Fréttablaðið - 13.02.2010, Blaðsíða 38
13. febrúar 2010 LAUGARDAGUR4
„Við vorum að fá kennitölu og
útvega okkur strikamerki; heima-
síða og vefverslun eru líka alveg
að komast á koppinn. Þetta er allt
í startholunum,“ segir Signý Kol-
beinsdóttir hönnuður kampakát.
Hún er nýbúin að stofna fyrir-
tækið Tulipop með vinkonu sinni,
Helgu Árnadóttur. Sú síðarnefnda
er menntuð í viðskiptafræði og sér
um þá hlið rekstursins, að sögn
Signýjar.
Stór gjafakort í myndskreyttum
öskjum og minnisbækur eru á
leið úr smiðju þeirra Signýjar og
Helgu. Auk þess veggfóður og
vegglímmiðar með litfögrum fíg-
úrum og skissubækur með nýjum
mynstrum. „Við verðum í Epal til
að byrja með og eigum eftir að tala
við fleiri búðir,“ segir Signý spurð
um hvar vörurnar verði til sölu.
Fyrsta viðfangsefni þeirra stall-
systra var reyndar að gera páska-
egg í samvinnu við UNICEF,
Barnahjálp Sameinuðu þjóð-
anna. Það kemur í matvöruversl-
anir mánuði fyrir páska. „Rosa
skemmtilegt verkefni,“ segir
Signý og lýsir því nánar. „Þetta
eru minnstu eggin frá Nóa Síríusi,
Gullegg heita þau og eru í álpapp-
ír. Við höfum látið sérútbúa máls-
hætti í þau sem allir snúast um
börn. Eggin verða sett í öskjur sem
ég myndskreyti og ágóði af sölunni
rennur til UNICEF,“ segir Signý.
„Hver askja verður á um 500-kall
og fyrir eina slíka er til dæmis
hægt að útvega fimm skammta
af bóluefni gegn mænusótt fyrir
börn.“ gun@frettabladid.is
Egg til ágóða fyrir börn
Minnisbækur, tækifæriskort og veggskreytingar eru fyrstu framleiðsluvörur hönnunarfyrirtækisins Tulip-
op. Lítil páskaegg í litskrúðugum öskjum koma líka brátt í búðir og verða seld til ágóða fyrir UNICEF.
Skreytingar sem urðu innblástur að fyrstu vörulínunni hjá
Tulipop.
Fossinn heitir þessi mynd Signýjar og kemur við sögu í fram-
leiðslunni.
Helga og Signý í litskrúðugri vinnustofu hins nýja fyrirtækis þeirra, Tulipop. FRÉTTABLAÐIÐ/VILHELM