Skinfaxi - 01.08.2001, Blaðsíða 34

lokaorö
Sveinn Jónsson, formaður
23. landsmótsnefndar UMFÍ 2001
Á nýafstöðnu 23. landsmóti UMFÍ bauð Ungmenna og
íþróttasamband Austurlands (UÍA) til móts við aðstæður eins
og þær hafa bestar verið á Austurlandi fyrr og síðar. Á Austur-
Héraði eru ný eða nýleg íþróttamannvirki en engu að síður
hélt UIA fast við það markmið sitt að einnig skyldi keppt í
nokkrum greinum í nærliggjandi byggðarlögum þar sem
einnig er hin ákjósanlegasta aðstaða í nýjum íþróttahúsum. Á
Egilsstöðum hafði skömmu fyrir mót verið vígður einn
glæsilegasti frjálsíþróttavöllur landsins og hlaut hann heitið
"Vilhjálmsvöllur" í höfuðið á ólympíumeistara staðarins,
Vilhjálmi Einarssyni, sem hreppti silfur í Melbourne 1956. Með
því að dreifa keppni um svæðið vildi ÚÍA sýna að fjórð-
ungurinn hefur af miklu að státa í þessum efnum og það eru
miklar væntingar til þess, að öll þessi aðstaða eigi sinn þátt í að
styrkja byggðina.
Undirbúningur að mótinu hafði staðið lengi og mikil skipu-
lagning og uppbygging átt sér stað til að það gæti farið hið
besta fram. Það ríkti aðeins óvissa um það hvernig veðrið yrði.
Dagana fyrir mótið var veðurspáin ekki upp á það besta,
norðaustan rigning og það yrði kalt. Þegar nær dró glæddust
heldur vonir mótshaldara og væntanlega gesta einnig og þegar
fyrstu gestir fóru að koma sér fyrir voru horfur á að veðrið færi
að lagast. Og viti menn hann hékk þurr alveg fram í mótsslit
en þá var líka eins og hellt væri út fötu. Setning mótsins var
föstudagskvöld við bestu aðstæður, logn og kvöldsólin skein
beint í áhorfendapallana og forseti Islands og ráðherrar
mennta og heilbrigðismála heiðruðu mótið með nærveru sinni.
Heiðursgestur mótsins var Guttormur Þormar í Geitagerði,
sem var stigahæstur einstaklinga á landsmóti á Hvanneyri
1943.
Næturnar voru kaldar á Héraði en engir kvörtuðu enda allir
búnir eins og Islendingum sæmir. Mótsgestir voru fjölmargir
og auk þess að gista á tjaldstæði, sem sérstaklega var útbúið á
Egilsstaðatúni fyrir keppendur og aðstandendur, var allt
gistirými á tjaldstæðum og húsum á svæðinu yfirfullt og bókað
löngu fyrirfram.
Forskráning til keppni var seinni hluta maí og ætla mátti að
keppendur yrðu yfir 2000 en þegar nær dró var sýnt að afföll
yrðu veruleg og alls urðu þeir um 1400. Á mótinu var kepp til
stiga í 17 íþróttagreinum. Undanrásir í nokkrum greinum fóru
fram í nærliggjandi byggðarlögum: á Seyðisfirði í badminton
og boccia, á Neskaupsstað í blaki, á Fáskrúðsfirði í handknatt-
leik og línubeitingu og á Eskifirði og Reyðarfirði í knattspyrnu
á grasvöllum staðanna. Úrslit í þessum greinum voru þó í
flestum tilfellum á Egilsstöðum þar sem allir þættir eftirtalinna
greina fóru fram: bridge, fimleikar, frjálsar íþróttir, glíma,
íþróttir fatlaðra aðrar en boccia, körfuknattleikur, skák, starfs-
íþróttir og sund. Þá var keppt í borðtennis í íþróttahúsinu á
Hallormsstað, hestaíþróttum á keppnissvæði Freyfaxa á
Stekkhólma, golfi á velli Golfklúbbsins í Iandi Ekkjufells, skot-
fimi á skotsvæðinu við Þrándarstaði og íþróttahúsinu á Eiðum.
Sýningargreinar voru nokkrar og gáfu þó ekki stig, siglingar
voru á Lagarfljóti og þótti þátttaka góð, æskuhlaup fyrir
ungmenni á aldrinum 11 -14 ára var á og við íþróttavöllinn á
Egilsstöðum, "Skógarhlaup” fyrir alla aldurshópa var á stígum
í Selskógi, kraftjötnakeppni var í Tjarnargarðinum á
Egilsstöðum og torfærukeppni í malarnámum við Mýnes. Ein
sýningargrein, fjallahjólreiðar í Hallormsstaðaskógi, féll niður
þar sem aðeins einn þátttakandi mætti til keppni.
Fjölmörg met féllu í hinum ýmsu greinum mótsins og margit'
urðu vafalítið til að slá persónuleg met við hinar ákjósanlegu
aðstæður. Það var því mikil gleði sem ríkti hvarvetna alla
mótsdagana. Einnig var boðið upp á fjölbreytilega skemmtan
af ýmsu tagi fyrir alla aldurshópa í Tjarnargarðinum, Vémörk
og víðar um svæðið. Fór það allt hið besta fram. Mótið var
vímulaust og fylgdu því engin vandkvæði nema síður væri.
Á lokadegi mótsins voru úrslit í nokkrum greinum á íþrótta-
vellinum á Egilsstöðum og á sama tíma var þar efnt til
alþjóðlegrar stangarstökkskeppni, þar sem Þórey Edda og Vala
Flosa öttu kappi við tvær bandrískar og eina sænska stúlku-
Reynt var að bæta Islandsmetið en tókst ekki. Áhorfendur
voru með allra flesta móti á íþróttavellinum meðan keppnin
stóð yfir. I kjölfarið fór fram verðlaunaafhending og mótsslit-
Allir verðlaunagripir mótsins voru gerðir af Álfasteini á
Borgarfirði eystra úr austfirsku grjóti.
Landsmótsnefnd þakkar öllum þátttakendum fyrir drengilega
keppni. Gestum öllum er þakkað fyrir ánægjuleg samskipti og
snyrtilega umgengni. Þá þakkar nefndin öllum þeim fjöl-
mörgu sem komu að framkvæmd mótsins, dómurum, sér-
greinarstjórum, aðstoðar- og gæslumönnum. Síðast en ekki
síst þakkar nefndin öllum þeim fjölmörgu sem fjárhagslega
styrktu framkvæmd mótsins með beinum eða óbeinum hætti-
Með landsmótskveðju
Sveinn Jónsson, formaður
23. landsmótsnefndar UMFÍ 2001
34