Fréttabréf Ættfræðifélagsins - 01.01.1992, Blaðsíða 2

2
AUGLÝST EFTIR ÆTTFRÆÐIRITUM TIL SKRÁNINGAR
Einn af félögum Ættfræðifélagsins, Kristín H. Pétursdóttir,
bókasafnsfræðingur, vinnur nú að gerð og útgáfu skrár um
heimildir í ættfræði. Kristín kynnti stjórn Ættfræðifélagsins
verk sitt á fundi í september. í handriti hennar eru nú um 1200
heimildir, prentuð og fjölrituð rit og greinar. Áður hafa
komið út skrár um sama efni eftir Þorstein Jónsson, ættfræðing:
Heimildir um ættfræði. Rv., 1982, og Eggert Þorbjarnarson,
fornbókasala: íslenzkar ættarskrár. Rv., 2. útg., 1983.
Leitað hefur verið fanga í bókaskrám, spjaldskrám og hillum
bókasafna, heimildaskrám rita og í tímaritum, söluskrám
fornbókasala og eftir ýmsum öðrum leiðum. Hólmfríður
Jakobsdóttir og Óskar Sigvaldason, félagar í Ættfræðifélaginu,
hafa verið Kristínu innan handar í leit að ýmsum smáritum og
Þorsteinn Jónsson, ættfræðingur, hefur veitt aðgang að bókasafni
sínu til skráningar.
í skránni verða fyrst og fremst rit um ættfræði, ættarskrár og
niðjatöl, en einnig manntöl, annálar, ýmsar byggðasögur,
ábúendatöl og skyld verk sem telja má mikilvæg stuðningsrit við
ættfræðirannsóknir. Jafnframt hefur verið reynt að hafa upp á
gagnlegum greinum í tímaritum svo og skrifum um mannanöfn.
Byggðasögur frá Kanada og Bandaríkjunum og ættfræðirit um
Vestur-íslendinga verða einnig í skránni.
Óprentuðum handritum er sleppt nema um meiri háttar samantekt sé
að ræða.
Lýst er efni hvers rits í fáum orðum, taldir upp helstu kaflar,
tekið fram um nafnaskrár.
í skránni verður unnt að fletta upp á höfundi og titli. rits, en
einnig nafni þess eða þeirra sem rakið er frá og fylgir
fæðingardagur og ár, dánardagur og ár. Nafni bæjar sem
viðkomandi er kenndur við, ásamt hreppi og sýslu, nafni ættar,
ef það kemur fram í titli eða fjallað um hana að verulegu leyti.
Hægt verður að fletta upp á starfsheitum, s.s. læknar, prestar,
hjúkrunarfræðingar.
Skráin er unnin í tölvu. Með tilkomu tölvuvæðingar í íslenskum
bókasöfnum ætti hún því að geta orðið hluti af gagnagrunnun
þeirra og þannig aðgengileg ættfræðingum og áhugafólki. Áætlað
er að skráin komi út á þessu ári.
Kristín leitar nú til félagsmanna Ættfræðifélagsins til þess að
fá vitneskju um ýmis rit sem gefin eru út í litlu upplagi og
sjást sjaldan eða aldrei í bókaskrám eða hillum safna eða
bókaverslana. Þetta eru aðallega fjölritaðar ættartölur og
niðjaskrár, oft og tíðum teknar saman í tengslum við
fjölskyldumót eða afmæli og dreift í fáum eintökum. Jafnframt
hefur hún áhuga á að vita af ritum sem komin eru á útgáfustig
og verða gefin út fyrri hluta þessa árs.
Þeir sem áhuga hafa á að aðstoða Kristínu eru beðnir að hafa
samband í síma 12937 (e. kl. 17) eða bréfleiðis. Heimilisfang
hennar er Spítalastígur 1 A, 101 Reykjavík.