Ægir - 01.02.1965, Qupperneq 12
38
ÆGIR
magni til þeirra kæmi sér ekki illa fyrir
þá, enda voru saltsíldarbirgðir í Austur-
Þýzkalandi t.d. mjög miklar um þær mund-
ir vegna hinnar miklu síldveiði í Norðursjó
sumarið og haustið 1963.
Heildarsöltunin á vertíðinni varð aðeins
67.046 tunnur (þar af 6.738 tnr. flök).
Á eftirtöldum 3 stöðvum var mest saltað
eða svo sem hér segir:
Reykjavík ............... 21.897 tnr.
Keflavík og nágr......... 21.673 —
Akranes ................. 10.299 —
Fjórar hæstu söltunarstöðvarnar voru:
Bæjarútgerð Reykjavíkur . . 8.360 tnr.
Júpiter & Marz ............ 5.321 —
Haraldur Böðvarsson & Co. . 5.303 —
ísbjöminn h.f.............. 4.726 —
Heildarútflutningur varð aðeins 60.124
tnr. Síldin var seld til Póllands, Rúmeníu,
A-Þýzkalands, Bandaríkjanna, ísrael, Sví-
þjóðar, V-Þýzkalands og Tékkóslóvakíu.
SíldarvertíSin 19 6 U.
Samið var um fyrirframsölu á um
160.000 tnr. og var síldin seld til Sovét-
ríkjanna, Póllands, Rúmeníu, Bandaríkj-
anna, Svíþjóðar, Tékkóslóvakíu, ísrael og
Danmerkur.
Síldveiðarnar hófust að þessu sinni fyrri
hluta október, þó höfðu nokkur skip byrjað
fyrir þann tíma.
Þátttaka í veiðunum var langtum minni
en venja hefir verið undanfarin ár, enda
var veiðin mjög dræm og á sama tíma var
mjög góð veiði á síldarmiðunum úti af
Austfjörðum.
Svo til öll síldin, sem veiddist við Suð-
vesturland, fékkst á miðunum úti af Snæ-
fellsnesi á tímabilinu frá því í október-
byrjun og fram undir miðjan nóvember,
en þá héldu svo til öll skipin á miðin austur
af landinu. Svo til engin síld hefir veiðzt
síðan á hinum venjulegu síldarmiðum við
Suðvesturland.
Skeiðarárdýpissíldin.
Eins og kunnugt er hefir nokkur veiði
verið í Skeiðarárdýpi undanfarið en sára
lítið hefir verið saltað af þeirri síld.
Síld þessi er bæði horuð og misjöfn að
stærð, þó mun unnt að salta a.m.k. hluta
hennar fyrir Rúmeníumarkað, þar sem
síldin fyrir þann markað má vera með
fitumagni allt niður í 10% auk þess sem
Rúmenar samþykkja að taka við mjög
smárri síld.
Enda þótt svo virðist sem unnt sé að
nota Skeiðarárdýpissíldina til söltunar fyr-
ir Rúmeníu, hefir lítið af þessari síld farið
til söltunar, þar sem veiðiskipin fást ekki
til að flytja hana til söltunarhafna á Suð-
vesturlandi sökum fjarlægðar þessara
hafna frá miðunum. Mjög fá skip hafa
tekið þátt í veiðunum nú eftir áramótin
vegna verkfalls sjómanna. Hefur því mest-
um hluta þessarar síldar verið landað í
Vestmannaeyjum, en þar er lítil aðstaða
til söltunar.
Saltaö á Austurlandi uppí suðurlands-
samninga.
Fyrri hluta desembermánaðar sóttu all-
margar söltunarstöðvar á Austurlandi um
leyfi til þess að salta uppí gerða samninga
um Suðurlandssíld, þar sem Austfjarða-
síldin var ekki talin hæf uppí samninga
um Norðurlandssíld. Söltun var leyfð með
sömu skilyrðum og gilda sunnanlands og
vestan. Síldina verður að salta í húsi, þar
sem frosts gætir ekki og geyma verður
hana í upphituðum lagerhúsum eftir söltun
á sama hátt og á Suður- og Vesturlandi.
Þrátt fyrir allgóðan afla á Austfjarða-
miðum, hefir tiltölulega lítið verið saltað
á Austfjörðum vegna fólkseklu og skorts
á hæfu söltunar- og geymsluhúsnæði. Rú-
menar hafa samþykkt, að afgreiða megi
frá Austfjörðum hluta af því magni, sem
samið hefir verið um sölu á til þeirra.
Um miðjan janúar hafði verið saltað í
rúml. 50 þús. tnr., þar af var saltað á
Austfjörðum í um 10.000 tnr. af rúndsíld.