Morgunblaðið - 10.05.2012, Blaðsíða 32
32 FRÉTTIRInnlent
MORGUNBLAÐIÐ FIMMTUDAGUR 10. MAÍ 2012
VIÐTAL
Ingveldur Geirsdóttir
ingveldur@mbl.is
Það er eftirvænting í loftinu þegar
gengið er inn á Hálendismiðstöðina í
Hrauneyjum. Sumarið er á næsta
leiti og undirbúningur að hefjast fyr-
ir háannatímann í ferðaþjónustunni.
Hálendismiðstöðin er annars opin
allan ársins hring fyrir þá sem eiga
leið um hálendi Íslands.
Friðrik Pálsson hótelhaldari tekur
brosandi á móti blaðamanni og ljós-
myndara. Auk þess að reka Hálend-
ismiðstöðina er hann með annað hót-
el þar rétt hjá, hið þriggja stjörnu
Hótel Háland. Niðri í byggð rekur
hann svo fjögurra stjörnu hótel, Hót-
el Rangá. Friðrik er á þönum milli
hótelanna þessa dagana, sum-
artörnin að byrja og verið að byggja
við Hálendismiðstöðina.
„Við erum að bæta við tuttugu nýj-
um herbergjum og ætlum að opna
þennan hluta upp úr miðjum júní. Þá
verð ég kominn með fjörutíu her-
bergi með baði og fimmtíu og fjögur
með sameiginlegu baði. Á Hótel Há-
landi eru svo tuttugu herbergi með
baði og fjórtán án baðs. Þetta gera
128 herbergi alls hér við Sprengi-
sandsleið,“ segir Friðrik og býður
upp á kaffi og köku í matsalnum. Þar
er kokkur í eldhúsinu að útbúa há-
degismat fyrir smiðina og tveir
starfsmenn, ungt fólk frá Tékklandi
sem talar góða íslensku.
Hollywood hertekur hótelin
Friðrik segir að alltaf sé vel bókað
í gistingu á hálendishótelunum
tveimur á sumrin. Færst hefur í vöxt
að erlendar kvikmyndir séu teknar
upp á hálendinu og hefur Friðrik
sannarlega orðið var við það. Verið er
að hefja undirbúning fyrir tökur á
stórmyndinni Oblivion, með Tom
Cruise í aðalhlutverki, við Veiðivötn.
Fyrstu gestirnir tengdir því verkefni
komu á hótelið á þriðjudaginn. Frið-
rik segir kvikmyndaliðið hertaka hót-
elin á meðan myndirnar eru teknar
og oft mikið púsluspil að koma þeim
öllum fyrir. Oblivion er ekki eina
myndin sem verður tekin á hálendi
Íslands þetta árið og á Friðrik líklega
von á fleiri kvikmyndahópum síðar á
árinu.
Upp til hópa eru það erlendir ferð-
armenn sem koma í Hálend-
ismiðstöðina. „Svo koma allir við sem
eru að fara norður eða suður
Sprengisand. Við erum alltaf með op-
ið og opnuðum Hótel Háland í vetur
fyrir norðurljósahópum og það gekk
mjög vel. Á veturna er líka töluverð
umferð af jeppafólki.
Yfir sumartímann eru það útlend-
ingarnir sem gista hér. Þeir koma
klárir á því að hér er ákveðinn mið-
punktur sem gott er að ferðast út frá.
Þeir taka einn dag inn í Land-
mannalaugar og Langasjó, annan
fara þeir inn í Veiðivötn og Jökul-
heima. Svo keyra þeir inn á Búð-
arháls og í kringum Heklu, það er
mjög skemmtileg leið sem er nú farin
í vaxandi mæli.“
Á ekki að vera ódýr staður
Rétt fyrir ofan Hálendismiðstöð-
ina er Friðrik með Hótel Háland, hús
þar sem Landsvirkjun var eitt sinn
með skrifstofur en er nú lúxushótel
og veitingastaður. Friðrik segir það
hótel alltaf bókast fyrst og ganga
mjög vel. Það er ljóst að fólk er tilbú-
ið að borga fyrir lúxusgistingu á há-
lendinu og Friðrik segir það ekki
endilega vera neitt lúxus-lið. „Þeir
sem koma til mín eru upp til hópa
ósköp venjulegt fólk í frí. Auðvitað
fáum við inn á milli fólk sem veit ekki
aura sinna tal,“ segir Friðrik og bæt-
ir við að íslensk ferðaþjónusta megi
ekki vera feimin við að verðleggja
sig.
„Ég þoli ekki þá tilhugsun að Ís-
land endi í því að vera ódýr ferða-
mannastaður. Þá verða náttúruperl-
urnar ofnýttar og við höfum þær ekki
lengur til að selja. Við höfum haldið
velmegun í þessu landi vegna þess að
við höfum verið með góða atvinnu-
starfsemi sem hefur skilað góðum
tekjum. Ef við ætlum að horfa á
ferðaþjónustuna sem einn af horn-
steinum atvinnu- og efnahagslífsins
getum við ekki leyft okkur að vera
með ódýran vinnukraft og fyrirtæki
sem ekki hagnast.
Ég hef verið að tala fyrir því að
koma ferðaþjónustunni upp á næsta
stig. Góðir hlutir hafa verið gerðir á
undanförnum árum en við erum
ennþá með mjög unga grein í hönd-
unum. Við þurfum að ná upp metnaði
og kjarki til þess að selja okkur háu
verði.“
Alltaf í framkvæmdum
Um sjö ár eru síðan Friðrik tók við
Hálendismiðstöðinni í Hrauneyjum.
Spurður hvort það hafi staðið undir
væntingum að reka hótel á hálendinu
svarar hann játandi. „Það er vaxandi
áhugi á því að ferðast á þessu svæði
og ég hef gríðarlega mikla trú á há-
lendistúrismanum.“
Friðrik sér fyrir sér meiri upp-
byggingu á hótelunum á næstu árum.
„Ég er alltaf í framkvæmdum,“ segir
hann brosandi og býður gestunum í
túr um staðinn. Í nýju viðbygging-
unni eru nokkrir smiðir að störfum.
Gengið var frá þakjárninu á mánu-
daginn og á þriðjudaginn átti að setja
glugga og útihurðir í. Þá átti að byrja
að innrétta, sautján dögum frá fyrstu
skóflustungu. Fyrstu gestirnir sofa
svo í nýju álmunni um miðjan júní,
líklega vært í hálendisþögninni.
Morgunblaðið/RAX
Uppbygging Friðrik Pálsson í nýju viðbyggingunni. Síðast var byggð álma við Hálendismiðstöðina í Hrauneyjum árið 2010. Húskarlar frá Hvolsvelli sjá um verkið sem á að vera lokið í júní.
Hálendisherrann hugmikli
Friðrik Pálsson rekur tvö hótel á hálendinu og eitt í byggð Bætir 20 herbergjum við Hálend-
ismiðstöðina í Hrauneyjum Segir ferðaþjónustuna þurfa að ná upp meiri metnaði og kjarki
Áfangastaður Hálendismiðstöðin hefur verið rekin í Hrauneyjum í um 20
ár. Friðrik tók við henni fyrir um sjö árum og hefur tekið húsið í gegn.
Lúxus Stofan í einu íbúðarherberginu í Hótel Hálandi. Á hótelinu eru fjórar
íbúðarsvítur auk venjulegra herbergja. Vinsælt er að dvelja á hótelinu.