Menntamál - 01.04.1960, Blaðsíða 26
12
MENNTAMÁL
þeim lífið leitt og brenglar heilbrigt uppeldi. Mörgum þess-
um foreldrum myndi kærkomin sálfræðileg aðstoð, og þeir
myndu geta haft ómetanlegt gagn af henni.
Af framanskráðu kann ef til vill að virðast, sem geð-
verndarstöð sé afar lokuð stofnun og sjálfri sér nóg. Fólk
leitar þangað með vandkvæði sín eða barna sinna og fær
viðeigandi lækningu hjá velmenntuðum sérfræðingum,
læknum, sálfræðingum og félagsráðgjöfum. Þagnarskyld-
an veldur því, að almenningur getur ekkert fylgzt með
störfunum og ekkert má berast út frá lækningatímunum.
Rannsóknarniðurstöðurnar eru og einungis ætlaðar sér-
fræðingunum sjálfum, sem nota þær sér til glöggvunar
bæði í fræðilegum og tæknilegum efnum. Rétt er, að stofn-
unin er mjög lokuð, ef einungis er litið á þessi verksvið.
En málið á sér og aðra hlið. Sú geðverndarstöð, sem ein-
angrast í sérfræði sinni, á sér litla framtíð. Til þess að
henni vegni vel, þarf hún að standa í stöðugu sambandi
við fjölda áhrifafólks í geðverndarmálunum. Þetta fólk
er eins konar útverðir stofnunarinnar, verndarar hennar
og milligöngumenn milli þjóðarinnar og stöðvarinnar.
Áhrifafólk er það vegna þess, að sakir afstöðu sinnar á
það greiðan aðgang að fjölda manns, má heita allri þjóð-
inni, og það hefur einstök tækifæri til þess að gera sér
grein fyrir, hvernig andlegt heilsufar er í landinu. Þessa
fólks þarfnast hver geðverndarstöð í ríkum mæli. Það
skapar það andrúmsloft, sem gerir starf sérfræðinganna
nauðsynlegt. Með áhrifafólki í geðverndarmálum á ég
einkum við vissar stéttir manna, kennara, lækna, presta
og hjúkrunarkonur. Starf þessa fólks er að öðrum þræði
geðverndarstarf. Tvær þessara stétta hljóta að verða mjög
nánir samverkamenn geðverndarstöðvar, þ. e. kennarar
og heilsuverndarhjúkrunarkonur. Þær síðarnefndu eru
einu aðiljarnir, sem hafa náið samband við má heita öll
ungbörn og mæður þeirra. Þær eiga þess því kost að kynn-
ast erfiðleikunum, meðan þeir eru alveg á byrjunarstigi