Fréttablaðið - 31.12.2010, Qupperneq 51
Við mennirnir erum félagsverur. Allt lífið erum við leitandi að félagsskap, að viðurkenningu, samsömun
og umhyggju. Mismikið, auðvitað og af margvíslegum toga. Fjölskyldan, sem getur í raun táknað heilt
samfélag í víðasta skilningi þess hugtaks, er eitt skýrasta birtingarform þessa eðlis og á jólum og öðrum
hátíðlegum tímamótum leitum við uppruna okkar eða samneytis við þá sem okkur þykir vænt um. Við
komum saman eða hugsum hvert til annars – og ekki síður til þeirra sem horfnir eru. Já, slíkar minningar
kalla gjarnan fram bros, stundum gegnum tár.
Fjölskyldan er það öryggisnet sem tekur við okkur þegar okkur hlekkist á. Og það er þá sem kærleikurinn
verður að geta umborið allt. Ástin, vináttan, æðruleysið, kjarkurinn, víðsýnin og vonin fleyta okkur gegnum
alla erfiðleika og stýra okkur upp í öldu þeirra brotsjóa sem skuggahliðar lífsins ala af sér. Í þessum
gildum finnum við þær rætur okkar sem vaxa frá hjartanu en það er birtingarmynd sálarinnar í þeim
líkama sem við höfum fengið að láni til þess að njóta jarðvistarinnar hér – þess lífs sem hverju okkar er
gefið aðeins einu sinni.
Stundum er sagt að hópar af ýmsu tagi starfi saman sem ein stór fjölskylda. Að þannig geti hver og einn
notið styrkleika sinna og kosta en um leið liðsinnis annarra sem bjóða fram sína eigin styrkleika og kosti.
Þannig upphefji hvert okkar annað og við komum fram sem ein sterk og öflug liðsheild. Slíkir eiginleikar
prýða allar góðar fjölskyldur, hvernig sem þær eru skipaðar.
En til þess að fjölskyldan, vinirnir, samstarfsfólkið eða aðrir geti sameinað styrkleika sína og kosti verðum
við öll að vilja gefa af okkur það sem við höfum fram að færa. Slíkur vilji elur af sér örlætið sem
margfaldast síðan og smitast um alla sali og kima samfélags okkar. En gjaldið sem við greiðum hvert öðru
er aðeins smávægilegrar fyrirhafnar virði:
Eitt lítið bros. Eitt lítið hrós. Eitt lítið takk. Hvatning. Hjálp. Huggun. Eitthvað af þessu eða allt í senn
er sú lífsnauðsynlega næring sem þarf til þess að hver og einn einstaklingur, hver og ein fjölskylda og þar
með hvert og eitt samfélag geti vaxið, dafnað og blómstrað af sínum eigin verðleikum.
Við óskum landsmönnum öllum gleðilegra jóla og farsældar á nýju ári.
Starfsfólk Fjarðarkaupa
Hátíðarkveðja!