Kirkjuritið - 01.09.1953, Blaðsíða 9

LANDSINS LJÓS
Kvæðaflokkur
eftir séra Helga Sveinsson.
í Passíusálmum og Sólarljóðum
kraup sál vor um nótt yfir heilögum glóðum,
oss dreymdi á krossgöngu kúgunaralda
að kalla vorn upprisumorgun til valda.
í brimgnýsins ógn og í stormsins stunum,
í steikjandi jarðeldsins heiftardrunum,
í hafíssins kurr fyrir héluðum stafni
mörg höfuðlausn ort var í Drottins nafni.
Og treyst var á einn til að afstýra grandi
í ísjakaflóði á Skeiðarársandi,
í eldstraumsins gný yfir eyddum jörðum,
í afspyrnustórhríð í Gönguskörðum,
í hákarlalegum í náttmyrkri og nauðum,
í norðursins brimsæng hjá mánanum dauðum.
Og hrópið var: Róið í herrans nafni,
því himinn vors Guðs er þó enn fyrir stafni.
Með djörfung var eldmessa íslands sungin
um aldirnar himneskum krafti þrungin.
Vor prestur var kynstofnsins kristni andi
og kórinn þeir fátæku í þessu landi.