Morgunblaðið - 14.06.2007, Page 8

8 FIMMTUDAGUR 14. JÚNÍ 2007 MORGUNBLAÐIÐ
ALÞINGI
Eftir Friðrik Ársælsson
fridrik@mbl.is
GEIR H. Haarde forsætisráðherra segir að
stjórnarflokkarnir hafi ekki samið um hvort taka
skuli ný vatnalög til endurskoðunar og að
óbreyttu taki lögin gildi 1. nóvember nk. þar sem
fyrrverandi ríkisstjórnarflokkar hafi veitt málinu
brautargengi á síðasta þingi. Geir segir málið á
forræði núverandi iðnaðarráðherra og kveðst
hann gera ráð fyrir að hann muni fara yfir málið
og meta það hvort ástæða sé til breytinga á þeim
lögum sem Alþingi hafi veitt samþykki sitt.
Þetta kom fram í svari forsætisráðherra við
fyrirspurn Steingríms J. Sigfússonar, formanns
Vinstri grænna, í umræðum um störf Alþingis í
gær. Þakkaði Steingrímur Geir skýr svör sem
hann sagði til marks um það að ekkert hefði verið
samið milli stjórnarflokkanna um þetta mál sem
Samfylkingin, með núverandi iðnaðarráðherra í
broddi fylkingar, hefði mótmælt harðlega þegar
það var afgreitt á Alþingi. „Þá er hér á ferðinni
enn eitt málið þar sem Samfylkingin virðist engu
hafa náð fram í samræmi við sínar áherslur á
fyrra kjörtímabili og það í einu harðasta og heit-
asta deilumáli kjörtímabilsins.“
Helgi Hjörvar, þingmaður Samfylkingarinnar,
sagði að þótt vatnalaga væri ekki getið í stjórn-
arsáttmála lægi það fyrir að um málið yrði rætt
og komist að niðurstöðu innan ríkisstjórnarinnar.
Hann sagði að yfirlýsingar fyrri stjórnarandstöðu
um að afturkalla lögin, fengi hún til þess þing-
meirihluta í alþingiskosningum, ættu ekki lengur
við þar sem stjórnarandstaðan hefði ekki fengið
þingmeirihluta til þess.
Stjórnarflokkarnir halda
sinni sterku skírskotun
Kristinn H. Gunnarsson, þingflokksformaður
Frjálslynda flokksins, tók undir með Steingrími
og sagði að stjórnarflokkarnir væru ósammála
um hækkun launa seðlabankastjóra og ættu eftir
að semja um niðurstöðu í því máli og hið sama
gilti um hvalveiðar í atvinnuskyni, friðun Þjórs-
árvera, málefni Íbúðalánasjóðs og sennilega ætti
eftir að koma í ljós að stjórnarflokkarnir væru
ósammála um rekstrarform Ríkisútvarpsins.
„Það skýrist enn frekar með hverjum deginum að
við búum við ríkisstjórn hins ófullgerða stjórn-
arsáttmála,“ sagði Kristinn.
Guðni Ágústsson, formaður Framsóknar-
flokksins, sagðist vorkenna hinum hrekklausa og
meinlausa forsætisráðherra fyrir það hversu
grandalaus hann væri að ganga til ríkisstjórn-
arsamstarf við Samfylkinguna sem væri hópur
fólks úr gjörólíkum áttum. Hann sagði að þing-
menn Samfylkingarinnar væru hver og einn með
hina og þessa handsprengjuna í vösum sem þeir
hikuðu ekki við að henda í ráðherra Sjálfstæð-
isflokksins. „Ég sé hér í þingsalnum, undir öllum
þessum skelfingarræðum samfylkingarmanna, að
hárin rísa á höfði margra sjálfstæðismanna,“
sagði Guðni.
Lúðvík Bergvinsson, í Samfylkingunni, varpaði
þeirri spurningu fram hvort þess misskilnings
gætti hjá stjórnarandstöðunni að stjórnarsam-
starf tveggja flokka þýddi það að flokkarnir sam-
einuðust algjörlega, eins og verið hefði undanfar-
in 12 ár. „Þessir tveir flokkar hafa ekki
sameinast, þeir hafa áfram sína sterku skírskotun
og þannig verður það,“ sagði Lúðvík.
„Ríkisstjórn hins ófull-
gerða stjórnarsáttmála“
Stjórnarandstaðan segir stjórnarflokkana á öndverðum meiði í mörgum málum
Í HNOTSKURN
»Hart var tekist á um afstöðu stjórn-arflokkanna til vatnalaganna á Alþingi.
»Vatnalög voru samþykkt sem lög 18.mars 2006 og taka gildi 1. nóvember
samkvæmt tillögu meirihluta iðnaðarnefnd-
ar
»Samfylkingin lagðist alfarið gegn nýj-um vatnalögum og sagði að með lög-
unum væri einkaeignarréttur á vatni festur
í lög.
»Helgi Hjörvar telur að yfirlýsingarfyrri stjórnarandstöðu um afturköllun
laganna eigi ekki lengur við.
Morgunblaðið/ÞÖK
Sumarþingi lokið Nokkrir ráðherrar ríkisstjórnarinnar á þingi. Þá var fundum þess frestað til 1. október næstkomandi.
Þingi frestað
til 1. október
TILLAGA forsætisráðherra um
frestun á fundum Alþingis var sam-
þykkt samhljóða og tekur Alþingi
að öllu óbreyttu til starfa á ný 1.
október. Steingrímur J. Sigfússon,
formaður Vinstri grænna, spurði
ráðherra hvort til stæði að kveðja
Alþingi fyrr saman en 1. október,
þar sem oft hefði heyrst úr ranni
Samfylkingarinnar að æskilegt
væri að kalla Alþingi fyrr saman að
hausti til að vinna að fjárlagagerð
og fleiri mikilvægum málum. Geir
sagði að engin sérstök áform væru
að kalla þingið saman fyrir 1. októ-
ber. Í stjórnarskránni væri hins
vegar gert ráð fyrir því að hægt
væri að ákveða með lögum sér-
stakan samkomudag Alþingis og
það hefði komið til tals að kalla það
saman fyrr en gert hefði verið. Um
það væri hins vegar engin nið-
urstaða fengin að þessu sinni og
engin lög í breytingaátt samþykkt.
Átta lagafrumvörp og tvær
þingsályktunartillögur voru sam-
þykkt á sumarþinginu, sem var
óvenju langt að þessu sinni, þar sem
ný ríkisstjórn hefur tekið við.
Telja
forgangs-
röðun
ranga
LÖG um breytingu á lögum um al-
mannatryggingar og á lögum um
málefni aldraðra hafa verið samþykkt
á Alþingi og taka þau gildi fyrsta júlí.
Breytingarnar hafa það í för með sér
að atvinnutekjur ellilífeyrisþega og
vistmanna 70 ára og eldri munu ekki
hafa áhrif á fjárhæð ellilífeyris, tekju-
tryggingar, vasapeninga og vist-
unarframlags Tryggingastofnunar.
Þá hafa atvinnutekjur vistmanna 70
ára og eldri ekki áhrif á greiðsluþátt-
töku þeirra í dvalarkostnaði á dvalar-
og hjúkrunarheimilum fyrir aldraða.
Þingmenn stjórnarandstöðu eru
ósammála þeirri leið sem farin er í
frumvarpinu og telja hag eldri borg-
ara og öryrkja fremur borgið með því
að hækka frítekjumarkið úr 300.000
kr. í 960.000 kr. á ári. Þannig gætu
elli- og örorkulífeyrisþegar unnið sér
inn 80.000 kr. á mánuði án þess að líf-
eyrisgreiðslur þeirra skertust. Marg-
ir stjórnarandstæðingar tóku til máls
og lögðu áherslu á að eitt skyldi yfir
alla ganga meðal aldraðra og bentu á
að einstaklingar á bilinu 67–70 ára
væru að jafnaði betur í stakk búnir til
að afla sér atvinnutekna en þeir sem
væru 70 ára og eldri.
Ályktun af landsþingi lögleidd
Þuríður Backman, fulltrúi Vinstri
grænna í heilbrigðisnefnd, sagði að
með þessu frumvarpi væri verið að
leiða í lög ályktun af Landsþingi
Sjálfstæðisflokksins um bætt kjör
aldraðra. Hún sagði það mjög miður
að ekki hefði verið haft betra samráð
við hagsmunasamtök og aðila vinnu-
markaðarins. Bjarni Harðarson í
Framsóknarflokki sagði, að Sjálf-
stæðisflokkurinn réði ferðinni í vel-
ferðarmálum og með lagabreyting-
unni væri stigið mikið óheillaskref.
Formaður Vinstri grænna, Stein-
grímur J. Sigfússon, sagði fyrsta
skref nýrrar ríkisstjórnar í málum
eldri borgara athyglisvert og spurði
hvort jafnaðarmannaflokkurinn væri
stoltur. „Hvað með þá öldruðu sem
ekki geta bætt sína fjárhagsstöðu
heilsunnar vegna? Það segir sína
sögu á hverju er byrjað,“ sagði Stein-
grímur.
Ellert B. Schram, Samfylkingu,
sagði að verið væri að auka tekju-
möguleika fólks eldra en 70 ára.
Hann kvað tillögu stjórnarandstöðu
ágæta út af fyrir sig og fagnaði því að
góður andi virtist vera fyrir því að
vinna vel í málefnum eldri borgara í
þingsölum á næstu misserum.