Skinfaxi - 01.10.1997, Blaðsíða 32

Karlalið Selfyssinga í handbolta féll í 2. deild í fyrra eftir mikla
rimmu við ÍR-inga um fallsætið. Selfossliðið má muna sinn fífil
fegurri en eins og menn muna voru þeir með eitt öflugasta
handknattleikslið landsins fyrir nokkrum árum. Hornamaðurinn
snjalli, Björgvin Rúnarsson, hefur leikið með liðinu undanfarin ár
og þrátt fyrir að liðið félli í fyrra ákvað Bjöggi að vera áfram á
Selfossi.
„Ég var nú nánast búinn að ganga frá samningi við Víking en
þegar ég sá hversu ákveðnir menn voru í því að koma liðinu aftur
á meðal þeirra bestu snéri ég aftur heim.“ Það gekk ekkert hjá
Selfoss liðinu í fyrra. Lykilmaður var dæmdur í leikbann í upphafi
tímabilsins og í framhaldi af því náði liðið sér aldrei á strik.
„Við vorum með þrumugóðan mannskap en það gekk bara ekkert
upp og það sást best á úrslitaviðureigninni við ÍR um fallsætið.
Við vorum hreint ótrúlega óheppnir í þeim leikjum, leikjum sem
við höfðum alla burði til að vinna.“
Selfyssingar ætla í vetur að snúa bökum saman og komast aftur
á meðal þeirra bestu. Bjöggi er bjartsýnn á veturinn og segir
afturkomu Sigurðar Bjarnasonar hafa verið mikilvæga.
„Við eigum góða handknattleiksmenn út um allt og það var
mikilvægt að fá einhverja stráka aftur heim í staðinn fyrir að
halda áfram að missa efnilega leikmenn." Siggi, bróðir Gústafs
Bjarnasonar, mun taka við þjálfun liðsins en hann lék með
deildarmeisturum Aftureldingar í fyrra og mun án efa styrkja liðið
verulega í vetur.
Mikið að gera
Bjöggi hefur í nokkur ár verið á þröskuldi landsliðsins en alltaf
vantað herslumuninn til að koma sér meðal bestu hornamanna
landsins. Það verður hins vegar að segjast eins og er að ólíklegt
er að Þorbjörn bæti honum í sterkann hóp sinn á meðan hann
leikur í 2. deildinni á íslandi. Er Bjöggi kannski að gefa
handboltann upp á bátinn?
„Ég játa það alveg að fyrirtækið sem ég rek (Álnavörbúðin) og
fjölskyldan taka mikinn tíma og ég get kannski ekki einbeitt mér
að handboltanum eins og ég gerði hérna áður fyrr. Ég er hins
vegar ekkert að hætta í handboltanum og mun áfram spila minn
besta bolta og svo verður bara landsliðsþjálfarinn að meta það
hverju sinni hver sé að spila best. Ég held líka að Þorbjörn sé
búinn að mynda sér ákveðinn hóp og ég sá það í fyrra að ég var
ekki þar inni í myndinni." Bjöggi sagðist jafnframt hafa átt von á
því í fyrra að komast inni í æfingahópinn hjá Þorbirni en þegar
það gekk ekki eftir í fyrra telur hann yngri menn eigi greiðari leið
inn í landsliðið í framtíðinni.“