Kraftur - 01.05.2010, Blaðsíða 3

3KRAFTUR
tÍMaMót
Stórafmæli eru tímamót. Staður og stund
til að líta yfir farinn veg og skoða hvað er
framundan. Við eigum að nýta okkur slík
tímamót til að þakka fyrir hverju hefur
verið áorkað og um leið setja okkur ný
markmið. Stuðningsfélagið Kraftur er 10
ára. Afmælið okkar var í byrjun október.
Afmælisnefnd sem samanstóð af gömlum
og nýjum Kraftsfélögum tók höndum saman
og úr varð eftirminnileg hátíð í alla staði.
Mig langar að byrja þennan pistil minn á því
að þakka öllum sem að undirbúningi komu.
Eftir afmælið urðu stjórnarskipti og tók ég þá
við formennsku félagsins. Miklar breytingar
urðu á stjórninni í heild og með nýju fólki má
vænta þess að félagið gangi í gegnum vissar
breytingar, sem eðlilegt er.

Frá stofnun Krafts hefur margt breyst.
Þjónustan við þá sem greinast með
krabbamein hefur verið bætt til muna.
Krabbameinsfélagið hefur opnað dyrnar
með Ráðgjafarþjónustu sem staðsett
er í Skógarhlíð þar sem aðstaðan er til
fyrirmyndar og er öllum opinn aðgangur.
Ljósið heldur uppi öflugri starfssemi sem
er vel nýtt og er algjör lyftistöng fyrir
margra sem greinast með krabbamein.
Kraftur heldur uppi Stuðningsneti sem
samanstendur af ólíkum einstaklingum sem
eiga það sameiginlegt að hafa greinst með
krabbamein eða eru aðstandendur. Allir
hafa þeir hlotið sérstaka þjálfun í að veita
stuðning. Ég vil taka það sérstaklega fram að
stuðningur býðst ekki eingöngu þeim sem
greinast heldur einnig fjölskyldu og vinum.
Aðgengi að upplýsingum er orðið miklu
betra svo ef á heildina er litið þá virðumst við
vera á grænni grein. Alltaf má þó gera betur
og draumurinn er sá að við getum látið þetta
allt vinna saman í þágu þeirra sem greinast
með krabbamein svo við gætum í raun rétt
einstaklingnum þessa aðstoð og úrræði á
silfurbakka og viðkomandi svo tínt það af
bakkanum sem honum hentar.
Því miður er það nú ekki alveg svo.
Raunveruleikinn er að þú greinist með
krabbamein og ert skyndilega orðinn
sjúklingur. Þú ert dottinn inn í heim sem þig
grunaði aldrei að þú yrðir partur af. Lífið fer
á hvolf. Þú þarft að taka við endalausum
upplýsingum. Þér er rétt nýtt tímaplan
sem þú sérð fram á að þurfa að fara eftir.
Ungt fólk er yfirleitt að gera skemmtilega
og uppbyggilega hluti. Við erum að byggja
upp líf okkar með námi, erum að hefja
starfsferilinn, erum að eignast maka og
svo koma börnin með allri þeirri gleði og
lífsfyllingu sem þau veita okkur. Þessum
undirstöðum sem við höfum haft mikið fyrir
að koma okkur upp er kippt undan okkur og
við vitum ekki alveg hvernig við eigum að
fara að þessu.
Hvað er Kraftur? Hvað stendur félag eins
og Kraftur fyrir? Hvert viljum við stefna og
hvernig getum við markað spor í þágu ungra
einstaklinga sem greinast með krabbamein?
Hver er tilgangurinn með stuðningsfélagi
eins og okkar?
Þetta eru spurningar sem ég hef spurt sjálfa
mig að alveg frá því að ég gekk í félagið
2006. Maðurinn minn hafði þá greinst með
krabbamein og var skyndilega í fullri vinnu við
að vera sjúklingur. Við þurftum að púsla öllu
saman upp á nýtt og lögðum okkur virkilega
fram við það en við þáðum líka alla þá hjálp
sem okkur bauðst. Við nutum stuðnings
frá Krafti og því frábæra fólki sem gaf sér
tíma til að aðstoða okkur. Við nýttum okkur
einnig sálfræðiaðstoð á Landsspítalanum og
fengum hagnýt svör á Ráðgjafarþjónustu
Krabbameinsfélagsins. Hjúkrunarfræðingar
frá heimaðhlynningu Karítas komu til okkar
vikulega. Þegar ég lít til baka þá var í raun
komið stærðarinnar net í kringum okkur sem
veitti okkur mikið öryggi og við vorum aldrei
ein. Í löngu sjúkdómsferli vorum við komin
með heilmikla reynslu í að nýta okkur öll
úrræði sem bjóðast. Að koma sér upp svona
neti krefst heilmikillar vinnu og ég taldi það
eitt af mínum meginhlutverkum í okkar sögu.
Á ákveðnum tímapunkti áttuðum við okkur á
því að við gátum ekki staðið í þessu ein. Ég
er þakklát fyrir að við gerðum okkur grein
fyrir þessu. Við vorum ekki ein og það fólk
sem við settum okkur í samband við hafði
skilning, reynslu og þekkingu til að leiða
okkur áfram. Sjaldan er góð visa of oft kveðin
en á meðan á veikindunum á mínu heimili
stóðu, töluðum við oft um „draumateymi’’
sem við sáum fyrir okkur í fullkomnum
heimi. Teymið okkar var samsett af læknum,
hjúkrunarfræðingum, sjúkraþjálfara, sál-
fræðingi, reynslubolta úr Krafti og öðrum
sem voru að vinna með sjúklinginn hverju
sinni. Þessi ímyndaði hópur hittist reglulega
og tók stöðuna hverju sinni. Allir voru að tala
saman og gefa sitt álit og ekki síst að fá ráð
hver frá öðrum.
Um leið og ég skrifa þetta þá kemur
svar við spurningum mínum um tilgang
stuðningsfélags. Kraftur er orka frá fólki sem
er reynslubanki sem við höfum aðgang að og
því langar mig að nota tækifærið í þessum
pistli til að hvetja fólk til að nýta þau úrræði
sem eru í boði. Þetta er vissulega frumskógur
og oft á tíðum upplifir fólk sig algjörlega eitt í
heiminum. Því er mikilvægt að þessi úrræði
sem nú þegar eru til staðar séu vel sýnileg
og vinni hvert með öðru í þágu þeirra sem
greinast með krabbamein og aðstandenda
þeirra.
Með kærri kveðju og tilhlökkun til nýrra
verkefna.
Ásta Hallgrímsdóttir
formaður Krafts