Ljósmæðrablaðið - 01.11.1979, Blaðsíða 33

LJÓSMÆÐRABLAÐIÐ
81
Minning
Oddný Árnadóttir
Esjubergi Kjalarnesi
Oddnýju ljósmóður fylgdi reisn hvar sem hún fór og
einnig var hún hvers manns hugljúfi.
Oddný lést 2. ágúst s.l. níræð að aldri.
Árið 1921 er Oddný var innrituð í Ljósmæðraskólann
hafði verið gengið hart að henni af heimamönnum í
Kjalarneshreppi að læra ljósmóðurfræði og taka við um-
dæminu, sem þá var ljósmóðurlaust. Þessum mönnum var
ljóst, að til þessa ábyrgðarstarfs þurfti — kjarkmikla, hrausta
og skapfasta konu, en þessum kostum var Oddný búin.
Að loknu námsárinu 1922 tók hún við ljósmóðurumdæmi
í Kjalarneshreppi og gegndi því embætti í nær því hálfa öld,
eða í 48 ár.
Nú þegar Ljósmæðrafélag íslands sér á bak Oddnýju
Árnadóttur kveður það góða og farsæla ljósmóður og einn af
sínum bestu félögum. Félagsmálaáhugi hennar var mikill og
mun hún hafa setið nær því alla aðalfundi félagsins —
ljósmæðrum fannst hið rétta svipmót ekki komið á félags-
fundi fyrr en Oddný var mætt, reisuleg með bjartan og
virðulegan svip klædd sínum íslenska þjóðbúningi.
Á sextíu ára afmælisfundinn á s.l. vori gat hún ekki komið
vegna veikinda og var hennar sannarlega saknað.
Ljósmæðrafélag íslands gerði Oddnýju að heiðursfélaga
sínum árið 1969.
Nú að leiðarlokum vil ég fyrir hönd Ljósmæðrafélags
íslands þakka henni gæfuríkt lífsstarf og kveð hana með
mikilli virðingu.
Steinunn Finnbogadóttir.