Morgunblaðið - 23.10.2014, Blaðsíða 20

20 FRÉTTIRInnlent
MORGUNBLAÐIÐ FIMMTUDAGUR 23. OKTÓBER 2014
VIÐTAL
Björn Jóhann Björnsson
bjb@mbl.is
„Alþjóðlegi sjónverndardagurinn
heppnaðist frábærlega í alla staði og
framkvæmdin var Lionshreyfing-
unni á Íslandi til mikils sóma,“ segir
Joe Preston, alþjóðaforseti Lions,
við Morgunblaðið um Íslands-
heimsókn hans og eiginkonunnar,
Joni Preston, á dögunum. Þau koma
frá bænum Dewey-Humboldt í Ari-
zona í Bandaríkjunum og hafa bæði
starfað innan Lions til fjölda ára,
hann frá 1974 og hún frá 1985.
Eins og fram hefur komið í Morg-
unblaðinu stóð Lions á Íslandi í
fyrsta sinn fyrir hinum árlega Al-
þjóðlega sjónverndardegi, sem
Lions á alþjóðavísu hefur haldið 17
sinnum. Hápunktur heimsóknar
hjónanna var afhending tveggja
augnlækningatækja sem Lionsmenn
gáfu Landspítalanum.
Annað tækið er nýr sjónsviðs-
mælir, sem m.a. greinir gláku. Hitt
greinir augnsjúkdóma í börnum og
er mun sérhæfðara. Andvirði tækj-
anna er um 10 milljónir króna.
„Kynningin og afhendingin á
tækjunum heppnaðist fullkomlega
og það var mikill heiður að hafa for-
seta Íslands viðstaddan, heilbrigð-
isráðherra, þingmenn og fjölda
lækna. Tækin eru þýðingarmikil fyr-
ir spítalann og þau bera einfaldlega
vott um þann metnað og þá sam-
félagslegu ábyrgð sem Lions axlar
þegar kemur að mikilvægum heil-
brigðisstofnunum eins og Landspít-
alanum. Þetta er gott verkefni og
Lions hefur mikinn áhuga á að halda
því áfram,“ segir Joe Preston.
Samstarf um lestrarátak
Þau hjónin sátu ekki auðum hönd-
um í heimsókn sinni. Meðal annars
kynntu þau sér starfsemi Blindra-
félagsins, Slysavarnaskóla sjómanna
og endurhæfingardeildarinnar á
Grensás. Þá áttu þau fund með Ólafi
Ragnari Grímssyni, forseta Íslands,
hlýddu á morgunsöng nemenda
Laugarnesskóla, skoðuðu listaverk á
Kjarvalsstöðum og plöntuðu trjám í
„Alþjóðaforsetalundi“ í landi Lions-
klúbbsins Ásbjarnar í Hafnarfirði.
Annar hápunkturinn í dagskrá
Lionsmanna í tilefni sjónverndar-
dagsins var sýning í Ráðhúsi
Reykjavíkur. Joe Preston segir sýn-
inguna hafa heppnast mjög vel. Það
hafi komið þeim hjónum skemmti-
lega á óvart að sjá þann fjölda fólks
sem kom til að kynna sér starfsemi
Lions og fleiri aðila. „Sýningin stóð
aðeins yfir í þrjá tíma en við fengum
um þrjú þúsund manns, það er frá-
bært.“
Alþjóðaforsetinn átti einnig fund
með Illuga Gunnarssyni, mennta- og
menningarmálaráðherra. Hann seg-
ir fundinn hafa verið mjög góðan.
Meðal þess sem þeir ræddu var
lestrarátak sem Lionshreyfingin fór
af stað með árið 2012 til tíu ára. Að
sögn Prestons lýsti Illugi vilja sínum
til samstarfs við Lionsmenn um
þetta átak.
„Lions hefur á undanförnum ár-
um lagt sitt af mörkum við að auka
lestur ungmenna en þetta hefur ver-
ið vaxandi vandamál, krakkarnir
lesa ekki eins mikið og áður og við
viljum leggja okkar af mörkum.
Ráðherrann lýsti metnaði sínum og
vilja til að auka og bæta lestur en
það þarf fleiri til verksins en stjórn-
völd og Lions, þetta þarf að vera
sameiginlegt átak allra í samfélag-
inu til að árangur náist.“
Vinna af alúð og umhyggju
Sem fyrr segir er Joe Preston
einkar ánægður með framkvæmd
Lions á Íslandi á sjónverndardeg-
inum. Hvergi í heiminum eru hlut-
fallslega jafn margir í Lions og hér á
landi og hann segir þetta skemmti-
lega en ánægjulega staðreynd. Eru
Lionsfélagar hér um 2.300.
„Hér sinna Lionsmenn samfélagi
sínu af mikilli alúð og umhyggju.
Þeir vilja leggja sitt af mörkum en
auðvitað er það takmörkunum háð
hvað hver og einn einstaklingur get-
ur gert. Með sameiginlegu átaki
margra er hins vegar hægt að gera
stórkostlega hluti,“ segir hann.
Preston hefur sem fyrr segir
starfað í Lionshreyfingunni til fjölda
ára og ferðast víða, ekki síst eftir að
hann gerðist alþjóðaforseti. Spurður
hvort hreyfingin sé alls staðar sú
sama segir hann svo ekki vera.
„Þetta er mjög mismunandi eftir
löndum. Verkefnin fara algjörlega
eftir því hver þörfin er og hvar skór-
inn kreppir. Í sumum löndum snýst
þetta einfaldlega um hluti eins og
hreint vatn og hreinlæti. En þótt
vandamálin séu mismunandi, og um
leið aðferðir til að afla fjár, þá erum
við knúin áfram af sama markmið-
inu; að láta gott af okkur leiða í sam-
félaginu.“
Alþjóðaforseti Lions situr í emb-
ætti eitt ár í senn. Það er skammur
tími og Preston segist hafa sett sér
ákveðin markmið og verkefni til að
vinna eftir og koma af stað. Þar hef-
ur hann sett hagsmuni barna og
ungmenna í öndvegi, hvort sem það
er barátta gegn sjúkdómum, ofbeldi
eða hungursneyð. Nefnir hann götu-
börn sem dæmi í heimshlutum eins
og S-Ameríku, Indlandi og A-
Evrópu. Þá leggur hann áherslu á að
blindum börnum sé hjálpað og segir
Lions geta t.d. aðstoðað í baráttu
Kínverja gegn mikilli barnablindu
þar í landi.
Lions 100 ára 2017
Annað stórt verkefni sem Preston
mun einbeita sér að og hrinda af stað
er undirbúningur fyrir 100 ára af-
mæli Lions á heimsvísu árið 2017.
„Fram að þeim tíma ætlum við að
setja í gang verkefni sem mun
snerta 100 milljónir manna á ein-
hvern hátt,“ segir hann en viðfangs-
efnin snúa m.a. að því að bæta sjón
barna, auka lestur, draga úr hung-
ursneyð, planta trjám og berjast
gegn mengun í umhverfinu.
„Þetta er stórt og metnaðarfullt
verkefni en ég er þess fullviss að
okkur tekst ætlunarverkið. Það
kemur í hlut alþjóðaforsetans að
koma þessu af stað, samhæfa verk-
efnin og fá fleiri til liðs við okkur,“
segir Preston en næsti alþjóða-
forseti mun síðan halda áfram með
undirbúning fyrir aldarafmælið.
Fylgjast með ebólunni
Spurður hvort Lions muni eitt-
hvað leggja sitt af mörkum í barátt-
unni gegn ebólu segir Preston að
hreyfingin muni áreiðanlega gera
það. Ekkert sé þó búið að ákveða eða
ræða um það innan hreyfingarinnar.
„Ebólan er nýr vágestur fyrir
okkur. Við höfum hjálpað til í
heilbrigðismálum um allan heim og
meðal annars tekið þátt í baráttu
gegn mislingum. Enn sem komið er
höfum við ekki fengið hlutverk hvað
varðar ebóluna en erum í sam-
skiptum við stjórnvöld í Afríku og
Alþjóðaheilbrigðismálastofnunina.
Við getum vel aðstoðað við að miðla
upplýsingum til almennings og
hvernig hægt sé að forðast smit og
draga úr útbreiðslu sjúkdómsins.“
Preston segir Lionshreyfinguna
eiga sér bjarta framtíð á heimsvísu
og muni dafna áfram svo lengi sem
félagsmenn fylgist vel með í sínu
umhverfi og séu vel meðvitaðir um
þarfir þess.
„Þetta þýðir að við þurfum að vera
á tánum, þróast áfram með umhverf-
inu og vera í góðu sambandi við ein-
staklinga, fyrirtæki, stofnanir og
stjórnvöld í hverju landi fyrir sig,“
segir hann en á undanförnum árum
hefur Lionsfélögum fjölgað jafnt og
þétt. Eru þeir nú yfir 1,3 milljónir
um heim allan. Alþjóðaforsetinn vill
sjá meiri fjölgun og telur að Lions sé
kjörinn vettvangur fyrir þá sem vilja
láta gott af sér leiða og taka þátt í
gefandi og skemmtilegu félagsstarfi.
„Við þurfum bara að vera sveigj-
anleg og hlusta á hugmyndir og
þarfir unga fólksins í dag, sem hefur
kannski ekki eins mikinn tíma í fé-
lagsstörf og áður,“ sagði Joe Prest-
on að endingu, en frá Íslandi lá leið
þeirra hjóna næst til Norður-
landanna. Þau sögðust búa um þess-
ar mundir í ferðatöskum en vonast
þó til að geta haldið jólin með fjöl-
skyldunni heima í Arizona.
Lions á Íslandi til mikils sóma
 Joe Preston, alþjóðaforseti Lions, ánægður með framkvæmd Alþjóðlega sjónverndardagsins
 Átti árangursríkan fund með menntamálaráðherra  Undirbýr 100 ára afmæli Lions á heimsvísu
Hjón Joe og Joni Preston eru bæði í Lions og því samrýnd í leik og starfi.
Joni hefur verið í Lionsklúbbnum í þeirra heimabæ í nærri 30 ár.
Morgunblaðið/Golli
Forseti Joe Preston er alþjóðaforseti Lions nú um stundir. Hann segir fram-
kvæmd Alþjóðlega sjónverndardagsins vera Lions á Íslandi til mikils sóma.
Í heimsókn sinni til Íslands komu Joe og Joni
Preston víða við. Heimsóttu þau m.a. BUGL,
barna- og unglingageðdeild Landspítalans,
ásamt forystumönnum í Lions á Íslandi og
klúbbnum Fjörgyn í Grafarvogi.
„Lions hefur stutt mjög vel vel við BUGL og
það var ánægjulegt að fá tækifæri til að kynnast
starfseminni, sem er mjög merkileg,“ segir Preston
en við þetta tækifæri hengdi hann upp skjöld í anddyri
BUGL þar sem tilgreind eru fjölmörg stuðningsverk Fjörgynjar við deild-
ina á undanförnum árum. Meðal þeirra gjafa eru tveir bílar sem notaðir
eru til að koma sjúklingum á milli staða. Brá Preston sér þar í hlutverk
bílstjóra og festu kvikmyndagerðarmenn það á filmu, líkt og aðra við-
burði sem hann var viðstaddur. Unnið er að gerð heimildarmyndar um Ís-
landsheimsókn forsetahjónanna og Alþjóðlega sjónverndardaginn 2014.
Forsetahjónin komu víða við
JOE OG JONI PRESTON BÆÐI Í LIONS
LÁTTU EKKI HÓSTA
SPILLA SVEFNINUM
Hóstastillandi og mýkjandi
hóstasaft frá Ölpunum
Sími 555 2992 og 698 7999
NÁTTÚRU-
AFURÐ úrselgraslaufum