Búnaðarrit - 01.01.1992, Blaðsíða 96
Á árinu var ég þátttakandi í nokkrum rannsóknarverkefnum í fiskeldi.
Þau helstu eru: samanburður á nokkrum íslenskum bleikjustofnum, vaxtar-
stopp í bleikju og áhrif sveltis á kynþroska í bleikju. Þessi verkefni eru unnin
í samvinnu fjölda aðila svo sem Landssamband fiskeldis- og hafbeitar-
stöðva, Rannsóknarstofnun landbúnaðarins, Veiðimálastofnun og deildir
þeirrar stofnunar á Vestur-, Norður- og Suðurlandi, Hólalax hf., Kirkju-
bæjarskóla, Búnaðarsamband Austurlands, Búnaðarsamtök Vesturlands
og margra fleiri. Öllum þessum verkefnum fylgdi töluverð ferðalög.
Farið var í þrjár utanlandsferðir á árinu. í ágúst fór ég til Noregs á
ráðstefnu ogfiskeldissýningu íÞrándheimi. Þakkaég stjórn Búnaðarfélags-
ins fyrir að veita mér leyfi til þeirrar ferðar. Einnig fór ég til Bretlands í apríl
á stóra matvælasýningu, sem heitir International drinks andfood exhibition,
og var ferðin einnig notuð til að skoða stórverslanir, sem hafa verið að selja
bleikju frá íslandi. í október fór ég síðan á sýningu í Köln í Þýskalandi, sem
heitir ANUGA og er mjög stór matvælasýning. Þar var Fagráð bleikjufram-
leiðenda með upplýsingabás, þar sem bleikja var til sýnis og vandað
kynningarefni, sem dreift var til viðskiptavina. Styrkur frá Framleiðnisjóði
landbúnaðarins gerði mér kleift að fara í tvær síðasttöldu ferðirnar. Enn og
aftur færi ég stjórn sjóðsins bestu þakkir fyrir.
Samstarfið í fiskeldishóp Búnaðarfélagsins hefur verið með miklum
ágætum. Starfið hefur þó borið merki þess ástands, sem er í greininni. Vil ég
þakka félögum mínum í hópnum fyrir mjög gott samstarf.
Góð samvinna var við starfsmenn ýmissa stofnana og samtaka, er fást við
fiskeldismál. „Upplýsingabanki“ fiskeldishópsins stækkar enn og hefur
verið töluvert notaður af ýmsum aðilum. Verður haldið áfram að þróa og
auka þetta upplýsingasafn, og vonandi verður hægt að tölvuvæða hann á
árinu. Þegar er hafið undirbúningsstarf, sem gerir allt upplýsingastreymi
um framleiðslu og slátrun bleikju, frá framleiðendum til ráðunauts og
Fagráðsins, miklu léttara og áreiðanlegra en það er í dag.
Að lokum vil ég þakka stjórn félagsins og starfsmönnum öllum fyrir gott
og ánægjulegt samstarf á árinu.
Ritskrá:
Markaðs- og aðgerðaráætlun. Fagráð bleikjuframleiðenda 1991 (ásamt Hermanni Ottóssyni).
Greinargerð um stöðu bleikjueldis. Búnaðarfélag Islands 1991.
Fiskeldið árið 1991.
Upplýsingar þær, sem hér eru birtar, eru fengnar frá Veiðimálastofnun.
Það skal tekið fram, að þessar tölur eru grófar áætlunartölur og mat á
verðmætum. Verið er að afla endanlegra upplýsinga um þessi mál, og mun
Veiðimálastofnun greina frá þeim, þegar þær eru tilbúnar. Starfsmönnum
Veiðimálastofnunar eru hér með færðar mínar bestu þakkir fyrir þessar
upplýsingar.
94