Skinfaxi - 01.08.2010, Blaðsíða 21
SKINFAXI – tímarit Ungmennafélags Íslands 21
40 manns tóku
þátt í HSK-göngu
á Bjólfell
HSK tók þátt í verkefninu
Fjölskyldan á fjallið eins og
undanfarin ár. Komið var
fyrir póstkössum á báðum
fjöllunum sem HSK tilnefndi
í ár, þ.e. Bjólfelli og Miðfelli.
Alls tóku 40 manns þátt í
HSK-göngu á Bjólfell í sumar og var Ófeig-
ur Ófeigsson í Næfurholti göngustjóri.
Þegar komið var upp á tind fjallsins fór
að hellirigna en íbúar sunnanlands höfðu
einmitt beðið eftir rigningu svo vikum
skipti. Þrátt fyrir rigninguna tókst öllum
að skrifa í gestabókina og kassanum var
komið fyrir. Kassinn er á tindinum talsvert
innar en þar sem komið er upp á fjallið.
Ingibjörg Sveinsdóttir landfræðingur var
meðal göngumanna. Hún tók „trakk“ af
leiðinni og hægt er að nálgast upplýsingar
um gönguleiðina á slóðinni: www.
wikiloc.com/wikiloc/view.do?id=963409
Guðni Guðmundsson á Þverlæk í Holtum
fór með þessu vísu í göngunni og setti
einnig í gestabókina:
Fjallagolan leikur fislétt um vanga
og fyllir lungun um stund.
Á Bjólfell er gaman að ganga,
gjarnan á skessufund.
Þess má til gamans geta að göngu-
fólkið tók saman eitt lag og var það Táp
og fjör og frískir menn, í tilefni af 100
ára afmæli HSK. Lagið var eitt þeirra sem
sungið var á fyrsta héraðsmóti HSK í
Þjórsártúni fyrir 100 árum.
Gengið á Miðfell 5. júní
Hitt fjallið, sem HSK tilnefndi í verkefn-
ið Fjölskyldan á fjallið, var Miðfell í Hruna-
mannahreppi og var gengið á fjallið 5.
júní, í tengslum við fjölskyldudag UMFÍ.
Frá göngu HSK
á Bjólfell.
Frá göngu HSK á Miðfell.
Helgi á göngu á
Borgarfirði eystri
Ungmennafélag Borgar-
fjarðar, í samstarfi við
Ungmennafélag Íslands
og Ungmenna- og
íþróttasamband Austur-
lands, stóð í sumar fyrir verkefninu Helgi
á göngu. Helgi á göngu er verkefni til
minningar um gönguforkólfinn og ung-
mennafélagann Helga Magnús Arngríms-
son. Verkefnið gekk út á skipulagðar
gönguferðir á vegum sambandsfélaga
UMFÍ, en sá dagur sem var tileinkaður
Helga í ár var 26. júní.
Á Borgarfirði teygði verkefnið sig yfir
hálfa viku. Verkefnið fór af stað á Borgar-
firði eystri að kvöldi 23. júní og var ætlun-
in að ganga á Svartfell. Svartaþoka var og
því hætt við að fara upp á Svartfellið en í
staðinn gengið inn hjá Urðarhólum og
Urðarhólavatni þar sem er ein stærsta
líparítsströnd landsins. Urðarhólar eru
framhlaup innst í Borgarfirðinum og um
þá liggur um þriggja kílómetra stikuð
gönguleið, alveg hæfileg til að skrá sem
göngu dagsins í Hættu að hanga! Komdu
að synda, hjóla eða ganga!. Skyggni í
göngunni var lítið og leiddi Hafþór Snjólf-
ur Helgason göngumenn, sem voru á
þriðja tug, áfram eftir GPS-tæki. Sérlega
gott þykir að fleyta kerlingum á Urðar-
hólavatni. Sett var upp keppni í greininni
þar og vann hana Bjarni Björgvinsson,
lögfræðingur á Egilsstöðum, en steinninn
hans skoppaði átta sinnum á vatninu.
Næstu daga þar á eftir var gengið í
Stapavík, Gönguskörð og Njarðvík. Lagt
var af stað frá Unaósi og gengið út með
Selfljóti að Stapavík en þar er gömul
uppskipunarhöfn. Þeir sem vildu gátu
gengið sömu leið til baka, en leiðsögn
var um gömlu þjóðleiðina til Njarðvíkur
og Borgarfjarðar um Gönguskörð.
Föstudaginn 25. júní var gengið undir
leiðsögn frá Kolbeinsfjöru í Borgarfirði til
Brúnavíkur um Brúnavíkurskarð. Í Brúna-
vík var einstök líparítfjaran skoðuð. Frá
Brúnavík var haldið í Súluskarð, gengið
ofan Hvalvíkur og Kjólsvíkur og áfram til
Breiðuvíkur. Gist var um nóttina í Breiðu-
víkurskála og þar var völdvaka, tónlist
og grill þar sem hver og einn kom með
grillvarning fyrir sig. Öllum var velkomið
að taka þátt í þessari kvöldstund.
Laugardaginn 26. júní var gengið inn
dalinn í Breiðuvík og yfir Víknaheiði sem
þykir einn fegursti fjallvegur á Íslandi. Í
botni Borgarfjarðar var gengið fram hjá
Gæsavötum og um Urðarhóla við Urðar-
hólavatn. Tónleikar með valinkunnum
listamönnum voru haldnir í Fjarðarborg
um kvöldið.
Sunnudaginn 27. júní var létt skoðun-
arferð um Bakkagerðisþorp undir leið-
sögn. Verkefnið þótti takast afar vel.
Helgi á göngu er verkefni til minningar um
gönguforkólfinn og ungmennafélagann
Helga Magnús Arngrímsson. Hér til hliðar
eru svipmyndir þegar gengið var inn hjá
Urðarhólum og Urðarhólavatni.