Fréttablaðið - 29.11.2011, Blaðsíða 5

RÍKISSTJÓRNIN
SVÍKUR ÞÁ SEM
LÖKUST HAFA KJÖRIN
Í maí átti ríkisstjórn Samfylkingar og VG aðkomu að
gerð kjarasamninga. Í viðræðum við ríkisstjórnina
lagði Alþýðusambandið mikla áherslu á að bætur
atvinnulausra og lífeyrisþega myndu hækka í takt við
hækkun lægstu launa og féllust stjórnvöld á það.
Stjórnvöld munu endurskoða bætur almanna-
trygginga með hliðsjón af niðurstöðum kjara-
samninga milli ASÍ og SA, þannig að lífeyrisþegar
og atvinnulausir njóti hliðstæðra kjarabóta og
um verður samið í kjarasamningum.*
Samkvæmt fyrrnefndum kjarasamningum eiga lægstu laun og þar
með bætur að hækka um 11.000 kr. 1. febrúar 2012. Í frumvarpi
ríkisstjórnarinnar sem nú liggur fyrir Alþingi kemur fram að
ríkisstjórnin hyggst brjóta þennan samning við ASÍ. Það þýðir að
atvinnuleysisbætur hækka aðeins um 5.500 kr. en ekki 11.000 kr.
Ríkisstjórnin, sem kennir sig við velferð, ætlar þannig ekki aðeins að
svíkja eigin loforð heldur einnig lítilsvirða þá sem lökust hafa kjörin í
okkar þjóðfélagi.
Alþýðusamband Íslands hafnar endurteknum árásum ríkisstjórnar
Jóhönnu Sigurðardóttur á íslenskt launafólk.
*Yfirlýsing ríkisstjórnarinnar í tengslum við gerð kjarasamninga 5. maí 2011