Menntamál - 01.04.1945, Blaðsíða 18
96
MENNTAMÁL
Halldór GuSjónsson skólastjóri
FIMMTUGUR
Halldór Guðjónsson,
skólastjóri í Vestmanna-
eyjum, er fæddur í Smá-
dalakoti í Flóa 30. apríl
1895. Kennarapróf 1921.
Kennari við Barnaskóla
Vestmannaeyja 1921—39.
Skólastjóri sama skóla frá
1939. Halldór hefur þótt
góður kennari, ötull og
skyldurækinn. Hann hefur
gert sér far um að fylgj-
ast scm bezt með nýjung-
um í starfi sínu. Á árinu
1928 dvaldi hann um skeið
í Danmörku til þess að
kynna sér kennslu í söng og reikningi.
Halldór hefur verið traustur liðsmaður í stéttarsam-
tökum kennara. Minnist sá, er þetta ritar, margra al-
mennra kennaraþinga, þar sem Halldór skipaði forsæti
og stjórnaði umræðum og afgreiðslu mála með lipurð og
skörungsskap. Sómdi hann sér flestum mönnum betur við
þau störf.
Eins og fleiri kennarar hefur Halldór ekki komizt hjá
að sinna ýmsum opinberum störfum. Þannig var hann
t. d. bæjarfulltrúi 1922—25, bæjargjaldkeri 1923—30 og
yfirkattanefndarmaður síðan 1933. Hann hefur einnig
verið skólastjóri iðnskólans. Um öll þessi störf má hið
sama segja og kennslustörfin, að Halldór hefur rækt þau
með alúð og reglusemi. Þau vinnubrögð eru honum töm.