Morgunblaðið - 02.07.2007, Blaðsíða 6

6 MÁNUDAGUR 2. JÚLÍ 2007 MORGUNBLAÐIÐ
FRÉTTIR
Eftir Ástu Sóley Sigurðardóttur
astasoley@mbl.is
„ÞAÐ ER alltaf sjóstangveiðimót
hér á hverju sumri og það er alltaf á
afmælinu mínu,“ segir Bjarni Magn-
ússon en á annað hundrað manns
sótti sjóstangveiðimótið í Grímsey.
Bjarni hefur verið hreppstjóri í
Grímsey lengst allra en hann hefur
sinnt starfinu síðan 1969.
Hann segir hreppstjórastarfið
hafa mikið breyst, á sínum tíma hafi
falist mikil innheimta í starfinu og
hreppstjóri hafi meðal annars sé um
greiðslur til ellilífeyrisþega og ör-
yrkja.
Bjarni tók á móti 43 úr félagi
Grímseyjarvina síðastliðinn laug-
ardag og fagnaði með þeim 70 ára
afmæli. Fararstjóri hópsins var for-
maður félagsins, Helgi Daníelsson.
„Þetta var frábær hópur og alveg
dýrlega gaman að hafa þau, svo
sannarlega ánægjulegt að þetta
skyldi komast á,“ segir Bjarni en
hann sýndi hópnum allt það mark-
verðasta í eyjunni og sýni þeim síð-
an bjargsig í bjarginu í Básavík.
Byrjaði í bjargsigi 13 ára
„Við drögum sigmanninn upp á
traktor,“ segir Bjarni aðspurður
hvernig sigið fari fram, „árið 1952,
þá 22 ára, eignaðist ég dráttarvél
og þá byrjuðum við á því, en áður
var þetta dregið á mönnum og
stundum notaðir hestar líka, þeir
voru á við þrjá menn. Ég byrjaði
svoleiðis uppi á bjargi þegar ég var
13 ára gamall 1943.“
Hann byrjaði að síga sjálfur um
þrítugt en segir allt of fáa unga
menn vilja síga í dag. „Þeir eru ekki
vanir björgunum eins og var í þá
daga; þegar ég var að alast upp
voru þetta svo miklar nytjar.“ Hann
segir fimm úthöld vera í eyjunni en
þrír menn eru í einu úthaldi, einn
sígur, annar er á bjargbrúninni og
sá þriðji keyrir traktorinn.
Bjarni segir mörg þúsund egg
fást úr bjarginu á hverju ári en þó
hafi hvorki verið mikið í vor né í
fyrravor. „Það eru ekki seld nein
egg, þau eru bara borðuð hér og
gefin vinum og kunningjum.“
Hann segir ritueggin vera uppá-
haldseggin sín en ritan sé farin að
verpa seint og fuglum hafi fækkað
undanfarið vegna ætisleysis þannig
að eggin fái hann varla lengur.
Missa fleiri konur úr eyjunni
Bjarni hefur búið í eyjunni alla tíð
og segist aldrei hafa fundið betri
stað til að búa á. Hann segir ekki
miklar sveiflur vera í íbúafjölda á
eyjunni. „Við misstum þó tvær stór-
ar fjölskyldur fyrir tveimur árum
og þá fórum við niður fyrir 100 íbúa
en konurnar hér eru duglegar að
eiga börn þannig að við hljótum að
komast yfir hundraðið aftur,“ segir
Bjarni og bætir við að stúlkurnar
flytji frekar burt en strákarnir, en
þeir fari oft í einhverja ævintýra-
mennsku og komi svo að lokum
heim með konur þannig að um 2/3
af konum eyjarinnar séu aðfluttar.
Fékk sjóstangveiði-
mót í afmælisgjöf
Bjarni Magnússon í Grímsey hefur stundað bjargsig frá
13 ára aldri, en hann fagnaði 77 ára afmæli um helgina
Harkan sex Bjarni búinn að gera
sig kláran fyrir bjargsig.
DUGNAÐARANDI sveif yfir Háa-
leitis-, Bústaða- og Fossvogshverfi
þegar fram fór hreinsunarátakið
„Tökum upp hanskann“ og léku
sólargeislarnir við alla sem þátt
tóku í hreinsuninni. Bæði börn og
fullorðnir tóku til hendinni en eft-
ir nokkurra klukkustunda vinnu
var fjölskyldugrillgleði við
Breiðagerðisskóla og allir fengu
að gæða sér á dýrindis grillmat.
Þá var í húsnæði frístundaheim-
ilisins Sólbúa kynnt úttekt á lítilli
könnun sem nemendur á ungl-
ingastigi skólanna í hverfunum
gerðu á veggjakroti og skemmd-
arverkum en vonast er til að
gengið verði betur um í framtíð-
inni.
Einnig máluðu börnin í hverf-
unum skilti með jákvæðum um-
hverfisskilaboðum, en þau verða
sett víða um hverfið til að gleðja
augun og glæða andann. Vonandi
hvetja þau fólk til að hugsa vel
um umhverfið enda synd að við-
halda ekki öllu sem áorkað var í
hreinsuninni.
Morgunblaðið/Ómar
Góð samvinna Jóhanna, Katla, Fríða og Aldís voru allar duglegar að mála,
en skiltið þeirra á örugglega eftir að verða einhverjum hvatning.
Hreinsað og hvatt
til umhverfisdáða
RÍKISSTJÓRN Sjálfstæðisflokks
og Samfylkingar nýtur mikils
stuðnings þjóðarinnar en 83% pró-
sent landsmanna sögðust styðja
stjórnina samkvæmt mælingu sem
gerð var í júní hjá Capacent Gallup.
Þetta er mesti stuðningur sem
Gallup hefur mælt við nýja rík-
isstjórn. Stuðningurinn var mestur
eftir kosningarnar 1995 þegar hann
var 74%, en þá tók við sú rík-
isstjórn sem fór frá völdum í vor.
Innan við helmingur þjóðarinnar
er ánægður með val á ráðherrum í
nýrri ríkisstjórn. Um helmingur er
ánægður með val á ráðherrum
Samfylkingar og 41% er ánægt
með val á ráðherrum Sjálfstæðis-
flokks.
Fylgi flokkanna breytist lítið frá
síðustu mælingu, Sjálfstæðisflokk-
urinn mælist með 41% fylgi, Sam-
fylkingin mælist með 29% fylgi,
Vinstrihreyfingin – grænt framboð
mælist 15% fylgi, Framsóknar-
flokkurinn er með 9% fylgi, fylgi
Frjálslynda flokksins mælist 5% og
Íslandshreyfingarinnar 1%.
Tæplega 17% svarenda gefa ekki
upp afstöðu sína og 4% segjast
myndu skila auðu ef kosningar
færu fram í dag.
Stjórnin
með mikinn
stuðning
83% landsmanna
styðja stjórnina
STJÓRN Vinstri grænna í Hafnar-
firði lýsir yfir fullum stuðningi við yf-
irlýsingar fulltrúa Hafnarfjarðar í
Hitaveitu Suðurnesja í fjölmiðlum
um að Hafnarfjörður neyti forkaups-
réttar síns í fyrirtækinu. Segist
stjórn VG í Hafnarfirði leggja
áherslu á að varðveita meginmark-
mið um almannahagsmuni og um að
gæta að hag neytenda.
Neyti for-
gangsréttar
Eftir Unu Sighvatsdóttur
unas@mbl.is
FUNDAÐ verður í dag hjá bæjar-
stjórnum Hafnarfjarðar og Reykja-
nesbæjar um Hitaveitu Suðurnesja.
Forkaupsréttur bæjarfélaganna að
15,2% eignarhlut ríkisins í HS renn-
ur út á morgun, þriðjudag.
Fulltrúar Hafnarfjarðarbæjar
fóru yfir málin í gærkvöldi og segir
Gunnar Svavarsson, forseti bæjar-
stjórnar, að tekin verði ákvörðun
eins fljótt og auðið er, en að hún
byggist jafnframt á því að niður-
stöður Reykjanesbæjar liggi fyrir.
„Reykjanesbær verður að svara því
hvort þeir ætla að leyfa okkur að
vaxa og dafna inni í þessu félagi sem
við höfum búið til með þeim og þá
hvort við höfum tækifæri til að
kaupa ráðandi hlut án sérstakra
skilyrða.“ Meginmarkmið Hafnar-
fjarðarbæjar sé að reyna að ná
tryggri stöðu með hlut sem nemi
34% í HS. „Núna skapast þetta
kauptækifæri fyrir okkur og við er-
um ekki að boða það að við stefnum
á að fara í 60%, eins og sagði í Morg-
unblaðinu á laugardag, heldur er
markmiðið fyrst og fremst að kom-
ast í þriðjungs hlut,“ segir Gunnar.
Samstarf við Geysi lofar góðu
Árni Sigfússon, bæjarstjóri
Reykjanesbæjar, segir að aðal-
áhersla sjálfstæðismanna í bænum
sé að eiga áfram ráðandi hlut í hita-
veitunni, en ekki sé tekin sérstök af-
staða til þess hvað önnur sveitar-
félög vilji gera. „Við erum tiltölulega
róleg hér því við höfum þennan for-
kaupsrétt, samkvæmt reglum fé-
lagsins, og við munum nýta hann ef
við teljum að það þjóni hagsmunum
hitaveitunnar best,“ segir Árni.
Mikilvægast sé að verja þá hags-
muni Suðurnesja að hitaveitan, sem
sé eitt öflugasta fyrirtæki á svæð-
inu, verði áfram á sama stað og allar
forsendur séu til þess. „Við vorum
mjög ánægð með það í samstarfi við
Geysi Green Energy að hjá þeim er
fullur skilningur og vilji til þess að
hitaveitan sé hér áfram, vegna land-
fræðilegra aðstæðna og stöðu henn-
ar í samfélaginu hér.“
Heyja varnarbaráttu
Að sögn Gunnars er grundvallar-
atriði fyrir Hafnarfjarðarbæ að
verja sinn hlut og að geta verið
hamlandi á breytingar á samþykkt-
um með því að ná ráðandi hlut. Eng-
in hliðarskilyrði séu sett af þeirra
hálfu um hvort Reykjanesbær kaupi
eða selji. „Okkar afstaða er í raun
alveg skýr, við höfum gefið það í
skyn að við séum að reyna að nálg-
ast 34% hlut og ná ákveðinni sam-
vinnu við stærsta hluthafann, eins
og hefur verið hingað til. Ákvörð-
unin er í raun og veru í hendi
Reykjanesbæjar.“
Árni segir Reykjanesbæ vera í
sterkri stöðu sem mikilvægt sé að
vinna skynsamlega úr og því standi
vilji til að fá sterka samstarfsaðila.
Hafnarfjarðarbær geti í raun ekki
eignast meira en 28% hlut nema sér-
stakir samningar komi til. „Þá þarf
bara að ræða það í rólegheitum. Nú
viljum við klára þetta með forkaups-
réttinn og svo tökum við ákvarðanir
í framhaldi af því, og þar á meðal um
með hvaða hætti Hafnarfjörður hef-
ur áhuga á að starfa með okkur
áfram í Hitaveitunni.“ Hann segist
ekki sjá neitt athugavert við að
einkaaðilar komið að rekstri HS,
heldur telur hann þvert á móti að
þeir séu um margt hæfari en sveit-
arfélög til þess að sinna rekstri
orkuvera.
„Ég er mjög hlynntur hugmynd-
um um samstarf opinberra aðila og
einkaaðila, ég tel að það geti skilað
mjög góðum árangri eins og hefur
sýnt sig,“ segir Árni.
Boltinn hjá bæjarfélögunum
Að sögn Ásgeirs Margeirssonar,
forstjóra Geysis Green Energy, er
málið nú alfarið í höndum sveitarfé-
laganna og fyrirtækið því í raun í
biðstöðu. Geysir Green Energy hafi
ekki nein yfirlýst markmið um hve
stóran hlut það vilji eignast. „Við
buðum bara í 15% hlut ríkisins og
svo fór einhver hringiða af stað um
að fleiri vildu kannski selja. Við lýs-
um okkur tilbúin til að kaupa það
sem menn vilja selja og höfum ekki
sett pressu á neinn.“
Hitaveitan í öruggum
sessi Reykjanesbæjar
 Forkaupsréttur að hlut ríkisins í Hitaveitu Suðurnesja rennur út á morgun
 Reykjanesbær er stærsti hluthafi og hefur úrslitavald um kaupin
Í HNOTSKURN
»Hitaveita Suðurnesja á ogrekur tvö orkuver sem bæði
nýta jarðgufu. Svartsengi sem
hóf starfsemi 1976 og Reykjanes-
virkjun sem hóf starfsemi 2006.
»Nýti bæði bæjarfélög for-kaupsrétt sinn á hlutunum
mun hann eiga rúm 70% í HS en
Hafnarfjarðarbær tæp 30%
Árni
Sigfússon
Gunnar
Svavarsson
Ásgeir
Margeirsson
Morgunblaðið/Helgi Bjarnason
Reykjanesvirkjun „Það er enginn ótti í okkur, hitaveitan fer ekki frá okk-
ur og við erum í öruggum sessi,“ segir Árni Sigfússon bæjarstjóri.
♦♦♦