Hafnarfjörður - Garðabær - 01.05.2014, Blaðsíða 4
4 1. maí 2014
Af hverju Björt framtíð?
Ég er ósjaldan spurð að því hversvegna ég valdi það að fara út í pólitík, ég veit aldrei
hverju ég á að svara nákvæmlega en
yfirleitt er svarið á þá leið að mig
langi til þess að taka þátt í að byggja
upp samfélagið mitt. Það er einmitt
raunin, mig langar að byggja upp
bæjarfélagið okkar, vera virkur hluti
af því. Sveitafélög eru ekkert ósvipuð
og fyrirtæki, þetta er rekstur sem þarf
utanumhald, þarna eru mörg hjól sem
eru að vinna saman að einu markmiði,
það er mikilvægt að hvert tannhjól
haldi áfram að snúast svo kerfið allt
gangi upp og reksturinn heldur áfram.
Ég vil vera eitt af þessum hjólum.
Ég hafði samt sem áður aldrei rétta
grundvöllinn til þess, ég fann mig ekki
hjá þeim stjórnmálaflokkum sem
voru til staðar í Hafnarfirði. Þarna
voru einfaldlega ekki valkostir sem
ég heillaðist af. Þegar ég komst að
því að Björt Framtíð væri að fara af
stað í Firðinum fagra þá var ég ekki
lengi að stökkva til og hoppa uppí þá
lest. En hversvegna Björt Framtíð?
Mig langaði ekki að vinna í neikvæðu
umhverfi sem snérist um að benda á
hvorn annan, endalaus loftbóluloforð
sem allir vita að ekki er hægt að standa
við. Mig langaði að vinna í flokki sem
hefur báðar lappirnar á jörðinni, sem
sér sig ekki knúinn til þess að vera á
móti góðum verkefnum bara vegna
þess að andstæðingurinn kom fram
með hugmyndina. Mig langaði að
vinna í björtu umhverfi sem saman
stendur af vinum, góðum hópi sem
er kominn til þess að bæta samfélagið
sitt þvert á pólitíska flokka, öll hönd
í hönd.
En það er ekki nóg að vilja nýtt
pólitískt afl í samfélagið okkar, hvað
er það sem ég læt mig dreyma um?
Mig langar að bæta samfélagið okkar
með því að við bæjarbúar séum betur
meðvitaðri og upplýstari um okkar
nærumhverfi, að við veljum frekar að
leita fyrst inní bæinn, til nágrannans
eða innan samfélagsins áður en við
förum annað. Ég vil að við stöndum
öll jöfn, við séum ekki hópuð niður
eftir ákveðnum fyrirfram mótuðum
römmum heldur séum við öll metin
sem einstaklingar, jafnir einstaklingar.
Ég vil að börnin okkar geti vaxið úr
grasi í fallegu umhverfi sem einkennist
af öryggi, jafnrétti og birtu. Að Hafna-
fjörður og Hafnfirðingar fái að vaxa
og dafna í samheldni, vináttu og ná-
ungakærleik.
Ég vil Bjartari Framtíð í Hafnarfirði.
Oddviti Bjartrar framtíðar í Hafnarfirði:
Leggst gegn loforðalistum fyrir kosningar
Guðlaug Kristjánsdóttir er borin og barnfædd í Hafnarfirði. Hún er þekkt
fyrir störf sín hjá BHM þar sem hún hefur gegnt formennsku um árabil, en
hún er sjúkraþjálfari að mennt. Hún starfaði meðal annars með konum á
meðgöngu og eftir fæðingu áður en hún helgaði sig störfum fyrir stéttarfé-
lagið. Hún er fjölskyldukona og á þrjú börn með manni sínum, en er auk þess
„tónelskur bókaormur með handavinnuáráttu,“ eins og hún lýsir sjálfri sér.
Guðlaug segist lítinn bakgrunn hafa í
pólitík, nema sem almennur kjósandi.
Hún hafi ekki tekið þátt í pólitísku starfi
fyrr en með tilkomu Bjartrar framtíðar,
en hún sat á lista fyrir flokkinn í síðustu
Alþingiskosningum. „Ég fann mig alls
ekki í þessu hægri/vinstri landslagi og
tengdi ekki við einn flokk fremur en
annan. Hélt reyndar að mín pólitíska
skoðun væri almennt ekki til,“ segir
Guðlaug. Þetta skýrst ef til vill af því
að lítil hefð sé fyrir „liberal“ flokkum
hér á landi.
Guðlaug segist alltaf hafa lesið mikið
og hlustað á tónlist. Hún segir aðspurð
um áhrifavalda eða fyrirmyndir að
sterkir frumkvöðlar eða þjónandi leið-
togar hafi haft áhrif á sig. Fólk sem
einnig hafi húmor fyrir sjálfu sér og
lífinu. „Ég held að ég halli ekki á neinn
þó ég nefni Margréti Pálu Hjallahöfund
sem einstakling sem hefur allt þetta til
að bera.“
Auður í fjölbreytileika
- Hvernig myndir þú lýsa grund-
vallahugsjónum þínum?
„Grundvallarafstaða mín til lífs-
ins almennt er sú að það eigi að vera
ánægjuleg reynsla, að okkur eigi að líða
vel. Lífið er núna. Mér finnst að hver og
einn eigi rétt á sinni skoðun og aðferð,
svo framarlega sem það skaðar ekki
aðra,“ segir Guðlaug Kristjánsdóttir.
Fólk sé af ýmsu tagi og eigi að fá að vera
það. „Enda er fjölbreytileiki auðlind
sem við eigum að rækta. Góð samskipti
og heilbrigð umræða eru síðan lykilat-
riði í að allir geti lifað saman í sátt og
samlyndi, hver með sínu nefi.“
Hrista upp í hlutunum
Spurð um þrjú brýnustu málin fyrir
bæjarstjórn Hafnarfjarðar til skemmri
og lengri tíma segist Guðlaug ekki vilja
aðskilja markmið með þessum hætti.
„Allt sem við gerum í dag hefur áhrif
til framtíðar og því brýnt að horfa fram
í tímann þegar ákvarðanir eru teknar,“
segir Guðlaug, og bætir því við að
Björt framtíð vilji „hrista aðeins upp“
í bæjarpólitíkinni í Hafnarfirði. Það sé
markmið til skemmri tíma.
„Annars er grunnáhersla Bjartrar
framtíðar í Hafnarfirði á framtíðar-
stefnu, sem við myndum vilja móta
þvert á flokka og með greiðri aðkomu
bæjarbúa. Hvernig bæ vilja Hafn-
firðingar sjá til framtíðar? Fyrir hvað
stendur bærinn okkar? Sátt um sam-
eiginlega framtíðarsýn myndi styrkja
mjög starf bæjarstjórnar að okkar
mati. Við erum þar með gnótt af hug-
myndum til að leggja í púkkið,“ segir
Guðlaug Kristjánsdóttir.
„Þeir“ eru „við“
Hún nefnir sérstaklega að opna þurfi
betur aðgengi að upplýsingum úr
rekstri bæjarins. Sýnileg stjórnsýsla
veiti meiri skilning á ákvarðanatöku.
„Hvað kostar t.d. skólaganga barnanna
okkar? Í hvað fer útsvarið?“ spyr hún.
Ekki eigi að hugsa um bæinn sem
„þá“ segir Guðlaug og nefnir sem dæmi
algenga hugsun, sem gæti falist í setn-
ingu eins og „Þeir moka aldrei snjóinn“
og fleira í þeim dúr. „Bærinn er í raun
„við“,“ segir Guðlaug og vísar til þeirra
sem búa og starfa í bænum sem í sam-
einingu fjármagni rekstur bæjarins.
Engin loforð
„Stjórn bæjarfélags eru örugglega
engin töfrabrögð, byggð á kennisetn-
ingum flokka, heldur mun frekar
praktískur rekstur sem þarf að byggja
á staðreyndum og málefnalegri rök-
ræðu,“ segir Guðlaug og bætir við.
„Meðal annars af þessum sökum
hefur Björt framtíð frá upphafi lagst
gegn loforðalistum fyrir kosningar.
Við teljum mikilvægara að gera grein
fyrir grundvallarafstöðu til málefna
og þeim markmiðum sem við viljum
vinna að.“ Slík áhersla sé bæði til lengri
og skemmri tíma.
Óhrædd að spyrja
„Við erum nýtt framboð og því eðli
málsins samkvæmt nýgræðingar í bæj-
arstjórnarmálum, þótt við búum yfir
umfangsmikilli reynslu úr fjölbreyttum
áttum. Það veitir okkur ákveðinn styrk,
því við höfum frelsi til að þurfa ekki að
þykjast hafa öll svör á reiðum höndum
en getum þess í stað verið óhrædd við
að spyrja spurninga. Pólitíkin þarf að
mínu mati á slíkri nálgun að halda, að
færri þykist vita allt og fleiri þori að
spyrja. Það hafa allir gott af því.“
Tekjuöflun og dreifing
Að svo komnu máli nefnir Guðlaug
raunar nokkur úrlausnarefni. Augljóst
verkefni í bráð sé fjárhagsstaða bæj-
arins. Þar þurfi að horfa bæði á tekju-
öflun og dreifingu útgjalda. Einnig
séu húsnæðismálin stórmál. „Svo eru
menntamál og skipulag skólamála
mikið áhugamál okkar líkt og margra
annarra í þjóðfélaginu. Útlit bæjarins
og hönnun skipulags eru annað hjart-
ans mál, langtímaskipulag og heildar-
mynd Hafnarfjarðar.“
Guðlaug segist vera bjartsýn í eðli
sínu, aðspurð um gengi Bjartrar fram-
tíðar í kosningunum í vor. Hún hafi
trú á „því öfluga fólki sem gefur kost
á sér fyrir hönd Bjartrar framtíðar.“
Kraftur og gleði sé í hópnum „og ein-
lægur vilji til að bjóða fram krafta í
þjónustu bæjarbúa.“
Þingmennirnir hafa áhrif
Hún segir jafnframt að framganga
fulltrúa flokksins á Alþingi skipti
máli. „Ef ég ber saman aðstöðuna
nú í sveitarstjórnarframboðinu við
þingframboðið í fyrra, þá erum við
t.d. alveg laus við spurninguna um
hvort framboðið sé grínframboð,“
segir Guðlaug. Hún bætir því við að
auðveldara sé að koma því á framfæri
að megináhersla Bjartrar framtíðar sé
á breytt vinnubrögð. Þau þurfi að sýna
í verki, „og það hafa þingmennirnir
okkar sannarlega gert með framgöngu
sinni. Enda hefur fylgi við Bjarta fram-
tíð aukist jafnt og þétt frá því að þing
kom saman.“
Guðlaug Kristjánsdóttir segist ekki
hafa farið í framboð gagngert til að
verða bæjarstjóri. „En ég gæti þó alveg
hugsað mér að ganga í það verk ef það
getur orðið til þess að hreyfa málin í
þá átt sem framboð Bjartrar framtíðar
vill að þau fari.“
Jákvæð samræða
- Myndir þú starfa í meirihluta með
hverjum sem er eftir kosningar?
„Við erum almennt fráhverf hugsun-
inni um andstæð hlutverk af tegund-
inni stjórn-stjórnarandstaða eða
meirihluti-minnihluti. Okkar nálgun
er að allir kjósendur eigi rétt á virkri
talsmennsku í stjórn bæjarins. Það er
vel hægt að starfa þvert á alla flokka,
slíkt byggir á því að hver og einn þekki
sína stefnu og afstöðu og geti á grunni
hennar nálgast góð mál jákvætt sama
hvaðan þau koma. Það þarf alls ekki
að trufla okkur að gott mál komi að
frumkvæði annarra. Við munum styðja
málefni frekar en flokka í bæjarstjórn
og hvetja til opinnar og jákvæðrar sam-
ræðu til að stuðla að skilvirkum árangri
í málefnum bæjarins.“
Höfundur er
Karólína Helga Símonardóttir,
Frambjóðandi í 9. sæti á lista
Bjartar framtíðar í Hafnarfirði
SveitarStjórnakoSningar 2014
„Það er vel hægt að starfa þvert á alla flokka, slíkt byggir á því að hver og
einn þekki sína stefnu og afstöðu og geti á grunni hennar nálgast góð mál
jákvætt sama hvaðan þau koma,“ segir Guðlaug Kristjánsdóttir.
Guðlaug Kristjánsdóttir í faðmi fjölskyldunnar.