Organistablaðið - 01.12.1979, Qupperneq 30

Á síðastliðnu sumri lést Bjarni Bjarnason á Skáney í hárri elli.
Bjarni Bjarnason var einn þeirra manna sem vörðuðu veginn fyrir komandi
kynslóðir og unnu mjög merkilegt brautryðjendastarf.
Ungur nam hann harmoníumleik hjá Brynjólfi Þorlákssyni og hóf strax að leika í
kirkjum í Borgarfjarðarhéraði þegar heim kom. Organistaferill hans í kirkjulegri
þjónustu er sá lengsti sem mér er kunnugt um hér á landi eða rúm sjötíu ár.
Bjarni bjó rausnarbúi að Skáney í Reykholtsdal og munu tónlistarstörf því lengst
af hafa verið unnin í tómstundum. Langa hríð var starfandi Karlakórinn
"Bræður" undir stjórn Bjarna en nafn sitt dró söngflokkur þessi af því, að hver
maður átti þar sinn bróður. Söngflokkurinn kom saman og dvaldi nokkra daga i
senn á Skáney, æfði söng af kappi, og stundum var gripið í búverk um miðjan
daginn því að menn vildu gjarnan "vinna fyrir mat sínum". Nærri má geta að
stundum hefur verið þröngt á þingi með þessu fjölmenni á heimilinu.
Ánægjulegt er til þess að vita að dóttursonur Bjarna heldur nú uppi merki afa
síns, Bjarni Guðráðsson sem nú er organisti í Reykholtskirkju og gengur hann
því brautina, sem Bjarni á Skáney ruddi.
Kjartan Sigurjónsson
30 ORGANISTABLAÐIO