Fréttablaðið - 15.04.2010, Blaðsíða 34

15. APRÍL 2010 FIMMTUDAGUR2 ● fréttablaðið ● sófar
● KYSSILEG HÆGINDI Varir kvenna hafa löngum þótt kynþokka-
fullar. Því er ekki að furða að kyssilegar varir verði hönnuð-
um innblástur og birtist jafnvel sem húsgögn á borð við
sófa. Frægasti varasófinn er líklega sá sem spænski lista-
málarinn Salvador Dali hannaði í samvinnu við Oscar
Tusquets árið 1972. Sófinn var ætlaður fyrir hið svokall-
aða Mae West-herbergi á Dalí-safninu í Figueres á Spáni.
Hér má sjá Dalilips-sófann auk nokkurra annarra sófa sem
líkja eftir rauðum vörum.
Í betri stofu hjónanna Kristínar
Steinsdóttur rithöfundar og
Jóns Hálfdanarsonar eðlis-
fræðings stendur forkunnar-
fagur sófi með flauelsmjúku
áklæði. Hann er hluti af setti
sem prýddi heimili sýslu-
mannshjóna á Húsavík á
síðustu öld.
„Ég held að Sigga amma yrði ánægð
ef sófinn hennar birtist á mynd í
blaði,“ svarar Kristín Steinsdóttir
glaðlega þegar kvabbað er í henni
símleiðis um sófamynd og sögu.
Hún kveðst þó því miður ekki geta
verið heima þegar ljósmyndar-
inn verði á ferð en vísar málinu til
manns síns, Jóns. Það er hann sem
tekur á móti blaðamanni og ljós-
myndara og segir svo frá:
„Þessi sófi var alla tíð í búi móð-
ursystur minnar, Sigríðar Víðis
Jónsdóttur og Jóhanns Skaftason-
ar, sýslumanns á Húsavík. Þau
fengu hann í brúðargjöf árið 1930,
ásamt tveimur samstæðum stólum.
Við Kristín tókum Sigríði að okkur
eftir lát manns hennar 1985 og hún
bjó hjá okkur á Akranesi síðustu
árin sín.
Þetta voru mublur sem fylgdu
henni. Við létum bólstra þær upp
þegar hún kom með þær að norðan,
enda var sófinn þá orðinn kviðsíður
og þurfti lækningar við.
Síðar, þegar við fluttum til
Reykjavíkur, létum við setja þetta
brúna áklæði á, sem Sigga amma,
eins og hún var ávallt kölluð á heim-
ilinu, hafði líka með sér í stranga
að norðan.
Okkur finnst þetta fallegur litur
en eigum líka grænt áklæði sem við
getum sett á þegar þetta gengur úr
sér. Við reynum að ganga vel um
þessi gömlu húsgögn en notum þau
samt því þetta er heimili en ekki
safn.“ - gun
Sigga amma yrði ánægð
Jón við sófann sem gefinn var í brúðargjöf, alþingishátíðarárið 1930, ásamt tveimur samstæðum stólum. FRÉTTABLAÐIÐ/GVA
Hlutirnir við stofugluggann eiga sér einnig fortíð. Lampinn er úr búi foreldra Jóns,
Þórnýjar Jónsdóttur og Hálfdáns Eiríkssonar. Styttan er af ömmu Jóns, Jakobínu Jak-
obsdóttur kennara á Eyrarbakka. Hún er eftir Sigurjón Ólafsson, einn af nemendum
hennar. Litlu stólana fengu Jón og Kristín á nokkurs konar götumarkaði í Þýskalandi
á námsárunum. Þeir eru frá 19. öld.
Handverkið er ósvikið á sófanum og
rauðbrúnt áklæðið mynstrað en lunga-
mjúkt viðkomu.
● VÆRÐARVOÐ Nafnið værðarvoð segir allt sem
segja þarf. Hvað veitir meiri værð en að sveipa sig
mjúkri voð þar sem maður slakar á í sófanum góða?
Jafnvel það eitt að sjá fallega ábreiðu í sófanum gefur
því hægindi heimilislegt yfirbragð.
Margar gerðir og misjafnlega þykkar eru til af
værðarvoðum sem henta mismunandi aðstæðum. Þær
hlýjustu eru hreinar ullarvoðir og þær veita ómældan
yl, jafnvel þótt þær séu ekki þéttofnar. En sumir hafa
ofnæmi fyrir ull og þeim er hollara að teygja sig í
flísteppi eða hvað annað sem hentar betur til að halda
hæfilegri hlýju á kroppnum.
● ÞAÐ SEM AUMINGJA SÓFAGREYIÐ MÁ
ÞOLA Sófar lenda í mörgu misjöfnu um dagana eins og
sjá má, en reiknað hefur verið út að meðalendingartími
sófa sé átta ár, einn mánuður og átta dagar.
■ Sófi þarf að þola kröftug hopp barna 587 sinnum.
■ Um dagana þarf hver sófi standa undir 293 rifrildum og
1.300 ástarfundum.
■ Sullað er alls 1.600 sinnum ofan í sófa meðan hans nýtur við.
■ Eigendur finna smápeninga í sófa sínum þrisvar sinnum í
mánuði.
■ Pör kyssast í sófanum tólf
sinnum í mánuði og kela fjórtán
sinnum í mánuði, sem gera
1.174 kossa og 1.369 kelerí
meðan sófinn endist.
■ 489 gestir munu eyða nótt á sófanum og einhver heimilis-
fólksins 293 sinnum eftir rifrildi.
■ 782 gestir munu hvíla rassa sína á sófanum og hann þarf
að þola 391 strákakvöld og 293 stelpukvöld.
■ Heimilisfólkið eyðir að meðaltali fjórum klukkustundum á
dag í sófa sínum.
■ Barn mun missa að meðaltali fjögur leikföng á mánuði bak
við sófann og þrír sokkar munu festast milli sessa.
■ Alls eru þrettán sjónvarpskvöldverðir snæddir í sófanum á
mánuði og eigendur horfa á 1.271 sjónvarpsþætti og 782
kvikmyndir.
■ Börn munu missa mat og drykk niður í sófann 72 sinnum
á ári, en foreldrar þeirra sex sinnum í mánuði.
Útgefandi: 365 miðlar ehf., Skaftahlíð 24, s. 512 5000 l Umsjónarmaður auglýsinga: Hlynur Steingrímsson hlynurs@365.is s. 512 5439