Tímarit lögfræðinga - 01.12.1991, Side 9
hluti af heildarmati á sök, eða líkindum fyrir sök. Þá er þessi eini dómur
áfellisdómur, en ekki er að finna beina sýknudóma sem væru e.t.v. fremur til
leiðbeiningar unr gildandi reglur en áfellisdómur.
3. NÝ LÖGGJÖF, LÖG NR. 25, 27. MARS 1991
Eins og áður segir hafa nú verið sett lög um skaðsemisábyrgð, nr. 25/1991.
Frumvarp til þessara laga var fyrst flutt á Alþingi vorið 19901" en varð þá eigi
útrætt, var endurflutt um haustið" og afgreitt sem lög frá Alþingi. Frumvarpið
var flutt af viðskiptaráðherra, en við samningu þess var að verulegu leyti fylgt
lögum um sama efni sem nú hafa tekið gildi í öllum ríkjum Evrópubandalagsins
og flestum EFTA-ríkjunum.12
3.1 Tilskipun Evrópubandalagsins
í júlí 1985 gaf Evrópubandalagið út tilskipun um skaðsemisábyrgð og lagði
fyrir aðildarlöndin að setja löggjöf til samræmis við tilskipunina innan þriggja
ára. Það voru Frakkar sem mest beittu sér fyrir því að ná fram samræmingu á
lögum aðildarríkjanna um þetta efni, en í frönskum rétti hafði ábyrgð framleið-
enda verið mun strangari en í rétti annarra aðildarríkja bandalagsins.
Þetta var ekki fyrsta tilraunin til lagasamræmingar á þessu sviði í Evrópu.
Arið 1977 var á vegum Evrópuráðsins gerður sáttmáli í Strassborg um skaðsem-
isábyrgð vegna líkamstjóns. Þessi sáttmáli kom ekki til framkvæmda og skiptir
vart máli úr því sem komið er.
Með því að um er að ræða tilskipun frá bandalaginu getur komið til þess að
beiting laga einstakra aðildarlanda verði endurskoðuð fyrir Dómstóli Evrópu-
bandalagsins í Luxemborg. Þau ríki utan bandalagsins sem sett hafa lög í
samræmi við tilskipunina eru hins vegar ekki sett undir dómsvald Dómstólsins.
Fróðlegt verður hins vegar að fylgjast með því að hve miklu leyti réttarþróun í
beitingu reglnanna innan bandalagsins hefur áhrif á dómstóla hér og í öðrum
EFTA-ríkjum. Þá kann að verða samið um ýmislegt varðandi samræmda löggjöf
í viðskiptasamningum Evrópubandalagsins og EFTA ríkjanna.13
Samkvæmt tilskipuninni er aðildarlöndunum heimilt að setja sérstakar reglur
um einstakar framleiðsluvörur, og eldri reglur geta haldið gildi sínu. Þetta er
einkum mikilvægt gagnvart bótareglum lyfjalöggjafarinnar í Þýskalandi. í
Vestur-Þýskalandi voru á árinu 1976 settar sérstakar reglur um ábyrgð á tjóni af
10 Alþt. 1989-90, þskj. 904. Mælt var fyrir frumvarpinu og er umræðurnar að finna í dálkum 6157-
6163 í umræðuhluta Alþt.
11 Alþt. 1990-91, þskj. 36. Nefndarálit eru á þskj. 1041 og 1112, en efnislegar umræður í
umræðuhluta í dálkum 604-607.
12 í Noregi lög nr. 104, 23. desember 1988, í Danmörku lög nr. 371, 7. júní 1989, í Þýskalandi
Produkthaftungsgesetz frá 1989.
13 Grein þessari var lokið áður en gengið var frá hinum svonefndu EES-samningum.
231