varnar- og sóknarleik sínum í fyrstu sex umferðunum:
FH-ingar búnir að ná sögulegri tvennu
FÓTBOLTI FH-ingar sitja á toppi Landsbanka-
deildar karla eftir að hafa náð í 16 stig af 18
mögulegum í fyrstu sex umferðunum.
FH-ingar eru eina taplausa lið deildarinn-
ar til þessa en tíu af tólf liðum deildarinnar
hafa tapað þremur leikjum eða fleiri. Þegar
árangur FH-liðsins í fyrstu umferðunum er
skoðaður kemur í ljós að það er að komast í
hóp nokkurra útvalinna liða á báðum endum
vallarins.
Heimir Guðjónsson tók við FH-liðinu af
Ólafi Jóhannessyni eftir
síðasta tímabil og
það er ekki hægt
að hugsa sér
betri byrjun
þar sem liðið hefur sýnt mikinn stöðugleika
á báðum endum vallarins.
FH-ingar heimsækja Blika í Kópavoginn
klukkan 20 í kvöld þar sem þeir hafa harma
að hefna síðan í fyrra en 3-4 tap þeirra á
úrslitastundu átti mikinn þátt í því að þeir
misstu af titlinum.
- óój
HAFA SKORAÐ TVÖ MÖRK EÐA FLEIRI Í
ÖLLUM LEIKJUNUM
FH-liðið hefur skorað 17 mörk í fyrstu sex leikjunum eða
2,8 mörk að meðaltali í leik. Það sem kemur því í fámenn-
an hóp er að liðið hefur skorað tvö mörk eða fleiri í öllum
sex leikjunum. Keflvíkingar hafa einnig náð þessum frábæra
árangri í sumar en fyrir utan þessi tvö efstu lið Landsbanka-
deildarinnar hafa aðeins þrjú önnur lið skorað tvö mörk eða
fleiri í fyrstu sex leikjum sínum síðan deildin innihélt fyrst tíu
lið sumarið 1977.
FH-ingar eiga enn nokkuð í land með að ná metinu en tvö
lið hafa skorað tvö mörk eða fleiri í fyrstu níu leikjum sínum.
Framarar náðu því 1985 og Skagamenn jöfnuðu afrek þeirra
1996. Þriðja liðið er síðan KR frá sumrinu 1996 en KR-ingar
skoruðu tvö mörk og fleiri í fyrstu átta leikjum sínum.
HAFA HALDIÐ HREINU Í FIMM LEIKJUM AF SEX
FH-liðið hefur fengið á sig 4 mörk í fyrstu sex leikjunum eða aðeins
0,7 mörk að meðaltali í leik. Það sem kemur því í fámennan
hóp er að liðið hefur haldið marki sínu hreinu í fimm
af sex leikjum og fékk öll fjögur mörkin á sig í 4-4
jafntefli á móti nýliðum Þróttar. Aðeins fjögur
önnur lið hafa náð að halda fimm sinnum hreinu
í fyrstu sex leikjum sínum síðan deildin innihélt
fyrst tíu lið sumarið 1977.
Hin liðin fjögur sem hafa náð að halda fimm
sinnum hreinu í fyrstu sex leikjunum eru lið
Fram frá bæði 1980 og 1990, lið Skagamanna frá
1981 og svo Þórsarar sumarið 1992 en þeir voru
þá nýliðar í deildinni. Félagsmet FH var fjórum
leikjum haldið hreinu af fyrstu sex en því náði
Hafnarfjarðarliðið 1994, 2005 og svo í fyrra.
FRÁBÆR BYRJUN
Heimir Guðjóns-
son, þjálfari FH.
FRÉTTABLAÐIÐ/VILHELM
> Tveir leikir í Landsbankadeildinni
Sjöundu umferð Landsbankadeildar karla lýkur í kvöld
með tveim leikjum. Fjölnir tekur á móti Fram í Grafarvogi
og bikarmeistarar FH sækja Breiðablik heim í
Kópavoginn. FH-ingar hafa farið mikinn það
sem af er mótinu og verður áhugavert að
sjá hvernig þeim gengur gegn Blikum sem
hefur vantað allan stöðugleika í sumar og
valdið talsverðum vonbrigðum.
FÓTBOLTI Luiz Felipe Scolari hefur
loksins rofið þögnina og tjáð sig
um Chelsea, sem hann hefur
samþykkt að stýra frá og með 1.
júlí næstkomandi.
Scolari er að sjálfsögðu
upptekinn með portúgalska
landsliðinu á EM og hefur hingað
til ekkert viljað ræða um Chelsea.
Scolari viðurkennir að góð laun
hjá Chelsea séu ein af ástæðunum
fyrir því að hann tók starfið að
sér.
„Já, peningar eru ein af
ástæðunum. Ég er 59 ára og vil
hætta í þjálfun áður en ég verð
sjötugur og nú sé ég fram á að
geta hætt eftir svona fjögur til
fimm ár. Peningar eru samt ekki
eina ástæðan fyrir þessari
ákvörðun,“ sagði Scolari, sem
hefur þjálfað Portúgal í fimm og
hálft ár. - hbg
Scolari talar um Chelsea:
Peningar ein af
ástæðunum
SCOLARI Spenntur fyrir Chelsea og ekki
bara peningunum, sem þó skipta máli.
NORDIC PHOTOS/GETTY IMAGES
FÓTBOLTI Spánverjinn Fernando
Torres hefur gefið það út að hann
hafi ekki í hyggju að yfirgefa
herbúðir Liverpool á næstunni.
Enskir fjölmiðlar hafa verið að
orða hann við Chelsea síðustu
daga og sagt að Scolari, hinn
nýráðni stjóri Chelsea, ætli sér að
bjóða fjörutíu milljónir punda í
framherjann frábæra.
„Ég vil taka það skýrt fram að
ég er ekki á markaðnum og ég hef
ekki áhuga á öðru en að spila
áfram fyrir Liverpool. Ég er mjög
ánægður í herbúðum félagsins og
vil halda áfram þar. Ég kom til
félagsins með það að markmiði að
vinna titla. Það eru mörg ár eftir
af samningi mínum við félagið og
ég ætla að vinna titla á þessum
árum,“ sagði Torres, sem segist
vera hungraðri en oft áður.
„Ég er búinn að spila í undan-
úrslitum Meistaradeildarinnar
með Liverpool, sem ég hafði ekki
gert áður. Nú þegar maður hefur
fengið nasaþefinn af þessu vill
maður meira. Ég er enn hungr-
aðri fyrir vikið og vil vinna allt
sem hægt er að vinna,“ sagði
Torres. - hbg
Fernando Torres:
Er ekki á förum
frá Liverpool
FERNANDO TORRES Ánægður hjá Liver-
pool. NORDIC PHOTOS/GETTY IMAGES
FÓTBOLTI Enski dómarinn Howard
Webb mun dæma leik Grikkja og
Spánverja á miðvikudag en Webb
hefur ekki átt sjö dagana sæla
síðan hann dæmdi Austurríkis-
mönnum víti gegn Pólverjum.
Í kjölfarið hefur Webb fengið
fjölda líflátshótana og herferð
hefur verið gegn honum í
Póllandi þar sem forsætisráð-
herra landsins hefur meðal
annars látið miður falleg orð falla
í garð Webbs.
„Sem forsætisráðherra þarf ég
að vera rólegur og í jafnvægi. En
eftir þennan leik var ég ekki líkur
sjálfum mér og ég vildi drepa,“
sagði Donald Tusk, forsætisráð-
herra Póllands. - hbg
Howard Webb snýr aftur:
Webb fékk líf-
látshótanir
HOWARD WEBB Kveikti drápstilfinningu
hjá forsætisráðherra Póllands.
NORDIC PHOTOS/GETTY IMAGES
Besta dómarapar landsins í handbolta, Anton Gylfi Pálsson og Hlynur
Leifsson, lenti í svakalegri uppákomu í Sarajevo um helgina. Þar voru
þeir staddir til að dæma leik Bosníu og Ungverjalands í umspili fyrir
HM. Mikið gekk á í höllinni frá fyrstu mínútu og lætin í áhorfendum
gengu að lokum svo langt að þeir félagar þurftu að
flauta leikinn af þegar 11 mínútur voru eftir. Þá voru
heimamenn þrem mörkum undir.
„Það var allt brjálað frá fyrstu mínútu og við þurft-
um margoft að stöðva leikinn svo það væri hægt að
tína draslið upp af gólfinu. Þetta var alveg rosalegt.
Leikurinn fór fram í 7.000 manna höll en búið
var að troða 8.000 manns þar inn, hitinn
svakalegur og margir áhorfendur í vægast
sagt misjöfnu ástandi,“ sagði Anton Gylfi
þegar Fréttablaðið náði tali af honum á
flugvellinum í Sarajevo í gær.
„Þegar við flautum svo leikinn af var
verið að kasta peningum, kveikjurum
og jafnvel regnhlífum inn á völlinn.
Kveikjararnir sprungu sumir og manni brá þá hressilega. Pappírskúlur
flugu líka inn á völlinn og svo var hrækt á okkur líka. Það rigndi bara
drasli inn á völlinn í bókstaflegri merkingu. Þeir voru mjög ósáttir við
að fá ekki þá heima dómgæslu sem þeir vildu fá,“ sagði Anton Gylfi
og bætti við að mörgum viðstöddum hefði verið verulega
brugðið.
„Eftirlitsmaðurinn sagði okkur þá bara að koma
af vellinum. Ungverjarnir hreinlegu hlupu af vellin-
um. Þetta eru menn sem þekkja ýmislegt en þarna
voru þeir skíthræddir. Eftirlitsdómarinn ákvað að
gefa þeim tíu mínútur en þá hafði ekkert breyst.
Eftirlitsdómarinn ákvað þá að gefa hálftíma og
þjálfari Bosníu, ásamt einhverjum leikmönn-
um, talaði til áhorfenda og bað þá um að
róa sig niður. Það tókst ekki betur til en svo
að þegar eftirlitsdómarinn labbaði aftur
út fékk hann síma í hausinn. Þá var þetta
endanlega búið,“ sagði Anton.
ANTON GYLFI PÁLSSON OG HLYNUR LEIFSSON: LENTU Í STRÍÐSÁSTANDI Í SARAJEVO OG FLAUTUÐU LEIK AF
Regnhlífum og símum rigndi í Sarajevo