Organistablaðið - 01.01.1989, Blaðsíða 3

Stóri kórinn og strengjasveitin.
Aðventutónleikar á Suðumesjum
12. og 13. des. 1987
Söngfólk sunnan Straums tók sig saman um að halda aðventutónleika á 4
stöðum á Suðurnesjum. Þetta varð 110-130 manna hópur og fékk til liðs 12
manna kammersveit úr tónlistarskólunum á svæðinu. Tónleikarnir voru síðan
haldnir laugardaginn 12. des. í íþróttahúsinu í Sandgerði kl. 16 og Grindavík-
urkirkju kl. 21, en á sunnudaginn kl. 14 í Keflavíkurkirkju og kl. 17 í Ytri-Njarðvík-
urkirkju.
Tíðindamaður blaðsins kom á tónleikana í Keflavíkurkirkju. Þar ríkti mikil
stemning, kirkjan þéttsetin áheyrendum, kórarnir komu inn einn eftir annan og
fluttu lögin sín, ýmist án undirleiks eða með píanóundirleik, en síðast söng stóri
kórinn við undirleik kammersveitarinnar.
Kór Innri-Njarðvíkurkirkju söng fyrst undir stjórn Steinars Guðmundssonar
organista þar, þá kom Kór Ytri-Njarðvíkurkirkju undir stjórn Eiríks Árna Sig-
tryggssonar, og síðast Kór Keflavíkurkirkju undir stjórn organistans, Siguróla
Geirssonar. María Guðmundsdóttir söng einsöng með kórnum. Þáflutti sóknar-
prestur hugvekju og síðan var almennur söngur.
Að loknu smáhléi hófst söngur stóra kórsins, sem byggðist upp á áðurtöldum
kórum auk fólks úr Samkór Grindavíkur og kórum Hvalsness, Kálfatjarnar og
Útskálakirkna. Auk áðurtalinna stjórnenda komu fram Kári Gestsson, sem
stjórnar Samkór Grindavíkur og Frank Herlufsen organisti á Kálfatjörn og
Hvalsnesi. Stóri kórinn söng 7 lög og þar á meðal Aðfangadagskvöld jóla eftir
Sigvalda Kaldalóns í skemmtilegri útsetningu Siguróla Geirssonar. Tónleikunum
lauk svo með lagi G. Fr. Hándel, Lofsyngið Drottni, áheyrendur hurfu ánægðir
hver til síns heima en kórfélagar bjuggu sig undir síðustu tónleika helgarinnar,
sem voru í Ytri-Njarðvíkurkirkju kl. 17.
ORGANISTABLAÐIÐ 3