Fréttablaðið - 15.04.2010, Blaðsíða 56

40 15. apríl 2010 FIMMTUDAGUR
tonlist@frettabladid.is
TÓNNINN GEFINN
Trausti Júlíusson
Hljómsveitin Deftones
sendir í maí frá sér plöt-
una Diamond Eyes. Platan
kemur út í skugga hræði-
legs bílslyss sem bassaleik-
ari hljómsveitarinnar lenti í
fyrir tveimur árum.
Diamond Eyes er sjötta hljóðvers-
skífa Deftones og kemur út 4. maí
næstkomandi. Platan er unnin
ásamt bassaleikaranum Sergio
Vega sem gekk til liðs við hljóm-
sveitina eftir að bassaleikarinn
Chi Cheng lenti í hörmulegu bíl-
slysi 4. nóvember árið 2008. Cheng
er við litla meðvitund í dag, en
hann hlaut varanlegan heilaskaða
í slysinu og óvíst er hvort hann
kemst nokkurn tíma til fullrar
meðvitundar.
Deftones var langt komin með
plötuna Eros þegar Cheng slas-
aðist og átti hún að koma út árið
2009. Hljómsveitin ákvað að fresta
útgáfu plötunnar um óákveðinn
tíma þar sem meðlimirnir voru
ekki lengur á sama stað og hún í
tónlistinni. Þeir vísuðu því á bug
að ástand Chengs hefði nokkuð
að gera með frestun plötunnar.
Þar með hófst vinna við Diamond
Eyes.
Nýja platan fylgir eftir hinni
frábæru Saturday Night Wrist
sem kom út árið 2006. Ólíkt flest-
um fyrri plötum hljómsveitarinn-
ar vildi söngvarinn Chino Mor-
eno flytja jákvæðan boðskap á
Diamond Eyes. „Mér finnst ekki
skemmtilegt að hlusta á vandamál
fólks. Mér finnst tónlist skemmti-
leg,“ sagði Moreno í viðtali við tón-
listartímaritið Spin. „Tónlist hefur
verið kæfð í kvörtunum frá því
snemma á tíunda áratugnum. Það
er orðið þreytt. Ég ákvað að byrja
að hlusta á „instrumental“-tónlist
í staðinn fyrir að fara algjörlega í
öfuga átt og hlusta á tónlist Black
Eyed Peas – sem er einfaldlega
asnaleg. Ég syng lítið um sjálfan
mig á þessari plötu. Ég elska lög
sem gera mér kleift að komast hjá
því að vera manneskja og leyfa
mér að syngja um skrýtna hluti
sem tengjast mér ekkert endilega
persónulega. Textarnir eiga að
mála mynd, þannig texta ólst ég
upp við.“
Tónlistarvefurinn Sputnik Music
hefur þegar birt dóm um Diamond
Eyes og sparar ekki lofið. Platan
fær fimm af fimm mögulegum og
blaðamaðurinn Nick Greer segir
síðustu tvær plötur blikna í sam-
anburði. „Ég hélt að Deftones
hefði fullkomnað nýjan hljóm á
Saturday Night Wrist þangað til
ég heyrði Diamond Eyes,“ segir
Greer í dómnum. „Platan fer ekki
aðeins hærra í draumkenndu him-
inhvolfi hljómsveitarinnar, heldur
sameinar hún snilldarlega fagur-
fræðina, frumleikann og hljóminn
sem gerði plötuna White Pony svo
frábæra. … Ég segi í fullri hrein-
skilni að Diamond Eyes sé besta
plata Deftones til þessa.“
atlifannar@frettablaðið.is
Demantsaugu Deftones
MÆTTIR AFTUR Deftones sendi síðast frá sér plötu fyrir fjórum árum, en er nú mætt
aftur með Diamond Eyes.
> Í SPILARANUM
LCD Soundsystem - This is Happening
Trans Am - Thing
Black Francis - Nonstoperotik
Nada Surf - If I Had a Hi-Fi
Broken Social Scene - Forgiveness Rock Record
LCD SOUNDSYSTEM BROKEN SOCIAL SCENE
Yfirmaður plötufyrirtækis
hljómsveitarinnar Blur segir
að hann vilji að sveitin hljóðriti
nýja plötu. Eins og Fréttablað-
ið hefur greint frá gefur Blur
út smáskífu um helgina, það
er fyrsta nýja stöffið frá band-
inu í sjö ár. Þá er þetta fyrsta
nýja efnið sem Blur hljóðritar
með gítarleikaranum Graham
Coxon síðan 1999.
Miles Leonard, forstjóri
Parlophone Records, sagði í við-
tali við BBC 6 að hann vonaðist
til að nýja útgáfan hvetti Blur-
strákana til að taka upp nýja
plötu. „Akkúrat núna erum við
bara hæstánægð með að þeir
hafi viljað taka upp þessa
smáskífu. Hver veit hvað ger-
ist í framtíðinni, það veltur
kannski á viðtökunum sem
þetta lag fær,“ sagði Leonard.
„Ég vona bara, eftir að hafa
heyrt nýja efnið, að hljóm-
sveitin telji sig eiga meira
inni. Við hjá plötufyrirtækinu
teljum það svo sannarlega og
ég efast ekki um að aðdáend-
urnir eru sammála því.“
Og þar með hefur pressa
verið sett á Damon, Graham,
Dave og Alex. Sjáum hvað
setur.
Þrýst á nýja plötu frá Blur
VELHEPPNUÐ ENDURKOMA
Damon Albarn á endurkomutón-
leikum Blur í fyrrasumar. Sveitin
sendir frá sér smáskífu um
helgina og plötufyrirtæki hennar
vill fá stóra plötu í kjölfarið.
The Jam var eitt af stóru nöfnunum í breska pönkinu. Plötur eins og
In the City, All Mod Cons og Setting Sons voru á meðal þess besta sem
þaðan kom og standa vel fyrir sínu enn í dag. Aðalsprauta Jam var
Paul Weller. Hann hafði áhuga á fleiri tegundum tónlistar og leysti
sveitina upp árið 1982 til að stofna soul-popp bandið Style Council. Ég
verð að viðurkenna að þar missti ég áhugann og hætti að fylgjast með
honum.
Fyrir tveimur árum heyrði ég hins vegar sólóplötuna hans 22
Dreams. Snilldarplata sem sýndi að enn var kraftur í karlinum. Árið
sem fylgdi útkomu hannar var viðburðaríkt ár hjá Weller. 22 Dreams
fékk mjög góðar viðtökur (var meðal annars valin
plata ársins á verðlaunahátíð tímaritsins Mojo) og
tónleikaferð fylgdi. Weller varð fimmtugur í maí
2008 og þegar hann yfirgaf eiginkonuna og flutti inn
til einnar af bakraddasöngkonunum fóru menn að
tala um gráa fiðringinn. Pabbi Wellers, sem lengst af
var einnig umboðsmaðurinn hans, lést svo um
mitt ár 2009 sem fékk mikið á Weller.
Eftir öll ósköpin í einkalífinu vissu aðdá-
endur ekki alveg við hverju væri að búast
næst. En hvað tónlistina varðar var greinilega
engin ástæða til að hafa áhyggjur. Í vikunni
kom út ný Weller-plata, Wake Up the Nation
og hún veldur ekki vonbrigðum. Hún er fjöl-
breytt og full af flottum lögum eins og 22
Dreams, en töluvert harðari og kraftmeiri.
Þessi miðaldra pönkari virðist ætla að eld-
ast sérstaklega vel. Á meðal hljóðfæraleik-
ara á plötunni eru Kevin Shields úr My Bloody
Valentine og gamli Jam-bassaleikarinn Bruce
Foxton sem sýnir gamalkunna takta, en hann
hafði ekki spilað með Weller síðan Jam hvarf
af sjónarsviðinu.
Sumir batna með aldrinum
PLÖTUR DEFTONES
1995 - Adrenaline
1997 - Around the Fur
2000 - White Pony
2003 - Deftones
2006 - Saturday Night Wrist
2010 - Diamond Eyes
Nú er allt í gangi hjá hljómsveit-
inni Blondie. Meðlimir sveitarinn-
ar hafa tilkynnt um tónleikaferða-
lag um Bretland í júní í sumar. Í
sama mánuði lítur ný plata sveit-
arinnar dags-
ins ljós. Nýja
platan á að
heita Panic of
Girls og verður
spennandi að
heyra útkomuna
hjá Debbie Harry
og félögum.
Blondie túrar
DEBBIE HARRY Blondie
er orðið 30 ára gamalt
band.
Alþjóðlegur dagur plötubúðarinnar verður haldinn
hátíðlegur á laugardaginn, þriðja árið í röð. Hugmynd-
in með þessum degi er að fagna þeirri menningu sem
fylgir litlum óháðum plötubúðum sem allir tónlistar-
áhugamenn elska. Hnignun í sölu á tónlist spilar þó
væntanlega mikið inn í að farið var af stað með þenn-
an dag til að byrja með.
„Þessi dagur snýst um þennan félagslega þátt, að
fara inn í plötubúð, spjalla við afgreiðslumanninn,
heyra eitthvað nýtt og hitta fólk,“ segir Ingvar Geirs-
son sem rekur Lucky Records á Hverfisgötu. Ingvar
er að ganga frá tónleikadagskrá í búð sinni á laugar-
daginn. „Ég verð með Weapons klukkan fjögur og svo
getur fólk séð dagskrána á Facebook-síðu búðarinnar,“
segir hann. Ingvar segir að opið verði til 22 þennan
dag og 20 prósenta afsláttur verði af öllu í búðinni.
Í Havarí verða tónleikar með Sóleyju úr Seabear
sem er að gefa út fyrstu sólóplötu sína, kaffi og veit-
ingar og margt fleira. Þá verða pallborðsumræður
þar sem umræðuefnið er Hvað er plötubúð í dag? Hjá
Smekkleysu plötubúð og 12 Tónum hafði í gær ekki
verið tekin nein ákvörðun um dagskrá í tilefni dags-
ins.
Smá líf hefur færst í litlu plötubúðirnar í miðborg
Reykjavíkur undanfarið, til dæmis með auknum vínyl-
áhuga landsmanna. Ingvar hefur rekið Lucky Records
á Hverfisgötu í hálft ár og hefur fengið hrós fyrir gott
vöruúrval. Ingvar segir að það hafi gengið bærilega.
„Það eru margir sem fatta ekki að maður er hérna, en
svo kemur fullt af nýju fólki inn. Það er einhver þróun
í þessu.“ - hdm
Hátíðardagur í plötubúðum
PLÖTUBÚÐAMENNINGU FAGNAÐ Ingvar Geirsson í Lucky
Records heldur upp á Alþjóðlegan dag plötubúðarinnar á
laugardag. FRÉTTABLAÐIÐ/VALLI
PAUL WELLER Gamli Jam-bassaleikarinn Bruce Foxton
spilar með honum á nýju plötunni.