Bændablaðið - 07.04.2011, Blaðsíða 24

24 Bændablaðið | fimmtudagur 7. apríl 2011
„Eitt er það að eiga draum, annað
ef hann rætist.“ Þannig segir í
lok kvæðis sem Baldur Ófeigur
Einarsson orti í tilefni af opnun
reiðhallarinnar Kviku í Torfunesi
í febrúar árið 2008. Það hafði
lengi verið draumur Baldvins
Kr. Baldvinssonar ábúanda að
Torfunesi að stunda hrossa-
rækt, svo sem hann hefur gert
á umliðnum árum, en reiðhöllin
sem reist var við Ræktunarbúið
Torfunes fyrir þremur árum bætti
mjög alla aðstöðu til hrossaræktar
á staðnum.
Baldvin á og rekur, ásamt eigin-
konu sinni Brynhildi Þráinsdóttur
og fleirum, Ræktunarbúið Torfunes
í Köldukinn í Þingeyjarsveit.
Brynhildur starfar sem grunnskóla-
kennari á Húsavík en Baldvin starfar
við ræktunarbúið. Torfunesjörðin er
rúmir 500 hektarar af grónu landi, frá
fjalli og niður undir Skjálfandafljót.
Hún hentar vel fyrir hross hvað
varðar gróðurfar og landslag.
Áform um uppbyggingu
sauðfjárbús lögð til hliðar
Baldvin er frá Rangá, næsta bæ
norðan Torfuness, en þar ólst hann
upp og rak félagsbú með föður sínum
fram undir árið 2000.
Á Rangá var blandað bú, bæði
kýr og kindur, til 1975. „Áður en ég
stofnaði félagsbú með föður mínum
fór ég og skoðaði mig aðeins um
og starfaði víða, m.a. sem lögreglu-
maður, en leitaði svo heim á ný,“
segir hann en þau Brynhildur keyptu
jörðina Torfunes árið 1978 og hafa
stundað þar búskap síðan. Þau höfðu
uppi áform um að byggja upp mynd-
arlegt sauðfjárbú á jörðinni á upp-
hafsárunum og hófu byggingafram-
kvæmdir. „En tímarnir þá voru lítið
betri en nú er, óðaverðbólga geisaði
og gerði það að verkum að allar
hugmyndir um uppbyggingu voru
lagðar til hliðar,“ segir Baldvin. Hin
síðari ár hafa ábúendur lagt áherslu á
hrossarækt og tengda þjónustu. „Við
erum með nokkrar kindur okkur til
ánægju og til að komast í gott og feitt
kjöt,“ segir hann og bendir á að ýmis-
legt annað sé óhollara sem fólk lætur
ofan í sig en feitt, íslenskt lambakjöt.
Keypti fyrsta hrossið 10 ára
gamall
Baldvin hefur frá unga aldri haft
mikinn áhuga á hrossum en sitt
fyrsta hross keypti hann aðeins 10
ára gamall, sokkóttu hryssuna Sokku
frá Sólheimagerði, en kaupin voru
gerð i Silfrastaðarétt í Skagafirði. Í
gegnum árin hefur Baldvin ræktað,
alið upp og tamið fjöldann allan af
úrvalshrossum, sem þekkt eru meðal
hestafólks, enda hafa þau mörg hver
unnið til verðlauna fyrir hæfileika
og byggingu.
„Hrossaræktin fór smám saman
að aukast í búskapnum,“ segir
Baldvin. Fjárhúsunum var breytt
í hesthús og nú er á búinu góð
aðstaða fyrir 45 hross í rúmgóðum
stíum. Þá var reiðhöllin Kvika, sem
heitir eftir einni af bestu hryssum
Baldvins, reist norðan við hesthúsið
en í millibyggingu er m.a. aðstaða
fyrir starfsfólk. Fimm manns vinna
að jafnaði við búið, auk Baldvins;
þau Erlingur Ingvarsson og Benedikt
Arnbjörnsson tamningamenn, Baldur
Ófeigur Einarsson, sem hefur starfs-
titilinn „ráðgjafi í stíu“, og Veronika
Lisa Gspandl frá Austurríki, verk-
nemi frá Hólum. Mette Mannseth,
reiðkennari á Hólum, er sérlegur
ráðgjafi búsins og hefur eftirlit með
þjálfun hrossa.
Verður að gera kröfur
ef rækta á úrvalshross
„Ég hélt í eina tíð að þetta snérist
allt saman um fjöldann og var með
mörg hross, mörg þeirra alls ekki
nægilega góð. Svo sá ég ljósið,
þetta snérist ekki um magn heldur
gæði og þá fór ég að skera niður. Ef
markmiðið er að rækta úrvalshross
er ekki um aðra kosti að ræða en
beita hnífnum, skera niður og halda
aðeins því besta,“ segir hann. Stefna
Ræktunarbúsins Torfuness hvað
ræktunina varðar er að ná fram og ala
upp fjölhæf og afkastamikil hross og
er sérstök áhersla lögð á tölt, brokk,
gott geðslag og úrvalsskeið. „Við
veljum einungis kostagripi til rækt-
unar, efnileg og vel ættuð unghross,“
segir Baldvin en frá Torfunesi hafa
komið hæfileikamikil, samvinnuþýð
og traust hross sem eru dugmikil,
léttbyggð og hreingeng. „Við höfum
hug á að fjölga hryssum í ræktun og
okkar markmið er að vera með 15 til
20 úrvalshryssur, fyrstu verðlauna-
hryssur úr Torfunesræktuninni og
það hefur bara mjakast býsna vel,“
segir Baldvin.
Áhersla á fagleg vinnubrögð
„Við leggjum áherslu á að vanda til
verka og stunda fagleg vinnubrögð.
Við erum að vinna með lifandi verur
og það þarf að huga vel að vellíðan
hestsins, allt snýst þetta um að hest-
unum líði vel. Við leggjum líka allt
kapp á góða tamningu og höfum
þann háttinn á, varðandi kaupendur
að okkar hrossum, að þeir komi
hingað áður en hestur er afhentur
og kynnist honum. Við viljum sjá
hvort fólk ræður við það sem það fær
í hendurnar,“ segir Baldvin.
Markaður fyrir hross er að hans sögn
ágætur, innanlandsmarkaður hefur
verið líflegur einkum síðari hluta
árs en þá eru hestamenn gjarnan að
endurnýja hestakost sinn fyrir vetur-
inn. „Mér finnst hafa orðið vakning í
hestamennskunni, áhuginn er mikill
og eftir erfitt ár í fyrra, þegar hesta-
pestin kom upp, er ég bjartsýnn á að
þetta ár verði gott,“ segir Baldvin.
Nánari upplýsingar um Ræktunarbúið
Torfunes er að finna á heimasíðunni
www.torfunes.is.
Gaf út geisladisk í stað veisluhalds
í tilefni af 60 ára afmælinu
„Ég hef lítinn áhuga á að hlusta á lof-
ræður um sjálfan mig,“ segir Baldvin
Kr. Baldvinsson í Torfunesi, sem í
tilefni af 60 ára afmæli sínu á liðnu
ári gaf út geisladiskinn Úr hörpu
hugans. Jón Stefánsson, organisti
og kórstjóri Langholtskirkju, leikur
undir en að auki syngur Kammerkór
Langholtskirkju með. Áður hefur
Baldvin sungið inn á plötu með
Baldri bróður sínum. Sú plata heitir
Rangárbræður og kom út árið 1986
og þá kom diskur með einsöng
Baldvins út árið 1994.
Það má segja að sönglistin sé eins
konar aukabúgrein Baldvins í
Torfunesi. Hann hefur sungið lengi
og víða, enda á hann rætur í ríkri
sönghefð; æskuheimili hans að
Rangá var þekkt fyrir glaðværð og
söng. Baldvin hefur sungið með
ýmsum kórum, í óperuuppfærslum
og söngleikjum í gegnum tíðina og
verið eftirsóttur einsöngvari.
Röddin verður að vera í lagi
Baldvin fór í söngnám til Jóns
Þorsteinssonar söngvara á sínum
tíma og segir það honum fyrst og
fremst að þakka að rödd sín sé eins
og hún er nú. „Jón er góður kennari
og það var dýrmæt reynsla að kynn-
ast honum, hjá honum lærði ég að
bera virðingu fyrir röddinni. Það er
með hana eins og hrossin, að henni
þarf að hlúa,“ segir Baldvin. Flesta
daga er hann að atast í hrossum, oft í
ryki og við erfiðisvinnu, „en ég passa
mig sérstaklega vel áður en ég þarf
að fara að syngja, röddin verður að
vera í lagi.“
Baldvin er sem fyrr segir eftirsótt-
ur einsöngvari og hefur víða komið
fram, til að mynda syngur hann oft
við jarðarfarir og á nýja diskinum eru
mörg laganna einmitt þau sem hann
er hvað oftast beðinn um að syngja
við slíkar athafnir. „En inn á milli eru
líka lög sem ég tók upp úr töskunni,
lög sem ég hef dálæti á,“ segir hann.
Upptökur fóru fram í
Langholtskirkju á fyrri hluta síðasta
árs og kom diskurinn út fyrir jólin
2010. „Hann hefur fengið prýðis-
góðar viðtökur, ég get ekki kvartað
yfir þeim,“ segir Baldvin og nefnir
að með sér hafi verið úrvalsfólk sem
gaman hafi verið að vinna með. „Það
lagði sitt lóð á vogarskálar, þess
vegna er útkoman eins og hún er.“
Diskurinn fæst víða í verslunum en
einnig er hægt að kaupa hann „beint
frá býli“ með því að hafa samband á
netfangið brynth@isholf.is.
Baldvin með systurnar Mist undan Sveini Hervari og Musku undan Gígjari, en móðir þeirra er Mánadís.
Einungis kostagripir valdir til ræktunar hjá Ræktunarbúinu Torfunesi:
Markmiðið að ala upp fjölhæf
og afkastamikil hross
Karen Hrönn, dótturdóttir Baldvins og
Brynhildar á Torfunesi, með hryssuna
Myrru undan Mánadís og Gígjari.

Kristín Hrund, dótturdóttir, með hundinum Torfa.