Eimreiðin - 01.01.1969, Síða 68

50
EIMREIÐIN
menntaskólalöggjafar. Eins og ég hef þegar getið um, er í þessu frum-
varpi lagt til, að þetta ákvæði um lágmarksáaldur sé numið úr lögum.
Miklar umræður hafa átt sér stað um það meðal embættismanna á
sviði fræðslumála og skólamála, hvort æskilegt sé að lækka stúdents-
aldurinn, og ef það sé talið æskilegt, hvernig að því skuli fara.
Menntamálaráðuneytið skipaði á sínum tíma nefnd til athugunar á
þessu máli, og lauk hún störfum. Engrar frekari lagabreytingar er þörf
til þess að lækka stúdentsaldurinn. Rammalöggjöfin um skólakerfi og
fræðsluskyldu er einmitt þannig, að í framkvæmd er hægt að gera þá
breytingu á fræðsluskyldustiginu, sem gæti gert nemendum kleift að
ljúka landsprófi 15 ára í stað 16 ára nú. Skoðanir meðal skólamanna
eru hins vegar talsvert skiptar um það, hvort slíka breytingu ætti að
framkvæma, og þó einkum, hvernig hana ætti að framkvæma. Mennta-
málaráðuneytið mun gera ráðstafanir til þess, að á næsta vetri verði
á fræðsluskyldustiginu hafin tilraun til breytingar á skipulagi fræðslu-
skyldunnar, sem geri nemendum kleift að ljúka landsprófi 15 ára í
stað 16 ára nú. Mun þetta verða gert í trausti þess, að þetta frumvarp
verði að lögum í síðasta lagi á næsta þingi. Hefði ákvæðið um 16 ára
lágmarksaldur til inngöngu í menntaskóla þá verið afnumið, og mið-
skólanemendur þar með getað átt þess kost að ljúka landsprófi 15 ára.
Gætu þeir þá hafið nám í menntaskóla 15 ára gamlir og lokið stúdents-
prófi 19 ára gamlir. Tilraunir í þessum efnum á næsta vetri mundu
geta leitt í Ijós, hvaða framtíðarskipun eða aðferðir í þessum efnum
væru skynsamlegastar.
Þá skal ég að síðustu fara nokkrum orðum um húsnæðismál mennta-
skólanna. Ég hef heyrt þeirri spurningu hreyft, hvort hægt mundi vera
að framkvæma þá breytingu á menntaskólanáminu, sem þetta frumvarp
gerir ráð fyrir, í þeim húsakosti, sem menntaskólarnir hafa nú yfir
að ráða eða er fyrirhugaður. í þessu sambandi verður fyrst að geta
þess, að um áratuga skeið voru húsnæðismál menntaskólastigsins mjög
vanrækt. Menntaskólahúsið við Lækjargötu er meira en hundrað ára
gamalt, og við það var í næstum heila öld engu húsnæði bætt, nema
bakhúsi, sem áður hafði verið fjós. Fyrir um það bil fjórurn áratugum
var Gagnfræðaskólinn á Akureyri gerður að Menntaskóla. Árið 1953
var síðan Menntaskóla komið á fót á Laugarvatni og byggt yfir hann
sérstakt hús. En í höfuðborginni var enn ekkert aðhafzt áratugum sam-
an í húsnæðismálum Menntaskólans. Ekki var það þó af því, að yfir-
menn menntamála eða forvígismenn skólans gerðu sér ekki grein fyrir
nauðsyn aukins húsnæðis, heldur strönduðu framkvæmdir allar fyrst
og fremst á langvinnum deilum um það, hvort menntaskólar í Reykja-
vík skyldu vera einn eða tveir, þ.e. hvort flytja ætti Menntaskólann
við Lækjargötu á annan stað í bænum og þá hvert, en um þrjá staði