Lesbók Morgunblaðsins - 27.05.2006, Blaðsíða 3
Lesbók Morgunblaðsins ˜ 27. maí 2006 | 3
Ég er á móti hræsni.
Ég er á móti lýðræði.
Ég er á móti skrifræði.
Eitthvað þessu líkt
sagði Johnny Rotten
og bætti við:
Ég er á móti öllu sem endar á i.
…
Flokkurinn á frekar að vera
lítill og harður
en stór og linur,
sagði Lenin
sem var
samsærismaður í huganum
og hafði bólugrafna trú
á mannkyninu …
Látum okkur dreyma,
hélt hann áfram og teygði sig
í dadaískan staf,
sem hleypti púðri
í heysátur bændanna
og tár sem hann hristi
fram úr erminni.
Þetta voru ljóð,
grýlukerti
sem frusu í sólinni
á meðan frostrósir teiknuðu
fána í myrkrið
og beinaberir hundar
veltu sér upp úr nepjunni
skítugir og lúsugir
í skuggasundi tímans
án þess að vita
að einn góðan veðurdag
pössuðu afkomendur þeirra
bíla flokksbroddanna,
í hamingju agans
bak við gaddavír hugans.
…
Nei, ekki gráta
þótt spegill bílstjórans
geri þig lítinn í aftursætinu,
það eru hundrað ár í eilífðina,
nóg af frosti í hjarta þínu
og alltaf eitthvað nýtt á markaðnum.
Þú skrúfar bara niður rúðuna,
skimar eftir
heimilisfangi orðanna
og húkkar píur póesíunnar.
Nei, ekki gráta,
við húsleit finnast engir draumar
ekkert sem skiptir máli
og þú færð vægan dóm
og jafnvel góðan
fyrir frostið í hjarta þínu
og nýjungarnar …
Getum við ekki bara fengið okkur
fótboltaskó,
farið út á kvöldin
og sparkað í veruleikann?
Hann sparkar auðvitað á móti
en við erum í betri skóm
og spörk okkar
verða markvissari en orðin
beinskeyttari en penninn
og öflugri
en hinn kreppti hnefi
byltingarinnar
sem lognaðist út af
í atkvæðagreiðslum
haustið sem hitt liðið vann
en þá kom í ljós að við vorum aðeins
útúrdúr á spássíu
neðanmálsgrein
við meginmál tímans
og ekkert nema orðin,
penninn og hnefinn
gátu hrært upp í textanum.
Nei, ekki gráta
þótt háskólinn verði seldur í brotajárn
og hjarta þitt einkavætt.
Þú skiptir bara um kennitölu
einsog fyrirtækin
og segir ef einhver er með kjaft:
Þú ert ekki að tala við mig,
maðurinn sem var hérna í gær
er ekki lengur til.
Ég er laus allra mála.
Ef ríkisstjórnin væri bolti
myndi ég sparka henni út af.
Vandinn er bara sá að þá fengi hún horn
og skoraði glæsilegt mark
því stjórnarandstaðan er svo léleg í vörn.
Þannig er staðan:
Gamlingjar lokaðir inni
vegna elliglapa
en unglingar á lyfjum
vegna æskufjörs.
Enn teikna frostrósir
fána í myrkrið
og grýlukertin ekki bráðnuð.
Elvis er enn í hernum
og vinir mínir,
stjórnleysingjarnir,
hafa skráð sig í lögregluskólann.
Tár mín eru frosin,
þorstinn mitt heróp
í skrælnuðum draumi.
Meira að segja Bob Dylan
er búinn að gleyma öllu sem hann sagði
en hann sagði það samt
og þar við situr hvað sem hann segir.
Já félagar, látið dæluna ganga,
það vantar ekki bara
ljóðlist í lífið,
heldur líf í ljóðið
enda hefur ekkert frést af
Johnny Rotten
síðan hann opnaði fasteignasölu
í Los Angeles.
Við sendum okkar bestu kveðjur
héðan úr hagvextinum
og vonum bara
að húsnæðismarkaður hugans
sé ekki síðri þar en hér,
og þú í góðum málum
enn á móti hræsni
enn á móti lýðræði
enn á móti skrifræði
og öllu sem endar á i.
Dada-pönk handa Lenin
– endurskoðuð útgáfa
Eftir Einar Má Guðmundsson
Morgunblaðið/RAX
Höfundur er rithöfundur.