SunnudagsMogginn - 01.05.2011, Blaðsíða 6
6 1. maí 2011
„Sai Baba var ákaflega eftirminnilegur og heillandi
maður og klárlega eitthvað óvenjulegt við hann,“ segir
Erlendur Haraldsson, sálfræðingur og prófessor em-
eritus, en fáir fræðimenn, ef nokkur, kynntu sér líf gú-
rúsins betur. Erlendur hitti Sai Baba nokkrum sinnum
og skrifaði um hann bók, Miracles Are My Visiting
Cards (1987). Hún hefur komið út á ellefu málum.
Gúrúinn vildi aldrei leyfa fræðimönnum að rannsaka
hæfileika sína í miklu návígi en Erlendur staðfestir eigi
að síður að hann hafi látið ýmsa smámuni, ekki síst
skartgripi, birtast að því er virtist án fyrirhafnar. „Það
merkilega var að þetta var daglegt brauð. Sai Baba gat
látið hluti birtast upp úr þurru allt að tuttugu sinnum á
dag og það var alveg sama hvar hann var staddur. Allt
þetta gaf hann viðstöddum. Þá færði hann mönnum
stundum nákvæmlega það sem þeir báðu um, eða fá-
gæta gripi. Það var mun merkilegra,“ segir Erlendur
sem sjálfur þáði skartgrip að gjöf frá Sai Baba.
Annað sem einkenndi Sai Baba var vibhuti, ellegar
heilög aska, sem hermt er að komið hafi fyrir að hann
hafi hóstað upp meðan hann var yngri. Erlendur upplifði
það ekki en sá öskuna hins vegar oft koma fram úr
höndunum á honum. „Síðan birtist vibhuti oft víðsfjarri
Sai Baba, svo sem á myndum af honum. Ég heimsótti
marga slíka staði og heimili, sá þetta t.d. einu sinni hjá
indverskum manni. Hann átti lífshættulega veika dótt-
ur sem læknaðist eftir að maðurinn bað til Sai Baba. Í
þakklætisskyni fékk maðurinn sér
mynd af honum og það var á þessari
mynd sem vibhuti byrjaði að birtast.
Hann kunni enga skýringu á þessu.“
Erlendur ræddi við fjölmarga,
bæði aðdáendur og gagnrýnendur,
um samskipti þeirra við Sai Baba og
skýrðu þeir frá ýmis konar furðu-
legum fyrirbærum. Var fátt um full-
nægjandi skýringar á undrunum
nema þá hreinar tilgátur. „Vegna
undranna var hann mjög umdeildur maður og margir
töldu þetta einungis töfrabrögð. Ef grannt er skoðað
reynist sú skýring hins vegar vafasöm um margt það
sem gerðist í kringum hann,“ segir Erlendur. Spurður
hvort hann trúi því að Sai Baba hafi verið kraftaverka-
maður svarar Erlendur: „Hafi einhver verið það sem ég
hef hitt, þá var það hann.“
Það eru þó ekki kraftaverkin sem Sai Baba verður
fyrst og fremst minnst fyrir, að dómi Erlendar, heldur
ósérhlífið starf hans í þágu samfélagsins. „Sai Baba
stóð fyrir og boðaði góð gildi og hafði veruleg áhrif á
endurreisn hindúismans á Indlandi. Það er engum
blöðum um það að fletta að hann gerði þjóð sína gjaf-
mildari og tillitssamari í garð náungans en hún hafði
verið. Hann hafði einstakt lag á að virkja fólk til góðra
verka og þegar hann talaði hlustuðu allir.“
Klárlega eitthvað óvenjulegt við hann
Erlendur
Haraldsson
H
ann var sagður kraftaverkamaður.
Hóstaði heilagri ösku og veraldlegir
hlutir eins og armbandsúr, hringar og
hálsmen komu fram úr höndunum á
honum eins og ekkert væri sjálfsagðara. Efa-
semdamenn sökuðu hann alla tíð um sjónhverf-
ingar en fylgismenn hans, milljónir manna, sögðu
gáfuna til marks um guðdóm gúrúsins. Sjálfur leit
hann á sig sem endurholdgun hins fallna trúar-
dýrlings og kraftaverkamanns Shiridi Sai Baba.
Indverjinn Sathya Sai Baba lést fyrir réttri viku,
84 ára að aldri. Hann var mikilsvirtur andlegur
leiðtogi en talið er að fylgjendur hans hafi ekki
verið færri en sex milljónir, líklega mun fleiri.
Hermt er að 1.200 Sathya Sai Baba-miðstöðvar séu
starfræktar í 114 löndum.
Sathyanarayana Raju fæddist í þorpinu Putta-
parthi á Indlandi 23. nóvember 1926 og bar móðir
hans, Eswaramma, að hann væri eingetinn. Strax
á barnsaldri fór það orð af Sathya að hann væri af-
burða vel gefinn og örlátur. Þrettán ára gamall var
hann stunginn af sporðdreka og upp frá því varð
umtalsverð breyting á hegðun hans, Sathya varð
ákaflega tilfinninganæmur, hló og grét á víxl, og
hóf að kyrja kvæði á sanskrít, tungumáli sem hann
kunni ekki áður. Þegar drengurinn lét svo blóm-
vönd birtast upp úr þurru frammi fyrir fjölskyldu
sinni var föður hans nóg boðið. „Hver ertu?“
þrumaði hann. „Ég er Sai Baba,“ svaraði Sathya
pollrólegur. Með þessu átti Sathya við að hann
væri Sai Baba frá Shirdi endurborinn en gamli
gúrúinn og kraftaverkamaðurinn gaf upp öndina
átta dögum áður en Sathya fæddist.
Fékk fjögur hjartaáföll en læknaði sig sjálfur
Kraftaverkið spurðist hratt út og söfnuður tók að
myndast kringum Sathya Sai Baba. Hann lagðist í
ferðalög um héruð og árið 1944 var fyrsta hofið
reist honum til heiðurs í nágrenni Puttaparthi.
Auk þess að fremja kraftaverk og leiðbeina fylgj-
endum sínum gaf Sathya Sai Baba sig snemma að
góðgerðarmálum og árið 1954 stóð hann fyrir
byggingu sjúkrahúss í þorpinu sínu. Árið 1963
fékk Sai Baba fjögur hjartaáföll en tókst, að því er
fylgjendur hans trúa, að lækna sig sjálfur. Alltént
var hann við ágæta heilsu fram á síðustu ár.
Þrátt fyrir mikla hylli víða um lönd yfirgaf Sat-
hya Sai Baba Indland aðeins einu sinni. Skrapp í
heimsókn til Úganda árið 1968. Við það tækifæri
kvaðst hann hvorki vera kominn til að kássast upp
á aðra andlega leiðtoga né safna liði, heldur til að
boða ást og kærleika. Kveikja bál í hjörtum lands-
manna. Engum sögum fer af árangri en ljóst er að
Idi Amin hefur alltént ekki meðtekið boðskapinn.
Heilsu Sathya Sai Baba hrakaði er aldurinn
færðist yfir og síðustu sex ár lífs síns var hann í
hjólastól. Ekki bætti úr skák að Sai Baba lærbrotn-
aði árið 2006 þegar ungur skjólstæðingur hans var
að sýna jafnvægislistir á stól og datt í kjöltu meist-
ara síns. Stóllinn, sem var úr járni, fylgdi á eftir.
Hratt dró af Sai Baba á þessu ári og í lok mars
var hann fluttur á spítala. Hann átti ekki aftur-
kvæmt. Fylgismenn hans þurfa þó ekki að ör-
vænta en Sai Baba var fyrir margt löngu búinn að
lofa að endurfæðast átta árum eftir andlátið …
Indverjar syrgja hinn fallna leiðtoga, Sathya Sai Baba, í vikunni.
Reuters
Gat látið gull og
gersemar birtast
Gúrúinn Sathya Sai Baba var
andlegur leiðtogi milljóna
Vikuspegill
Orri Páll Ormarsson orri@mbl.is
Sathya Sai Baba var dáður víða um heim.
Ömmubakstur ehf.
Kársnesbraut 96a | 200 kópavogi | S: 545 7000
Veljum
íslenskt
gott í dagsins önn...
Ömmu
kleinur
Ömmu
spelt
flatkökur
Ömmu
flatkökur