Fréttablaðið - 14.10.2008, Blaðsíða 2
2 14. október 2008 ÞRIÐJUDAGUR
ÖGMUNDUR JÓNASSON Formaður þing-
flokks Vinstri grænna.
STJÓRNMÁL Þingflokkur Vinstri
grænna krefst rannsóknar á
öllum viðskiptum stærstu
eigenda Glitnis, Landsbanka
Íslands og Kaupþings, bankaráðs-
manna, bankastjóra og æðstu
stjórnenda síðustu tólf mánuði.
„Sérstaklega verði skoðaðar
hugsanlegar millifærslur til
erlendra banka og annarra
fjármálafyrirtækja. Einnig verði
rannsökuð gjaldeyriskaup
bankanna síðastliðna tólf mánuði,
hvernig að þeim var staðið og þau
fjármögnuð. Loks fari fram
sérstök athugun á því hvernig
bankarnir hafa staðið að eigna-
stýringu, ráðgjöf og flutningi
peninga almennra viðskiptavina
af bankareikningum yfir í sjóði,
hlutabréfasöfn, peningamarkaðs-
reikninga og aðra ótryggari
fjárvörslu og ávöxtun á umræddu
tímabili.“ - gar
Þingflokkur Vinstri grænna:
Vill rannsókn á
bankamönnum
EFNAHAGSMÁL Forseti Íslands,
Ólafur Ragnar Grímsson, mun á
næstu dögum heimsækja vinnu-
staði, skóla, samfélagsstofnanir,
byggðarlög og hjálparmiðstöðvar
og ræða við fólk. Forsetinn fór í
fyrstu heimsóknirnar í gær en þá
heimsótti hann HB Granda og
tölvuleikjafyrirtækið CCP og
ræddi við starfsfólk þessara fyrir-
tækja.
Í fréttatilkynningu frá forseta-
embættinu segir að í heimsókn-
unum verði lögð áhersla á sam-
ræður um hvernig Íslendingar
geti treyst undirstöður efnahags-
lífs og samfélags, sótt fram til
nýrri og betri tíma, nýtt margvís-
legar auðlindir landsins og fjöl-
þættan mannauð sem þjóðin býr
yfir. Mikilvægt sé að efla sam-
stöðu og gagnkvæman stuðning
landsmanna, bjartsýni og sóknar-
hug.
Forsetinn hóf heimsókn sína í
HB Granda í gær með því að ræða
við Eggert B. Guðmundsson for-
stjóra og Árna Vilhjálmsson,
stjórnarformann HB Granda, og
ræða svo við starfsfólk fyrirtæk-
isins á íslensku og ensku í mat-
salnum. Starfsfólkið ræddi
áhyggjur sínar og annað sem
brennur á fólki.
Forsetinn og fylgdarlið hans
héldu svo áfram för og heimsóttu
CCP þar sem meðal annars kom
fram að fyrirtækið hefði ekki
verið byggt upp fyrir peninga
heldur hugvit og samstöðu og
sameiginlegt átak starfsfólksins.
Þar hefðu menn eitt sinn verið
launalausir í þrjá mánuði.
- ghs
Forseti Íslands hóf vinnustaðaheimsóknir sínar í Reykjavík í gær:
Stappar stálinu í þjóðina
RÆDDI BRENNANDI SPURNINGAR
Forseti Íslands, Ólafur Ragnar Grímsson,
heimsótti HB Granda og tölvuleikjafyrir-
tækið CCP í gær. Starfsfólkið ræddi það
sem brennur á því þessa dagana.
FRÉTTABLAÐIÐ/ANTON
UTANRÍKISMÁL Geir H. Haarde for-
sætisráðherra er ekki sammála
Ingibjörgu Sólrúnu Gísladóttur
utanríkisráðherra um að nú sé um
tvennt að velja fyrir Íslendinga:
annaðhvort að ganga í Evrópu-
sambandið eða hverfa aftur til
fortíðar.
Ingibjörg lýsti þessari skoðun
sinni í grein sem birtist í Morgun-
blaðinu í gær. Kristinn H. Gunn-
arsson, þingmaður Frjálslyndra,
spurði Geir í óundirbúnum fyrir-
spurnartíma á Alþingi í gær hvort
hann teldi það málefnalegt að stilla
umræðunni þannig upp að þeir
sem ekki aðhylltust inngöngu í
Evrópusambandið umsvifalaust
væru talsmenn þess að hverfa
aftur til fortíðar.
Geir kvaðst sammála Kristni um
að andstaða við inngöngu í Evr-
ópusambandið jafngilti ekki því að
vilja hverfa aftur til foríðar. En
hann tjáði sig ekki um málið að
öðru leyti.
Kristinn gagnrýndi utanríkis-
ráðherra sérstaklega fyrir ómál-
efnalegt innlegg á svo viðsjár-
verðum tímum. - jse
Ráðherrarnir hafa ólíka sýn á framtíðarkosti landsins:
Geir ósammála Ingibjörgu
INGIBJÖRG SÓLRÚN OG GEIR Þegar
kemur að Evrópuumræðunni ganga
þau tvö ekki í takt en Geir og Kristinn
H. Gunnarsson fundu þar nokkurn
samhljóm í gær. FRÉTTABLAÐIÐ/HÖRÐUR
TÓNLISTARHÚS Í SMÍÐUM Byggingu
verður haldið áfram. FRÉTTABLAÐIÐ/VALLI
BORGARMÁL Í yfirlýsingu frá
helstu forvígismönnum tónlistar-
hússins, sem er að rísa við
höfnina í Reykjavík, segir að
hvergi verði slakað á ítrustu
kröfum um byggingu hússins,
þrátt fyrir erfiðleika í efnahags-
lífinu um þessar mundir.
„Við höfum ekki í hyggju að
hætta við – eins og aðrir hafa
gert,“ segir í yfirlýsingu frá
Vladimir Ashkenazy, sem mun
leiða verkefnaval hússins fyrstu
árin, Ólafi Elíassyni hönnuði,
Peer Teglgaard Jeppesen arkitekt
og Jasper Parrott ráðgjafa.
„Íslendingar eiga þetta mikla
hús skilið og við munum gera allt
sem í okkar valdi stendur til að
ljúka megi byggingu þess með
farsælum hætti“, segir í yfirlýs-
ingunni. - gb
Forvígismenn tónlistarhúss:
Ætla hvergi að
slaka á kröfum
EFNAHAGSMÁL Viðræður hafa átt
sér stað milli fulltrúa fimm lífeyr-
issjóða og stjórnvalda um kaup
sjóðanna á hluta eigna og reksturs
Kaupþing. Verði af kaupunum
munu sjóðirnir eiga 51 prósent, en
ótilgreindir fjárfestar afganginn.
Sjóðirnir sem um ræðir eru: Líf-
eyrissjóður starfsmanna ríkisins,
Lífeyrissjóður
verzlunar-
manna, Samein-
aði lífeyrissjóð-
urinn, Gildi og
Stafir. Fulltrúar
þeirra hittu for-
sætis-, mennta-
mála-, viðskipta-
og
iðnaðarráð-
herra á fundi á
sunnudags-
kvöld. Stjórn-
völd taka vel í
aðkomu sjóð-
anna.
„Við höfum
verið að vinna
að þessu undan-
farna daga, að
skoða hvort við
getum komið að
þessu með ein-
hverjum hætti og náð aftur ein-
hverju af þeim verðmætum sem
glötuðust,“ segir Þorgeir Eyjólfs-
son, forstjóri Lífeyrissjóðs verzl-
unarmanna.
Hann segir viðræður við stjórn-
völd hafa verið óformlegar en vel
hafi verið tekið í hugmyndir um
aðkomu sjóðanna. „Við fundum
mikinn velvilja gagnvart hug-
myndinni.
Þorgeir vill ekki upplýsa hvaða
fjárfestar kæmu að kaupunum ef
af þeim yrði. „Við stefnum að því
að eignast 51 prósent. Hryggjar-
stykkið yrði starfsemi hér innan-
lands. Það yrði mjög takmarkað
hvað yrði af erlendri starfsemi.“
Össur Skarphéðinsson iðnaðar-
ráðherra segist lítast ákaflega vel
á hugmyndir lífeyrissjóðanna. „Það
yrði djarft útspil hjá lífeyrissjóð-
unum til að verja eigur sínar. Ljóst
er að þeir eiga mikið í húfi og þetta
yrði djarfmannlega og vel teflt. Ég
tel það miklu hugnanlegra, í þeirri
stöðu sem Íslendingar hafa ratað í,
ef hér er starfandi einn einkabanki
til mótvægis við ríkisbankana sem
ljóst er að munu starfa hér um
nokkurt skeið.“
Össur segist telja lífeyrissjóðina
munu gegna mikilvægu hlutverki í
endurreisnarstarfi. „Ég held að
Ísland verði mun fljótari til að
hrista af sér doðann og rísa úr ösku-
stónni en menn gera sér í hugar-
lund. Það að lífeyrissjóðirnir, með
sín félagslegu markmið að leiðar-
ljósi, verði öflug tæki í endurreisn-
inni hugnast mér vel. Slíkur banki
myndi vaxa vel og kynni að gefa
sjóðunum góða ávöxtun á sitt fé.“
Málið var kynnt stjórnum ein-
stakra lífeyrissjóða í gærkvöldi og í
dag verður tekin ákvörðun um
hvort formlegt tilboð verður lagt
fram í Kaupþing.
kolbeinn@frettabladid.is
Lífeyrissjóðir skoða
kaup á Kaupþingi
Viðræður eru komnar á skrið milli fimm lífeyrissjóða og stjórnvalda um kaup
sjóðanna á Kaupþingi. Rætt er um að sjóðirnir eignist nauman meirihluta.
Ákvörðun verður tekin í dag um hvort formlegt tilboð verður lagt fram.
KAUPÞING Fimm lífeyrissjóðir eru nú í viðræðum við ríkisvaldið um að kaupa 51
prósents hlut í Kaupþingi. Fjárfestar myndu kaupa afganginn. Ákvörðun verður tekin
í dag. FRÉTTABLAÐIÐ/GVA
ÞORGEIR
EYJÓLFSSON
ÖSSUR
SKARPHÉÐINSSON
FORSETI „Það má vel vera að í
hugum einhverra hafi það skaðað
embættið,“ sagði Ólafur Ragnar
Grímsson þegar hann var spurður
hvort hann hafi skaðað embættið
með því að lofsyngja útrásina og
að hafa verið oft í slagtogi með
þeim sem fremstir fóru í henni.
Hann sagði enn fremur að
eflaust hafi hann kveðið of hart
að þegar hann talaði um útrásina
en hann minnti einnig á að útrásin
væri ekki aðeins verkefni sem
fáir útvaldir stunduðu. Útrás
banka og fjármálafyrirtækja
hefði skilað miklum auðæfum í
þjóðarbúið sem flestir hefðu notið
góðs af í árafjöld. - jse
Forseti Íslands um útrásina:
Auðæfi skiluðu
sér í þjóðarbúið
FRAMKVÆMDIR „Augljóslega ríkir
óvissa um framhald verkefnisins.
Við höfum nánast stöðvað
framkvæmdir meðan fjármagn er
ótryggt,“ segir Gylfi Gíslason,
framkvæmdastjóri byggingarfyr-
irtækisins Jáverk ehf. Um 150
starfsmenn hafa undanfarið
unnið að byggingu bíóhúss í
Egilshöll fyrir Nýsi hf.
Gylfi segir enga framleiðslu
eiga sér stað á byggingarsvæðinu
eins og er. „Við erum að verja
bygginguna, taka til á svæðinu og
svo framvegis. Það er enginn að
hamast við að framleiða meðan
enginn veit hvernig þetta endar.
Fjármögnunaraðilinn, Landsbank-
inn, er ekki til lengur,“ segir
Gylfi. - kg
Bygging bíóhúss í Egilshöll:
Framkvæmdir
nánast stopp
ÓVISSA Engin framleiðsla á sér stað á
byggingarsvæði bíóhúss í Egilshöll.
FRÉTTABLAÐIÐ/VILHELM
Dóra, eruð þið að súpa seyðið
af kreppunni?
„Ja, betra er að borða súpu en að
sitja í henni.“
Veitingahúsið Á næstu grösum bauð
gestum og gangandi upp á súpu og
brauð í gær. Dóra Svavarsdóttir er einn af
eigendum staðarins.
FRESTUN Þór Sigfússon á ekki von á
stórfelldum uppsögnum hjá Sjóvá-
Almennum. FRÉTTABLAÐIÐ/GVA
VIÐSKIPTI „Félagið stendur
traustum fótum. Hins vegar eru
hagræðingartímar fram undan og
við vildum ganga á undan og sýna
gott fordæmi,“ segir Þór Sigfús-
son, forstjóri Sjóvár-Almennra. Í
vikulegum tölvupósti sem
starfsfólki barst í gær kemur
fram að sem nemur tíu prósent-
um af launagreiðslum fimmtán
lykilstjórnenda hafi verið frestað
um óákveðinn tíma.
Aðspurður segist Þór ekki eiga
von á stórfelldum uppsögnum hjá
félaginu. „Við munum leita allra
leiða til að hagræða í rekstrinum,
og höfum þegar náð fram
gríðarlegri hagræðingu,“ segir
Þór. - kg
Sjóvá-Almennar:
Fresta hluta
launagreiðslna
lykilstjórnenda
SPURNING DAGSINS