Akureyri - 25.04.2013, Blaðsíða 2

2 25. apríl 2013
Annar hver Íslendingur óráðinn
Þeir sem klóra sér í kollinum þessa
dagana og eru óvissir hvað þeir
ætli að kjósa eru ekki einir á báti,
því samkvæmt rannsókn dr. Ólafs
Harðarsonar stjórnmálafræðipró-
fessors við HÍ ákveður allt að þriðj-
ungur kjósenda sig ekki fyrr en á
kjördag, annar þriðjungur ákveður
sig í síðustu vikunni fyrir kosningar.
Nú tveimur dögum fyrir kosningar
má því áætla að næstum annar hver
Íslendingur hafi enn ekki ráðstafað
atkvæði sínu í huga sínum
Flokkshollusta er á undanhaldi
á Íslandi og horfir í að nýju fram-
boðin sem standa utan „fjórflokks-
ins“ muni fá meira fylgi en nokkru
sinni. Það kom fram í erindi sem
Grétar Þór Eyþórsson flutti í Há-
skólanum á Akureyri. Nokkrar af
helstu niðurstöðum rannsóknar
sem Grétar Þór gerði á skoðana-
könnunum undanfarið eru að
stjórnarflokkarnir bíði sögulegt
afhroð, framsókn hafi mikla yfir-
burði utan höfuðborgarsvæðisins
og að þeir sem ákveði sig seint hunsi
frekar fjórflokkinn en nýju fram-
boðin. a
Sauðárkrókur lamaður vegna niðurskurðar
Kona þurfti bæði að borga fyrir sjúkrabíl og akútheimsókn á sjúkrahús að næturlagi – niðurskurður í heilbrigðiskerfinu bitni
misjafnt á íbúum eftir búsetu
Guðný Jóhannesdóttir, fyrrum vara-
bæjarfulltrúi Framsóknarflokksins á
Akureyri, blaðamaður og núverandi
kennaranemi telur að niðurskurður
í heilbrigðismálum bitni með ójöfn-
um hætti á borgurum landsins eftir
búsetu. Guðný býr á Sauðárkróki
og segir að þar hafi verið skorið svo
mikið niður að samfélagið sé orðið
hálf lamað. Heilbrigðisþjónustan
sé orðin þannig að þeir sem fái ein-
hvern kvilla, alvarlegri en kvef þurfi
að leita sér aðstoðar á Akureyri eða
í Reykjavík.
„Ég þurfti á þessu kjörtímabili að
fara upp á sjúkrahús að næturlagi.
Maðurinn minn keyrði mig. Hér var
tekin ákvörðun um að senda mig
norður [til Akureyrar] þar sem ekki
var í boði sú þjónusta sem ég þurfti.
Ég var talin það veik að ég átti ekki
að fara í einkabíl en ekki nógu veik
til þess að fá með mér lækni. Hann
gaf mér eina sprautu af morfíni og
sagði bless. Í sjúkrabíl fór ég með
bifvélavirkja og rafvirkja sem voru
á bakvakt á sjúkrabílnum. Hvorug-
ur þeirra hafði heimild til þess að
gefa mér lyf. Morfínið hætti að virka
áður en við komum í Varmahlíð og
ég þurfti að fara þetta á hörkunni.
Stákarnir á sjúkrabílnum gerðu allt
sem þeir gátu til að hughreysta mig
og voru mér góðir en mikið hefði
verið gott að fá verkjalyf. Viku síð-
ar fékk ég rukkun fyrir heimsókn á
sjúkrahúsið að næturlagi af því að ég
var ekki lögð inn á sjúkrahúsið hér
heldur á Akureyri. Ég þurfti líka að
borga sjúkrabílinn þrátt fyrir að hafa
komið mér sjálf á sjúkrahús. Hvar er
jafnaðarstefnan í þessu?“ Spyr Guðný.
Hún segir að ef hún hefði búði
á Akureyri hefði hún verið keyrð á
sjúkrahús, lögð inn og hefði þá ekk-
ert þurft að borga. Saga hennar sé
dæmi um ójafnræði sem sé staðreynd
á þessu landi. „Annað dæmi er þessi
fáránlega nýja lyfjalöggjöf sem tekur
gildi næstu mánaðarmót og verður til
þess að margir munu hætta að hafa
efni á að leysa út lyfin sín og verða í
framhaldinu þjóðfélaginu dýrari sem
veikari einstaklingar. Það er búið að
skera okkur inn að beini. Ég veit að í
þriðja heims ríkjum er fólk sem telur
okkur rík í samanburði við þau og
sjálfsagt erum við það. En til þess að
koma hér á sátt á nýjan leik og koma
hjólum samfélagsins almennilega í
gang þarf að koma til leiðrétting á
stökkbreyttum lánum. Mér er alveg
sama hvað flokkurinn heitir og vildi
helst óska þess að allir gæti séð þetta
og þeir sem lokuðu augunum fyrir
fjórum árum þegar tækifæri gafst
myndu viðurkenna mistök sín og
leiðrétta. Í aðdraganda hrunsins og
eftir það gerðu allir flokkar mistök.
Ég tel að allir hafi lært af þeim mis-
tökum og eigi að halda áfram reynsl-
unni ríkari,“ segir Guðný. a
Margir sem báðu mig að
drepa mig ekki
„Þetta var á tímabili linnulaust streð,
maður svaf lítið og ég var ansi oft
þreyttur. Það komu dagar sem maður
átti ansi oft litla eða enga orku eft-
ir. Alerfiðast var ástandið árin 2010
og 2011, þá var maður svo grár og
gugginn í viðtölum að það fóru að
berast endalausar kveðjur frá fólki
sem bað mig að drepa mig ekki á
þessu,“ segir Steingrímur J. Sigfússon.
Lokið er einu alerfiðasta kjör-
tímabili á Íslandi, í kjölfar efna-
hagshruns og stjórnarskipta. Blað-
ið spurði Steingrím, 1. þingmann
NA-kjördæmis og annan oddvita
stjórnarflokkanna á endurreisnar-
tímabilinu hvort hann liti á það sem
vanþakklæti frá þjóðinni að skoð-
anakannanir mæli nú sögulegan
skell ríkisstjórnarinnar í kosningum
á laugardag.
„Ég hef aldrei ætlast til þakklætis
fyrir unnin störf og á hinn bóginn
get ég þá ekki sagt að mér finnist
skoðanakannanir endurspegla neitt
sérstakt vanþakklæti. En ég trúi því
enn að stjórnarflokkunum, alla vega
VG, muni takast að rétta okkar hlut.
En þótt mér finnist fylgiskannanir
langt frá því að vera sanngjarnar
miðað við erfiðleika verkefnis okkar
eru einu launin sem ég hef vonast
eftir að verkefnið hafi tekist vel mið-
að við aðstæður,“ segir Steingrímur.
Hann skýrir fylgistapið að nokkru
með því að sum verk ríkisstjórnar-
innar hafi hlotið að verða óvinsæl og
margir kjósendur hafi haft það erfitt
síðustu ár þótt það sé ekki þessari
ríkisstjórn að kenna heldur fyrir-
rennurum hennar. „Svona illa höfum
við ekki staðið okkur – það yrði ekki
sanngjarn dómur um okkar verk ef
við fengjum eins lítið fylgi og mælst
hefur undanfarið. Það undarlega er
að ég er alltaf að hitta fólk sem seg-
ir: Þið hafið barist eins og ljón og
hálfdrepið ykkur á kjörtímabilinu
en samt vantar eitthvað upp á. Það
virðist einhver tvíhyggja í þessu öllu
saman,“ segir Steingrímur J. Sigfús-
son. a
Ég hataði þennan mann
Héraðsdómur Norðurlands eystra
hefur dæmt mann í þriggja og hálfs
árs fangelsi eftir að hann réðist
inn í hús á Þórshöfn og réðist þar
á íbúa. Í ákæru segir að maðurinn
hafi framið húsbrot, eignarspjöll og
gert tilraun til manndráps þegar
hann fór að kvöldi föstudagsins 10.
febrúar 2012, í heimildarleysi inn á
heimili mannsins með því að kasta
stórum steini í gegnum rúðu og fór
þannig inn í stofu hússins. Þar hafi
maðurinn slegið og sparkað í höfuð
og búk mannsins, traðkað á höfði
hans, barið hann ítrekað með 15,5
kg þungum stól með fimmarma fæti
í líkama og höfuð og slegið hann
ítrekað í höfuð og andlit með munn-
hörpu.
Við atlöguna hlaut íbúinn heila-
blæðingu, nefbrot á tveimur stöðum,
brot á vanga- og kinnkjálkabeinum,
mikið mar á andliti og augum, mörg
sár á andliti, sár aftan á baki, mar á
baki og brjóstkassa og tvö rifbeins-
brot hægra megin.
Maðurinn og brotaþoli eru
tengdir fjölskylduböndum, en móð-
ir ákærða er bróðurdóttir brotaþola.
Maðurinn sagði að ákvörðun hans
um að heimsækja ættingja sinn hafi
verið skyndihugdetta. Rót árásar-
innar hafi mátt rekja til ætlaðra
kynferðislegra misgjörða brotaþola
gagnvart móður hans þegar mamma
hans var á barnsaldri.
„Ég hataði þennan mann. Það er
ekkert leyndarmál. Ég hataði hann
af öllu mínu hjarta,“ sagði maðurinn
fyrir dómi. a
GRÁSLEPPA
Kaupum ferska óskorna
Grásleppu um allt land.

Tökum einnig verkuð
hrogn til útutnings.

Fiskislóð 34, 101 Reykjavík
Sími 520-7302 (Ragnar)