Fréttablaðið - 14.08.2010, Blaðsíða 28

28 14. ágúst 2010 LAUGARDAGUR
Skírð til starfans
Það vekur undrun og kátínu að hitta fyrir fólk sem hefur starf og áhugamál sem rímar
við skírnarnöfn þeirra, en jafnvíst að þar kom hænan á undan egginu; eins og nafnið á
undan starfsvali. Þórdís Lilja Gunnarsdóttir rakst á vörð, hafmey, jökul, ösp og geit.
Ég lenti í þessu starfi fyrir einskæra tilviljun, en vissu-lega var sagt í atvinnuviðtalinu að mér mundi teljast
til tekna að heita jafn viðeigandi nafni. Þá hafa margir
spurt hvort ég hafi þurft að taka upp Asparnafnið þegar
ég tók við starfinu, en svo var nú ekki,“ segir Esther Ösp
Gunnarsdóttir, kynningarfulltrúi Skógræktar ríkisins,
sem gegnir starfi sínu frá skógi vöxnum Egilsstöðum.
„Þótt ég sé alin upp við sjóinn á Fáskrúðsfirði sleit ég
barnsskónum líka í skóglendi því foreldrar mínir áttu
sumarbústað skammt frá Hallormsstaðaskógi. Vorið
eftir að ég fæddist var ösp gróðursett mér til heiðurs í
garðinum heima og varð mitt tré, og síðan hefur verið
fylgst með henni vaxa í takt við mig. Reyndar var hún
fljót að fara fram úr mér, en þessi ösp hefur síðan verið
mér hjartfólgin,“ segir Esther Ösp sem var skírð fyrra
nafninu í höfuðið á ömmu sinni.
„Foreldrar mínir eru jafnréttissinnaðir og settust
niður hvort í sínu lagi til að skrifa niður nöfn sem þeim
þóttu falleg sem millinafn. Ösp var í fyrsta sæti hjá
þeim báðum og auðvitað valið. Ég hef því alltaf borið
nafnið með stolti og finnst gaman hve fólk er klókt að
sjá út tenginguna við starfið sem ég á endanum valdi.“
ÖSPIN MÍN HEIMA HJARTFÓLGIN
LAUFUM SKREYTT SKÓGARDÍS Esther Ösp Gunnarsdóttir, kynning-
arfulltrúi Skógræktar ríkisins, kann að klæða sig í réttum starfsanda,
eins og sjá má á iðjagrænu hárskrauti hennar. MYND/ÚR EINKASAFNI
Mér líður alltaf eins og persónu í Andrésblaði og nafn-ið hefur verið brandari hjá vinahópnum í tíu ár,“
segir sunddrottningin Hafdís Erla Hafsteinsdóttir sem
synti til sigurs á fyrsta Íslandsmótinu í sjósundi í fyrra-
sumar.
„Öllum þykir bráðsniðugt að Hafdís sæki í sjóinn, enda
nota ég hvert tækifæri til að synda í söltum sjó og er orðið
hluti af minni upplifun af landinu að henda mér í sjóinn hér
og hvar,“ segir Hafdís, en nafnið merki gyðja hafsins.
Þess ber að geta að Hafdís er fædd undir stjörnumerki
vatnsberans, sem enn eykur á tengsl við hafið.
„Það er svo líka partur af gríninu, fyrir lengra komna.
Útlendingum finnst nafnið stórkostlega fyndið og þegar ég
segi þeim hvað það þýðir halda þeir að ég hafi tekið það upp
í tengslum við sundíþróttina. Þeir hvá því þegar ég segi það
þýða „ocean fairy“ en ég læt þá samt alltaf bögglast í gegn-
um Hafdísi því mér dettur ekki í hug að gefa hugmyndinni
um sviðsnafn undir fótinn. Það er líka svo væmið þannig,
en engin væmni sem finnst í Hafdísi Hafsteinsdóttur.“
HLEGIÐ AÐ GYÐJU HAFSINS
HAFIÐ KALLAR Á HAFDÍSI Hafdís Hafsteinsdóttir segir sjósund virka
eins og hversdagslegt nirvana, eða algleymisástand, því frelsið og
andrenalínkikkið sé einstakt. FRÉTTABLAÐIÐ/GVA
Ég fæ að heyra þetta oft á dag og tek því ekki illa þótt fólk hafi orð á þessari tilviljun, en slæ því
stundum upp í grín að ég hafi verið alin upp frá blautu
barnsbeini til að vinna hér í Heiðrúnu,“ segir Heiðrún
Gunnarsdóttir, starfsmaður í Heiðrúnu, vínbúð ÁTVR
á Stuðlahálsi, en þar hefur hún unnið í tæpt ár við
ómælda gleði viðskiptavina þegar þeir hafa rekið
augun í nafn hennar við vínkaupin. Áður starfaði hún í
vínbúðum ÁTVR á Eiðistorgi og í Kringlunni.
„Áður en hingað kom var ég iðulega spurð hvers
vegna ég ynni ekki frekar í Heiðrúnu, en nú reka við-
skiptavinir upp stór augu þegar krakkarnir á kassanum
í Heiðrúnu kalla: „Heiðrún, geturðu komið aðeins!“ og
spyr í undrun: „Ha? Nú? Er Heiðrún sjálf við?“ Marg-
ir halda því að ég sé hér potturinn og pannan í öllu og
margir spyrja hvort búðin hafi verið nefnd í hausinn
á mér,“ segir Heiðrún hláturmild og bætir við að við-
skiptavinur hafi frætt sig á því að vínbúðinni hafi verið
valin þessi nafngift vegna geitarinnar Heiðrúnar sem
mjólkaði miði fyrir þingheim til forna, en nafnið sé
útpælt af stjórnendum ÁTVR, enda séu höfuðstöðvar
fyrirtækisins á sama stað.
„Mér finnst bara plús ef bros kvikna í hvunn-
dags amstri fólks og hlæ oft með sjálfri mér þegar úr
verður smávegis misskilningur í síma og fólk spyr
hvort þetta sé í Heiðrúnu. „Já, svara ég. „Og hver er
þetta?“ „Þetta er Heiðrún,“ svara ég. „Já, en við hvern
er ég að tala?!“
NÚ, ER HEIÐRÚN SJÁLF VIÐ?
HEIÐRÚN Í HEIÐRÚNU Senn hyllir undir að Heiðrún Gunnarsdóttir
ljúki vaktinni í vínbúðinni Heiðrúnu en þar hefur hún undanfarið
ár leyst af starfssystur sína í fæðingarorlofi. Hún segir marga vilja
sjá hana starfa áfram í Heiðrúnu, enda viðeigandi. FRÉTTABLAÐIÐ/GVA
Þetta er alvöru nafn þótt margir haldi að ég heiti því ekki í raun heldur hafi tekið það upp sem sviðsnafn
eins og hver annar strippari,“ segir fjallaleiðsögumað-
urinn Jökull Bergmann, sem um var sagt, ungan og
stefnandi til fjalla, að framtíðin hafi verið ráðin með
nafngiftinni.
„Ég er ættaður frá Klængshóli í Skíðadal á Trölla-
skaga þaðan sem horft er beint á Gljúfrárjökul. Móðir
mín hefur alltaf verið heilluð af þessum jökli og gaf
mér því nafnið Jökull, en Bergmann kemur úr fjölskyld-
unni, þótt það vísi einnig fyrir tilviljun á fjöll og nátt-
úru,“ segir Jökull sem ólst upp við útivist og fjallaferðir
með móður sinni og gekk ungur í björgunarsveitir eins
og títt er um ástríðufulla fjallamenn.
„Þar kviknaði fyrir alvöru áhugi á erfiðari fjalla-
mennsku og ég fór að eyða miklum tíma í Ölpunum, ekki
síst í bænum Chamonix við rætur Mont Blanc sem er
kallaður vagga fjallamenningarinnar. Þar sá ég kappa
sem störfuðu sem fjallaleiðsögumenn, fann löngun til að
feta í þeirra spor og lagði til þess stund á tíu ára krefj-
andi nám í Klettafjöllum Kanada,“ segir Jökull sem er
eini Íslendingurinn með alþjóðlega fagmenntun fjalla-
leiðsögumanna að baki, en það þýðir að einn Íslendinga
hefur hann starfsleyfi í Ölpunum þar sem leyfislausir
menn eru sektaðir um 50 þúsund evrur og fá þriggja ára
fangelsi séu þeir gripnir við að leiðsegja fólki á fjöllum.
„Nafn mitt er gulls ígildi við markaðssetningu. Allar
erlendar ferðaskrifstofur sem selja ferðir mínar gera
rosalega mikið úr þessu og þýða nafnið á hin ýmsu
tungumál. Fyrir útlendinga er nafnið því óskaplega
sérstakt og menn gera mikið úr þessu þegar þeir hitta
mig, þótt þeim sé nánast ómögulegt bera nafnið fram,
eins og kom berlega í ljós þegar Eyjafjallajökull gaus,“
segir Jökull og hlær þar sem hann stendur á toppi Mont
Blanc.
„Ég er sannarlega í draumastarfinu á draumastað og
með rétta nafnið til starfans. Nafnið er hins vegar til-
viljun á meðan hitt eru engar tilviljanir heldur aðeins
spurning um að lifa sinn draum sem er eitthvað sem
allir ættu að reyna að gera, sama hvaða nafni þeir
heita.“
FRAMTÍÐIN RÁÐIN MEÐ NAFNINU
Á JÖKUL MEÐ JÖKLI Jökull Bergmann er með fjöll í blóðinu því áar
hans hafa alltaf gengið á fjöll sér til skemmtunar og heilsubótar. Hann
segir nafn sitt hafa jákvæð áhrif á starf hans, þótt fæstir getir sagt það
lýtalaust á hæstu tindum heims.
MYND/GUÐMUNDUR TÓMASSON:©WWW.GTOMASSON.COM
Nafnið hefur verið mér góður förunautur og það hefur oft verið gaman, enda hef ég verið alls konar vörð-
ur,“ segir Vörður Leví Traustason, forstöðumaður Hvíta-
sunnukirkjunnar Fíladelfíu, sem einnig er meistari í bif-
vélavirkjun og hámenntaður lögreglumaður sem starfaði
við lögregluembættið á Akureyri á árunum 1979 til 1992.
„Um tíma leysti ég af sem fangavörður og þá skemmtu
lögfræðingar fyrir sunnan sér við að spyrja: „Vitið þið
hvað fangavörðurinn á Akureyri heitir?“ Sem fangavörður
þurfti ég einnig að fara eftir nýlenduvörum fyrir fangels-
ið í KEA og kvittaði undir kaupin. Þá kom Kristinn gamli
á horninu með bunka af nótum upp á lögreglustöð og var
ægilega óhress með þennan nýja fangavörð sem skrifaði
ekki nafn sitt undir, heldur bara „vörður“,“ segir Vörður
og skellir upp úr við minninguna.
„Í skóla var mér auðvitað strítt en gaf ekki höggstað
á mér þannig að krakkarnir hættu að segja mér að vera
dyravörður. Þegar ég byrjaði í löggunni fyrir norðan hafði
enginn nýr komið í nokkurn tíma, svo þeir spurðu mig:
„Hver ert þú?“ „Ég er Vörður,“ svaraði ég. „Já, það veit
ég! En hvað heitirðu, maður?“ spurðu þeir þá skilnings-
vana,“ segir Vörður sem vegna Leví-nafnsins skrifaði
jafnan Vörður L undir lögregluskjölin.
„Því gekk ég undir nafninu Vörður laganna. Á þessum
árum sáu lögreglumenn um stöðumælasektir og einhvern
tímann var ég í stuði og skrifaði Vörður laganna undir
sektina. Fljótlega kom eigandi bílsins brjálaður upp á stöð
og vildi takk fyrir fá nafnið á þeim sem sektaði hann,“
segir Vörður sem nú starfar í anda nafns síns sem for-
stöðumaður Hvítasunnukirkjunnar. „Þar hefur lögreglu-
starfið hjálpað mér gríðarlega og margt sem ég nýti úr
þeim skóla í kirkjunni.“
Hann rifjar upp fleiri broslegar sögur:
„Þegar NATO-fundur var haldinn í Reykjavík var ég
sendur suður og gerður lífvörður gríska utanríkisráðherr-
ans. Svo man ég eftir samkomu á Ísafirði þar sem mér var
boðið í kaffisopa í heimahúsi á eftir. Þá segir einn voða
spekingslega: „Það er eitt sem ég þarf að vita, Vörður.“ Þá
hváir annar: „Ha? Hefurðu líka verið vitavörður, Vörður?“
VÖRÐUR LAGANNA
VÖRÐUR Í MÖRGUM SKILNINGI Faðir Varðar valdi nafnið eftir að hafa
lesið Davíðssálm 121, en þar segir: „Vörður þinn blundar ekki og sefur
ekki. Hann, vörður Ísraels.“ Vörður merkir hirðir, en Leví þýðir prestur.
FR
ÉT
TA
B
LA
Ð
IÐ
/V
A
LL
I