Teningur - 01.05.1990, Blaðsíða 10

8/SKÁLDSKAPUR
JÓNAS ÞORBJARNARSON
ÞRJÚ LJÓÐ
ANDARTAK OKKAR
YNDI
Ef það er liðið
ef þessi rödd
sem enn talar
um mig og þig
er ekki rödd
en er litir blóma
í sumri án okkar
litir þessara blóma ...
MORGUNKÆLA
Draumur, ferðin var draumur.
En rútan valt
það var raunverulegt
í því slysi voru allir
slegnir í hel.
Ég einn komst af
ég vaknaði
og vaki nú yfir þeim dauðu
í gulnuðu grasi
sem var grænt í nótt;
það er óraleið
til lifandi manna.
Ég er lagður af stað
niður þurran farveg árinnar
ég er lækur
hef farið skammt
það er gaman að seytla um hrjóstrin
og hjala við vorið
gera steinunum hverft við
steinum sem fyrir mér verða
eflaust að hugsa
um ána sem var
landið er stórt
og ræður för en ég uni mér
við að seytla áfram
og yndið eykur mér fjör
ég verð - að skoppa
nei ósköp glápir sólin!
á skallann á jöklinum þarna
sem horfir
á eftir mér skoppa