Tímarit lögfræðinga - 01.12.1975, Qupperneq 56

Hátíðardagur Orators var að venju haldinn hátíðlegur 16. febrúar, sem að
þessu sinni bar upp á sunnudag. Dagskrá var með hefðbundnum hætti. Kl.
13.00 var málflutningur í Norræna húsinu og dómsuppsaga á bæjarþingi Ora-
tors. Þá flutti prófessor dr. Gunnar G. Schram erindi um hafréttarmálefni.
Að því loknu tóku frú Sigrún og Matthías Á. Mathiesen fjármálaráðherra á
móti laganemum og öðrum gestum (núverandi og fyrrverandi kennurum laga-
deildar) í glæsilegu hófi í Ráðherrabústaðnum við Tjarnargötu. Um kvöldið
var fagnaður á Lækjarhvammi, Hótel Sögu. Heiðursgestur var frú Auður Auð-
uns fyrrv. ráðherra. Minni Grágásar flutti Þorsteinn Pálsson cand. jur. Fjórir
norrænir gestir sátu hófið, þau Karin Hultén og Jan Wahlström frá Lundi,
Suzanne Vallin frá Gautaborg og Per Flod frá Osló.
Orator tók þátt í störfum Norræna laganemaráðsins og sóttu fulltrúar hans
fundi ráðsins. Einnig átti Orator fulltrúa á seminörum og skemmtunum nor-
rænna lagabræðra og systra í Noregi, Svíþjóð og Danmörku. Eins og fyrr er
getið komu hingað laganemar til hátíðahaldanna 16. febrúar og dvöldust hér
í viku. í nóvember dvöldust hér 3 bandarískir laganemar frá Ohio Northern
University um 3 vikna skeið. Þrír fulltrúar Orators fóru síðan til Ohio í sept-
ember og dvöldust í Bandaríkjunum um 4 vikna skeið.
Á starfsárinu var efnt til 9 vísinda- og kynnisferða, m. a. til Akraness, Þing-
valla, Vestmannaeyja og Viðeyjar. Alþingi var heimsótt tvívegis.
Að lokum má geta þess, að á þessu ári var gildandi reglugerð lagadeildar
breytt nokkuð. Breytingarnar voru þær helstar, að tekið er upp tugakerfi i
einkunnagjöf og lágmarkseinkunnir ýmist hækkaðar eða lækkaðar til þess
m. a. að ná fram betra samræmi í einkunnagjöf og námsmati. Nokkrar um-
ræður og deilur urðu um þessar breytingar, en að lokum voru þær afgreiddar
samhljóða og án andstöðu stúdenta.
Framangreint yfirlit er tekið saman í desember 1975 úr skýrslu stjórnar
félagsins, sem lögð var fyrir aðalfund þess.
Kjartan Gunnarsson
194