Fréttablaðið - 27.02.2010, Blaðsíða 70

38 27. febrúar 2010 LAUGARDAGUR
Er pönkið dautt? Nánast. Við erum
að reyna að murka úr því síðustu
líftóruna. Það er reyndar mikill
misskilningur að við séum ein-
hverjir pönkarar. Við erum bara
eins og Mannakorn með aðeins
meira óverdræv á gítarnum.“
Hvernig myndirðu útskýra tón-
list Morðingjanna fyrir hóp af
bláhærðum frúm á Grund? Eins
og Alfreð Clausen og Konni eftir
þrjár könnur af Bragakaffi.
Hver er hápunktur tónlistarfer-
ils þíns til þessa? Koma út þess-
ari blessuðu þriðju plötu Morð-
ingjanna. Við erum allir rosalega
ánægðir með hana og vonum að
hlustendur séu það líka. Það var
líka gaman þegar bassaleikarinn
í Buzzcocks og Frank Stallone
(bróðir Sylvester) ödduðu okkur
á Mæspeis (af fyrra bragði!).
Ef þú værir að taka þátt í
Wipeout, hvað myndirðu þá öskra
áður en þú legðir af stað? Wipeout
er alltof flippað fyrir mig. Ef ég
þyrfti að öskra eitthvað yrði það
eitthvað mjög handahófskennt.
Eða flippað. „Dúfnahólar 10!“
Væri það ekki tilvalið?
Hvað þyrfti að gerast til að þú
tækir þátt í Söngvakeppni sjón-
varpsins? Ekkert stórbrotið, held
ég. En ef Hrafn Gunnlaugsson
bankaði upp á í fötunum sem hann
klæddist í undankeppninni 1986
og bæði mig að taka þátt gæti
ég alls ekki sagt nei. Hvað þá ef
Helgi P. væri með honum og bæði
mig um það á norsku.
Hvar er fallegast á Íslandi?
Mývatnssveitin heillar, sem og
Þingvellir. Suðurnesin heilla ekki
neitt. Sorrí.
Þú færð tímavél upp í hend-
urnar. Hvert stillir þú hana? Ég
myndi stilla á árið 874, ráða mig
í vinnu hjá Ingólfi Arnarsyni, og
hvetja hann til að fara eitthvert
sunnar. Hjálpa honum að finna
Grænhöfðaeyjar til dæmis.
Hver er uppáhaldsmaturinn
þinn? Uppáhaldsmaturinn er í
raun náskyldur þeim mat sem
ég hef hvað mesta andstyggð á.
Hangikjöt og bjúgu hafa áþekkt
bragð og lyktin er sú sama, nema
hvað að hangikjöt er frábært en
bjúgu eru viðbjóður. Má blóta í
Fréttablaðinu? Helvítis fokking
bjúgu!
Uppáhaldsskemmtistaðurinn
þinn? Leiðinlegt fólk skemmtir
sér yfirleitt ekki. Ég fór í bæinn
um daginn. Mér leið eins og
afdönkuðum kotbónda í 10. bekkj-
arpartíi. Langaði bara heim að
horfa á Taggart eða eitthvað.
Hefurðu lent í lífsháska? Nei,
til allrar hamingju. Ég er líka svo
klaufskur að ég myndi aldrei lifa
lífsháska af.
Hver er síðasta uppáhaldsplatan
þín? The Crane Wife, þarsíðasta
plata indífolkpoppsveitarinnar
The Decemberists var fullkomin.
Kom út fyrir fjórum árum síðan
og ég hef ekki heyrt neitt jafn
gott síðan. Eða er kannski verið
að spyrja um eldgamlar plötur
líka? Entertainment með hljóm-
sveitinni Gang of Four. Ekki mörg
ár síðan ég uppgötvaði hana og
við það opnuðust nýjar víddir í
pönksmekk mínum.
Hvað myndi fullkomna líf þitt?
Góð kona. Er það alveg glatað
svar kannski?
Besta bíómyndin? Eyes Wide
Shut, hin alræmda seinasta mynd
Stanley Kubrick, hefur mjakast
ofar á listann með árunum og
trónir held ég bara á toppnum
núna. Ef eintak mitt væri ekki
stafrænt væri það orðið gatslitið
fyrir löngu.
Ef gerð yrði bíómynd um líf
þitt, hvað héti hún, hver leikstýrði
og hver léki aðalhlutverkin? Leik-
skólablús, í leikstjórn Ara Krist-
inssonar. Hann er sjóaður í barna-
myndum og myndi gera lífi mínu
góð skil. Ætli ég yrði ekki leikinn
af Ólafi Darra?
Hvort er skemmtilegra, kreppa
eða góðæri? Það var kreppa hjá
mér í góðærinu þannig að ég hef
ekki tekið eftir neinum breyting-
um. Jú, vínarbrauðið er aðeins
dýrara og svona, en hver étur það
svosem?
Hvað er næst á dagskrá? Við
Morðingjarnir ætlum loksins að
halda útgáfutónleika í tilefni af
plötunni okkar, Flóttanum mikla.
Tónleikarnir eru á skemmtistaðn-
um Batterí, föstudaginn 5. mars,
og þar verðum við í góðu sprelli
ásamt vinum okkar í hljómsveit-
unum Reykjavík! og Jan Mayen.
Eftir það er það svo Aldrei fór ég
suður, og síðan stúdíó þar sem við
munum hljóðrita nýja smelli fyrir
sumarið.
ÞRIÐJA GRÁÐAN
FULLT NAFN OG HVAÐ ERTU
KALLAÐUR: Haukur Viðar Alfreðs-
son og aldrei kallaður neitt
annað en Haukur. Kannski Hauk-
ur feiti, Feitilíus eða Feiti Feit-Feit
þegar ég er ekki á staðnum. Vona
ekki samt.
FÆÐINGARÁR: Ég fæddist árið
1980. Það sama ár dóu Alfred
Hitchcock, John Lennon og KFC-
maðurinn. Annars var þetta ekki
það merkilegt ár. Bara einhver
kaldastríðs-leiðindi, einhverjar
náttúruhamfarir og hlutir að
gerast í geimnum. Voða eitís
eitthvað.
Á HUNDAVAÐI: Ástin, lífið og
baráttan við Bakkus? Nei, það
er ekkert það spennandi. Ég var
ágætlega vel upp alinn í Garða-
bænum, fór í Verzló, nennti
aldrei að læra og fór að glamra á
hljóðfæri. Síðan þá hef ég unnið í
majonesverksmiðjum, á ham-
borgarastöðum og í bókabúðum.
Síðustu tvö ár hef ég unnið á
leikskóla og líkar það ágætlega.
Þó hef ég mest gaman af því
að búa til músík. Ég held ég sé
ágætur í því. Hef verið í fullt af
hljómsveitum en engri jafn lang-
lífri og Morðingjunum.
Hver étur svo sem vínarbrauð?
Hann er kallaður Haukur morðingi af því hann syngur og spilar með Morðingjunum, pönkbandinu með vafasama heitinu. Í
fyrra komu Morðingjarnir með þriðju plötuna sína, Flóttann mikla, og Haukur hefur haft nóg að gera síðustu mánuði við að
fylgja henni eftir. Hann gaf sér þó tíma til að svitna yfir krefjandi spurningum Þriðju gráðunnar í boði Dr. Gunna.
HAUKUR VIÐAR ALFREÐSSON, MORÐINGI „Eins og Alfreð Clausen og Konni eftir þrjár könnur af Bragakaffi.“ FRÉTTABLAÐIÐ/ANTON