Fréttablaðið - 24.07.2008, Blaðsíða 34

● fréttablaðið ● útivist og ferðalög 24. JÚLÍ 2008 FIMMTUDAGUR2
Unglingalandsmót Ungmennafélags Íslands, UMFÍ, er nú orðið
að árlegum viðburði og verður haldið í Þorlákshöfn um verslun-
armannahelgina, en þetta er í ellefta sinn sem það verður haldið.
Þetta er vímuefnalaus fjölskylduhátíð þar sem börn og unglingar á
aldrinum ellefu til átján ára reyna fyrir sér í fjölmörgum íþrótta-
greinum.
Á mótinu verður keppt í frjálsum íþróttum, knattspyrnu, körfu-
bolta, mótorkrossi, golfi, glímu, hestaíþróttum, sundi og skák svo
dæmi séu tekin. Allir geta tekið þátt. Íþróttakeppnin hefst á föstu-
dagsmorgni og lýkur á sunnudegi. Samhliða því er boðið upp á fjöl-
breytta afþreyingu, leiki og skemmtun fyrir alla fjölskylduna.
Unglingalandsmótin hafa hvarvetna vakið mikla athygli og þeir
fjölmörgu sem þau hafa sótt hafa verið öðrum til fyrirmyndar með
allri framkomu hvort sem er í keppni eða leik. Þau eru með stærri
íþróttaviðburðum á Íslandi ár hvert og eru fastur liður hjá mörg-
um fjölskyldum. Aðstaða í Þorlákshöfn þykir vera mjög góð og
breytist bærinn í eins konar landsmótsbæ þar sem opnunartími
verslana og þjónusta verða löguð að mótinu. - hs
Fjölskyldan á landsmóti
Unglingalandsmót UMFÍ eru ávallt vel sótt og kjörinn vettvangur fyrir hreyfingu
og útivist. Þetta er vímuefnalaus hátíð þar sem öll fjölskyldan finnur eitthvað við
sitt hæfi. MYND/SÍMON SVERRISSON
Vegna mikillar eftirspurnar hefur Ferðafélag Íslands ákveðið að
bæta einni Laugavegsferð við inn í sumardagskrána.
Gengið verður frá Landmannalaugum yfir í Þórsmörk og hefst
ferðalagið 28. júlí og lýkur 1. ágúst. Ólíkt hefðbundnum Lauga-
vegsferðum félagsins verður gist í Landmannalaugum fyrstu
nóttina svo göngugarpar fá tækifæri til að skoða svæðið og baða
sig í laugunum.
Ferðafélagið sér um allt: rútuferðir til og frá Reykjavík, svefn-
pokapláss í skálum, mat í öll mál, flutning á farangri milli gisti-
staða og fararstjórn.
Dagsgöngurnar eru mislangar, sú stysta tekur þrjár klukku-
stundir en sú lengsta níu stundir, og verður fólk að vera í góðu
formi til að geta tekið þátt. Nánari upplýsingar á www.fi.is. - mþþ
Aukaferð um Laugaveginn
Á Íslandi leynast víða hinar fegurstu náttúru-
perlur sem hættir til að gleymast vegna hraðrar
yfirferðar ferðafólks eða af því að þær eru úr
alfaraleið.
Ísland er af mörgum talið eitt af fallegustu löndum
veraldar. Ef einhver efasemdamaðurinn er á annarri
skoðun þá er góð hugmynd að bregða undir sig betri
fætinum, reima á sig gönguskóna og halda út í iðandi
græna eða hrjóstruga náttúruna, sem umlykur hvern
þann ferðamann sem leið á um landið.
Þegar hratt er farið um landið gleymist oft að
nema staðar og skoða sumar af helstu náttúruperlum
landsins, jafnvel þótt þær séu oft steinsnar frá fjöl-
förnum þjóðvegum.
Þrátt fyrir að ferðamenn þurfi að staulast út úr
bifreiðinni og skella sér í gönguskóna til þess að upp-
lifa þessar einstöku perlur er það vel þess virði því
landið er svo fjölbreytt og frábrugðið frá einum stað
til annars.
Á meðfylgjandi myndum sjást náttúruperlur sem
falla í þennan flokk; litríkar, líflegar og margbreyti-
legar á sinn hátt og vert að gaumgæfa betur. - mmf
Leyndir fjársjóðir landsins
Náttúran í kringum Stóru-Laxá í Gnúpverjahreppi er bæði
margbrotin og mikilfengleg og finna flestir fyrir smæð sinni
þegar staðið er á bökkum árinnar í gljúfrum hennar.
FRÉTTABLAÐIÐ/GVA
Flatey á Skjálfanda lagðist í eyði árið 1967. Þar virðist tíminn standa í stað og er því vel þess virði að fara þangað og komast í
burtu frá ysi og þysi hins daglega lífs. FRÉTTABLAÐIÐ/GVA
Á ferð um landið er sniðugt að koma við í Æðey í Ísafjarðardjúpi. Æðey státar af miklu fuglalífi og dúntekja er þar mjög mikil.
Eyjan er láglend, holótt, þýfð og mýrlend. Þess vegna getur verið gaman að bregða sér til Æðeyjar og hoppa og skoppa um þúf-
urnar innan um kvakandi fugla. FRÉTTABLAÐIÐ/GVA
Kvíármýrarkambur í Öræfum liggur nálægt þjóðveginum og
auðvelt er að ganga þaðan. Þegar upp er komið sést Kvíárjök-
ull og milli litríkra og fagurra fjalla. FRÉTTABLAÐIÐ/GUN
Mikil eftirspurn er eftir Laugavegsgöngum og bætti Ferðafélag Íslands því
einni ferð við í lok júlí. FRÉTTABLAÐIÐ/VILHELM
Tjöld, svefnpokar og matur eru ekki það eina
sem muna þarf eftir fyrir útlegur og önnur
ferðalög. Hér er listi yfir nokkra nauðsynjahluti:
● Verkjatöflur er alltaf gott að hafa í farteskinu. Þeir
sem ætla að taka krílin með ættu líka að hafa nokkra
verkjastíla í öryggisskyni.
● Ekki er gaman að vera illa haldinn af frjókornaofnæmi í
sveitinni á meðan allir hinir skemmta sér konunglega. Því er eins
gott að gleyma ekki ofnæmistöflunum heima.
● Frunsumeðal er gott að hafa með í för, þar sem sumum hætt-
ir til að fá frunsur í útilegum ýmist vegna svefnleysis, sólarljóss
eða óreglulegs mataræðis.
● Sólarvörn og varasalva er líka ágætt að hafa til að koma í veg
sprungnar varir, sólbruna og flagnaða húð.
● Plástur er klárlega á lista yfir nauðsynjahluti sem og neyðar-
kassi ef út það er farið, brjóstsviðatöflur ef maginn er viðkvæm-
ur og svo auðvitað verjur.
● Síðan má heldur alls ekki gleyma að hafa með þau lyf sem fólk
tekur að staðaldri. - kka
Við öllu búin