Fréttablaðið - 22.07.2010, Blaðsíða 24

24 22. júlí 2010 FIMMTUDAGUR
Þegar veðrið er gott leggur fjöldi manna leið sína upp
á Esju og er þá venjulega farin
hefðbundin leið upp á Þverfells-
horn eða eitthvað áleiðis í þá átt.
Hundar eru skemmtilegir göngu-
félagar enda oft með miklu meiri
hreyfiþörf heldur en menn. Það er
því hið besta mál að taka þá með
í fjallgöngu. Nú þurfa hundarn-
ir af og til að gera stykkin sín og
hafa hundaeigendur þess vegna
yfirleitt plastpoka með sér til að
hirða upp eftir ferfætlingana. Allt
hið besta mál. Hundarnir kúka oft
á leiðinni upp fjallið og er svona
frekar leiðinlegt að bera kúkinn
upp og niður. Fólkið skilur þess
vegna kúkapokana eftir á vega-
kantinum til að taka þá með á
leiðinni niður.
Allt gott um þetta, nema hvað?
Ósköp er sumt fólk gleymið! Í
dag, mánudaginn 19.7., fór ég
upp á Esju, frekar snemma. Það
var enginn búinn að skrifa sig í
gestabókina uppi á Þverfellshorn-
inu þann dag. Á undan mér var
einungis einn hundur og fólkið
sem átti hann fór að stóra stein-
inum. En kúkapokarnir sem ég
sá á leiðinni voru margfalt fleiri
og sumir greinilega búnir að
liggja þarna lengi. Þrem dögum
áður var ég búin að labba svip-
aðar slóðir og það má segja að ég
sá „marga góða kunningja“ við
vegakantinn.
Nú spyr ég: Til hvers er fólk-
ið að setja hundakúkinn snyrti-
lega í plastpoka þegar það tekur
hann svo ekki með sér niður af
fjallinu? Þá væri margfalt betra
að moka hann undir stein (þó
ekki of nálegt einhverjum læk),
leyfa honum að breytast í lífræn-
an áburð sem kæmi kannski ein-
hverjum gróðri að gagni. Hunda-
kúkur í plasti er miklu lengur að
eyðast og mun „skreyta“ leiðina
upp á Esju í mörg ár.
Nema hundaeigendunum finn-
ist þetta fallegt og þeir vilji setja
sínum hvutta minnismerki. Þeir
ættu þá að setja vel sýnilegan
miða með kúkapokanum. Á honum
gæti til dæmið staðið: „Á þessum
fallega stað kúkaði Snati þann 18.
júlí 2010“. Eða „Verðlaunatíkin
mín hún Lubba hafði hér sérlega
góðar hægðir“.
En ég var með poka á mér og
tíndi upp gleymdu hundapokana
á leiðinni niður. Það sem pirr-
ar manninn á maður að reyna
að breyta og bæta. Þegar ég var
komin með 15 stykki hætti ég að
telja.
Í lokin verð ég að segja að
fyrir utan kúkapokana var sára-
lítið rusl á leiðinni. Heimurinn
batnandi fer.
Hundakúkur á Esjunni
Út er komin, í samvinnu For-lagsins og Barnaverndarstofu,
bókin Illi karl en hún fjallar um
ofbeldi á heimilum og er öðruvísi en
allar aðrar bækur sem ég hef lesið.
Þó hef ég lesið aragrúa af bókum
sem fjalla um ofbeldi á heimilum.
Bókin fjallar um Boga litla sem
býr með mömmu sinni og pabba sem
báðum þykir vænt um hann og um
illa kall sem stundum tekur völdin
af pabbanum og stjórnar heimilinu
með harðri hendi. Hún fjallar því
meðal annars um áhrif heimilisof-
beldis á börn en börn á ofbeldisheim-
ilum eru okkur í Kvenna athvarfinu
hugleikin. Á undanförnum fimm
árum hafa þrjú hundruð og fjörutíu
börn dvalið í Kvennaathvarfinu í allt
frá einum degi upp í hundrað fjöru-
tíu og þrjá daga. Börnin koma með
mæðrum sínum vegna þess að dvöl-
in heima er óbærileg vegna ofbeldis
af hálfu heimilismanns eða einhvers
annars tengdum fjölskyldunni. Þau
bera heimilisaðstæður ekki endi-
lega utan á sér og eru almennt bara
eins og aðrir krakkar. Þau eru ýmist
hlýðin eða óhlýðin og þau hleypa
lífi í tilveruna í athvarfinu eins og
krakka er siður. Þau eiga það til að
dreifa dótinu sínu um húsið, mylja
kex á gólfin, detta í stiganum og
standa upp aftur. Þau hafa lag á að
heilla starfskonurnar upp úr skón-
um og flækjast fyrir þeim í leið-
inni. Þeim finnst gaman að fara í
Húsdýragarðinn, í keilu og að gefa
öndunum. Sumum finnst ævintýri
að fara í strætó en fyrir öðrum er
það í meira lagi hversdagslegur
viðburður. Sum tala um ofbeldið en
önnur minnast ekki á það einu orði.
Oft missa þau þó eitthvað út úr sér
sem gefur til kynna að ýmislegt
hefur gengið á. Eins og drengurinn
sem kom til enn einnar dvalarinnar
og heilsaði með þeim orðum að þau
ætluðu að gista aftur því pabbi væri
svo reiður. Og bætti svo við „út af
því að við gerum aldrei neitt rétt“.
Þau hafa búið við aðstæður sem
eru ekki mönnum, hvað þá litlum
mannabörnum, bjóðandi. Og þess-
um aðstæðum, eða í það minnsta
aðstæðum sumra þeirra, lýsir bókin
Illi kall svo vel. Þar kemur fram að
stundum leikur allt í lyndi heima hjá
Boga en svo breytist allt og pabbi
hættir að vera pabbi, mamma hættir
að vera mamma og Bogi reynir að
fylga reglum í leik sem engar regl-
ur gilda í. Hann reynir að hafa
ekki hátt og reita engan til reiði og
mamma reynir að koma honum í
skjól á heimili þar sem ekkert skjól
er að finna. Svo dettur allt í dúna-
logn en heimilislífið snýst áfram
um ofbeldið, að tína upp brotin og
lina þjáningar pabbans sem iðrast
nú sárlega. Að fara varlega til að
ósköpin dynji ekki á aftur.
Boðskapurinn í sögunni er sá að
ofbeldi er ekki einkamál hverrar
fjölskyldu, að það er ekki leynd-
armál þeirrar tegundar sem best
sé að þegja yfir heldur einmitt hið
gagnstæða. En við fullorðna fólkið
verðum að hafa í huga að ábyrgð-
in er okkar og að við verðum að
leggja okkur eftir því að hlusta
eftir sögðum orðum og ósögðum.
Að vera þess minnug að á sumum
heimilum ríkir styrjaldarástand
þó að flestir pabbar séu alltaf, en
ekki bara stundum, eins og Boga
pabbi, „indælir eins og epli á borði
og rúsínur í gulri skál“.
Börn í Kvennaathvarfinu
Samfylkingin og Besti flokkur-inn hafa myndað meirihluta í
borgarstjórn Reykjavíkur, félags-
hyggjustjórn. Jón Gnarr lýsti því
yfir að Besti flokkurinn ætti frem-
ur samleið með Samfylkingunni
en öðrum flokkum enda aðhyllt-
ist Besti flokkurinn félagshyggju
eins og Samfylkingin. Jón Gnarr
er borgarstjóri en Dagur B. Egg-
ertsson er formaður borgarráðs.
Ég hygg, að gott jafnvægi sé milli
þessara tveggja leiðtoga stjórnar-
flokka borgarinnar.
Bæta á hag þeirra verst settu
Í málefnasamningi nýja meirihlut-
ans kennir ýmissa grasa og áhrif
Besta flokksins eru greinileg. En
mestu máli skiptir, að sjónarmið
félagshyggju koma skýrt fram.
Nýi meirihlutinn ætlar að bæta
hag þeirra, sem verst eru stadd-
ir með auknum framlögum frá
félagsþjónustunni og aðstoða á
útigangskonur, fá þeim húsaskjól.
Stefnt er að því að hækka fram-
færsluviðmiðið. En stærsta málið
er auknar ráðstafanir Reykjavík-
urborgar til atvinnuaukningar, t.d.
með auknum viðhaldsverkefnum.
Meirihlutinn ætlar að stöðva
útþenslu borgarinnar og þétta
byggðina. Útþensla borgarinn-
ar er gífurlega kostnaðarsöm og
það má spara mikið fé með því að
þétta byggðina. Taka á Vatnsmýr-
ina smátt í smátt í notkun, í byrj-
un undir sérstök verkefni, sem
tengjast rannsóknar- og þekking-
arverkefnum. Síðar er stefnt að
íbúðabyggð í Vatnsmýri.
Sameining og fækkun nefnda
Nýi meirihlutinn boðaði strax
við valdatöku sína sameiningu og
fækkun nefnda. Ákveðin verkefni,
sem áður heyrðu undir nefndir
verða færð undir borgarráð. Síðar
er ætlunin að sameina stofnanir.
Oddný Sturludóttir verður for-
maður menntaráðs og fer m.a. með
grunnskólamál og leikskólamál.
Besti flokkurinn fær formennsku
í stjórn Orkuveitu Reykjavíkur.
Björk Vilhelmsdóttir frá Sam-
fylkingunni er formaður velferð-
arráðs. Og Hjálmar Sveinsson er
formaður stjórnar Faxaflóahafna.
Nýja stjórnin boðaði, að fram færi
nákvæm athugun á fjármálum og
fjárhagsstöðu Orkuveitunnar.
Hanna Birna Kristjánsdóttir
er forseti borgarstjórnar. Nýi
meirihlutinn kom sér saman um
að bjóða minnihlutanum þetta
embætti og innsigla þannig ný
vinnubrögð í borgarstjórn þ.e.
aukið samstarf milli meirihluta
og minnihluta. Sóley Tómasdóttir
frá VG verður fyrsti varaforseti
borgarstjórnar. Björk Vilhelms-
dóttir (SF) verður annar varafor-
seti. Auk þessa fær minnihlutinn
einnig formennsku í nefndum.
Þetta hefur ekki áður gerst í
borgarstjórn, þ.e. að meirihlutinn
léti minnihlutann fá veigamikil
embætti. Hér er því um söguleg-
an atburð að ræða í sögu borgar-
stjórnar og verður það væntanlega
upphaf að bættum og betri vinnu-
brögðum. Meirihluti og minnihluti
munu væntanlega vinna saman að
brýnum verkefnum í þágu borg-
arbúa. Of snemmt er að spá um
hvernig nýja meirihlutanum mun
ganga en hann hefur mörg góð
áform á prjónunum. Lítið er sagt
um fjármál í stefnuskránni og því
ekki vitað hvort útsvörin verða
óbreytt eða ekki.
Þriðja félagshyggjustjórnin
Hinn nýi meirihluti í Reykjavík
er þriðja félagshyggjustjórnin í
borgarstjórn eftir meira en hálfr-
ar aldar valdaskeið Sjálfstæð-
isflokksins í borginni. Fyrsta
félagshyggjustjórnin komst til
valda í Reykjavík árið 1978. Það
var meirihluti Alþýðuflokksins,
Alþýðubandalagsins og Fram-
sóknarflokksins. Alþýðuflokkur-
inn hafði 2 borgarfulltrúa, Alþýðu-
bandalagið 5 og Framsókn var
með 1. Ég var þá oddviti Alþýðu-
flokksins í borgarstjórn. Sam-
komulag náðist milli flokkanna
um samvinnu á mjög skömmum
tíma. Ég lagði til strax í upphafi,
að samvinnan yrði á jafnræðis-
grundvelli þrátt fyrir, að flokk-
arnir væru misstórir að borgar-
fulltrúatölu. Það var samþykkt.
Þetta þýddi að völdum og áhrifum
var skipt jafnt. Þess vegna fengu
allir 3 flokkarnir 1 fulltrúa hver
í borgarráði og þannig var jafn-
ræðið milli flokkanna innsiglað
í borgarráði. Ákveðið var að for-
mennska borgarráðs „roteraði“ á
milli flokkanna. Alþýðuflokkur-
inn fékk formennsku í borgarráði
fyrsta árið. Oddviti Alþýðubanda-
lagsins varð forseti borgarstjórn-
ar, oddviti Alþýðuflokksins 1.
varaforseti og oddviti Framsókn-
ar 2. varaforseti. Nefndum og for-
mennsku í þeim var skipt jafnt
milli flokkanna. Meirihlutaflokk-
arnir höfðu unnið saman í minni-
hluta um margra ára skeið og
flutt sameiginlegar tillögur við
afgreiðslu fjárhagsáætlana. Þess
vegna lá sameiginlegur málefna-
grundvöllur fyrir.
Með tilkomu R-listans 1994
komst félagshyggjustjórn öðru
sinni til valda í Reykjavík. Aðil-
ar að R-listanum voru í upphafi
Alþýðuflokkur, Alþýðubandalag,
Framsóknarflokkur og Samtök
um kvennalista. R-listinn var við
völd í Reykjavík í 3 kjörtímabil
eða í 12 ár. R-listinn framkvæmdi
mörg merk umbótamál í Reykjavík
og markaði djúp spor. Ingibjörg
Sólrún Gísladóttir veitti R-listan-
um örugga forustu. Þriðja félags-
hyggjustjórnin í Reykjavík er
síðan meirihluti Besta flokksins og
Samfylkingarinnar, sem nú hefur
tekið við völdum í Reykjavík.
Vonandi gengur samstarf Besta
flokksins og Samfylkingarinnar í
Reykjavík vel. Ljóst er þó að full-
trúar Besta flokksins eru óvanir
stjórnmálum og stjórnunarstörf-
um. Samfylkingin verður að leggja
til reynsluna en Besti flokkurinn
leggur til nýjungar og ný vinnu-
brögð. Síðan er að sjá hvernig til
tekst.
Félagshyggjustjórn í
Reykjavíkurborg
Borgarmál
Björgvin
Guðmundsson
viðskiptafræðingur
Heimilisofbeldi
Sigþrúður
Guðmundsdóttir
framkvæmdastýra
Samtaka um
kvennaathvarf
Oft missa þau þó eitthvað út úr sér
sem gefur til kynna að ýmislegt hefur
gengið á. Eins og drengurinn sem kom
til enn einnar dvalarinnar og heilsaði
með þeim orðum að þau ætluðu að gista aftur því
pabbi væri svo reiður. Og bætti svo við „út af því að
við gerum aldrei neitt rétt“.
Umhverfismál
Úrsúla
Jünemann
kennari
Under Armour Revenant II
HOLTAGÖRÐUM O GLÆSIBÆ O KRINGLUNNI O SMÁRALIND O WWW.UTILIF.IS
miðvikudag í Smáralindinni
fimmtudag í Kringlunni
milli 14:00 - 17:00
ÚTSALA
allt að 50% afsláttur
Sérfræðingur frá Under Armour
veitir aðstoð við val á hlaupaskóm.