Austurland - 11.06.1998, Side 6

6
FIMMTUDAGUR 11. JÚNÍ 1998
Sjómannadagurinn var haldinn hátíðlegur með pompi og prakt um helgina og tók tjölmenni þátt
í hátíðarhöldunum. Eins og myndirnar hér á síðunni bera með sér var mikið um dýrðir og boðið
upp á fjölbreytta skemmtidagskrá.
Af úrslitum í keppnum sem haldnar voru í tengslum við daginn má nefna að sveit Bjarts vann
kappróðurinn, sveit Þróttar kvennaróðurinn, sveit frá Boltafélagi Norðfjarðar vann
unglingaróðurinn og sveit frá Vélaverkstæðinu landróðurinn. Sigurvegari í stakkasundinu í ár
var Ólafur H. Sigurðsson sem skrifaði á dögunum um mataræði sjómanna hér í blaðinu og er
Ijóst að þrátt fyrir hið slæma matarræði þá er hann ennþá í feikna góðu formi. í
sjóstangveiðimóti Sjónes var það Ásbjörn Helgi Árnason sem kom með mestan afla að landi.
Fleira var gert til skemmtunar heldur en að keppa í ýmsum greinum tengdum sjónum. T.d.
var boðið upp á flekahlaup, koddaslag og Smári Geirsson sagði frá Vélbátnum Gauta (Hrólfi
Gautrekssyni) sem var bæjarbúum til sýnis í víkinni. Ræðumaður dagsins var Steingrímur J.
Sigfússon. Nýr liður í dagskránni var að veitt var viðurkenning til þeirrar áhafnar sem færði
verðmætasta aflann að landi á síðasta ári, en það var áhöfn Beitis sem hlaut hana að þessu sinni.
Áður en sjómannamessan hófst tlautuðu öll skipin í Norðfjarðarhöfn til að halda upp á það
að 60 ár eru liðin frá því að fyrst var haldið upp á sjómannadaginn.
Ljósm. as & S.Ó.