Fréttablaðið - 15.11.2010, Blaðsíða 37

MÁNUDAGUR 15. nóvember 2010 25
Tónlist ★★★
Here
Anna Halldórsdóttir
Fín lög, frábærar
útsetningar
Anna Halldórsdóttir sendi frá
sér tvær plötur sem þóttu lofa
góðu undir lok síðustu aldar.
Síðan hefur farið frekar lítið fyrir
Önnu, en hún hefur undanfarið
búið og starfað í New York. Þessi
nýja plata, Here, var tekin upp á
íslenskum sveitabæ seint í fyrra.
Öll lög og textar eru eftir Önnu,
en það var Davíð Þór Jónsson
sem sá um upptökustjórn og spil-
aði á flest hljóðfærin. Auk hans
og Önnu komu m.a. við sögu
Sæunn Þorsteinsdóttir sellóleikari
og Ólöf Arnalds sem spilaði á
fiðlu, víólu og charango.
Ég verð að viðurkenna að ég
hafði ekki hugmynd um hverju
ég átti að búast við þegar ég setti
þessa plötu í tækið. Útkoman
kom skemmtilega á óvart. Anna
er fínn lagasmiður og góður
túlkandi og hljóðfæraleikur og
hljómur á Here eru fyrsta flokks.
Tónlistin er róleg og persónuleg.
Hún minnir stundum á Tori Amos
eða jafnvel Kate Bush, en stærsti
kostur plötunnar felst í því hvað
útsetningarnar eru vel heppnaðar.
Þær gefa hverju lagi karakter og
búa til sterka og sannfærandi
heild úr þessum þrettán lögum.
Trausti Júlíusson
Niðurstaða: Tólf árum eftir
síðustu plötu kemur sterk og
persónuleg plata frá Önnu Hall-
dórsdóttur.
Tónlist ★★★
Undraland
Valdimar
Flott frumraun
Hljómsveitin Valdimar bætist í
hóp þeirra íslensku hljómsveita
sem spila lágstemmda tónlist
með reggí/djass-ívafi. Þar eru
auðvitað fremstir í flokki Hjálmar,
ein besta hljómsveit Íslands.
Helsta áskorunin hjá Valdimar var
því að skapa sér sinn sjálfstæða
tón, falla ekki í þá gryfju að apa
upp tuggurnar sem Hjálmar hafa
tuggið. Valdimar virðist hafi tekist
ætlunarverkið að mestu leyti.
Vissulega má finna inni á milli
lagasmíðar sem svipa óneitanlega
til Hjálma. En það er fyrirgefan-
legt á fyrstu plötu. Inni á milli
eru hins vegar frábær lög sem
verðskulda mikið lof. Nægir þar
að nefna Hverjum degi nægir sín
þjáning og svo Yfirgefinn, þétt og
flott lag með glæsilegri bassalínu.
Aðallagahöfundar sveitarinnar,
þeir Valdimar Guðmundsson og
Ásgeir Aðalsteinsson, eru nokkuð
lunknir við að smíða skemmtileg-
ar laglínur og rödd Valdimars er
ákaflega þægileg en um leið kraft-
mikil. Allur tónlistarflutningur er
til fyrirmyndar og þegar á heildina
er litið geta Valdimars-liðar verið
nokkuð stoltir af þessari frumraun
sinni.
Freyr Gígja Gunnarsson
Niðurstaða: Flott frumraun hjá
hljómsveitinni Valdimar sem lætur
vonandi meira að sér kveða í
nánustu framtíð.
„Ég er algjörlega að fíla þetta. Mér finnst
reyndar leiðinlegt að skilja þetta tungumál
ekki,“ segir Jóhannes Haukur Jóhannesson
leikari. Leikgerð hans og Rúnars Freys Gísla-
sonar upp úr einleiknum Hellisbúinn hefur
verið þýdd yfir á kínversku og verður frum-
sýnd á næsta ári. Að sögn Jóhannesar voru
alþjóðlegir rétthafar verksins himinlifandi
með breytingarnar sem þeir tveir gerðu á
verkinu en leikgerð er þegar eitthvað er fært
til í leikverki, atriðum breytt eða einhverjum
bætt við.
Leikgerð Jóhannesar og Rúnars Freys
hefur þegar verið sett upp í Bandaríkjunum
og á Ítalíu og Jóhannes segir um ágætan pen-
ing að ræða fyrir heimilisbókhaldið, allavega
eins og staðan á krónunni er nú. „Þeir buðu
okkur út á frumsýningu og það er nú örugg-
lega ekki ókeypis að koma tveimur leikurum
frá Íslandi til Kína með flugi. En við erum
báðir uppteknir í leikhúsinu, ég í Þjóðleikhús-
inu og Rúnar Freyr í Borgarleikhúsinu, svo
við urðum að afþakka það.“ Jóhannes aftek-
ur hins vegar ekki með öllu að þeir tveir láti
jafnvel slag standa og skelli sér til Kína. „Ég
bíð bara spenntur eftir heimasíðunni.“
Jóhannes áttar sig hins vegar fljótlega á því
að verkið hefur ef til vill þurft að standast rit-
skoðun hjá hinu opinbera eftirliti kínverska
alþýðulýðveldisins og það sé ekki víst að kín-
verskur almenningur sé öllum hnútum kunn-
ugur þegar hlutir eins og Facebook eru bornir
á borð fyrir þá. „Hvað næst? Íslenskur Hellis-
búi í arabalöndunum?“ - fgg
Íslenskur Hellisbúi þýddur á mandarín
TIL KÍNA Leikgerð þeirra Jóhannesar Hauks og Rúnars
Freys hefur verið þýdd yfir á mandarín og því verður
kínverskur Hellisbúi frumsýndur eftir áramót.