Hafnarfjörður - Garðabær - 16.05.2014, Blaðsíða 4

4 16. maí 2014
HAFNARFJÖRÐUR / gARÐAbæR
9. TbL. 4. ÁRgANgUR 2014
Útgefandi: Fótspor ehf. Ábyrgðarmaður: Ámundi Ámundason, sími: 824 2466,
netfang: amundi@fotspor.is. framkvæmdastjóri: Ámundi Steinar Ámundason, netfang:
as@fotspor.is. auglýsingastjóri: Ámundi Ámundason, Suðurlandsbraut 54, 108 Reykjavík.
Auglýsingasími 578 1190, netfang: auglysingar@fotspor.is, Veffang: fotspor.is, Ritstjóri:
Ingimar Karl Helgason, sími: 659-3442 netfang: ingimarkarlhelgason@gmail.com,
Matarblaðamaður: Svavar Halldórsson. Sími. 869-4940. Netfang. svavar@islenskurmatur.is,
Umbrot: Prentsnið, Prentun: Ísafoldarprentsmiðja, 13.500 eintök. dreifing: Póstdreifing.
Fríblaðinu er dreiFt í 13.500 e intökum
í allar íbúðir í HaFnarFirði / Garðabæ
Sanngjarnar kröfur kennara og réttmætar aðgerðir þeirra hafa ekki fengið verðskuldaða athygli. Öllu meiri athygli hefur fengið verkfall flugmanna.Það hefur heyrst í þeirri umræðu að flugmenn eigi ekkert með að fara
í verkfall. En svoleiðis þarf að hugsa lengra. Telur íslenskur almenningur að
það væri rétt að tekjutengja verkfallsréttinn?
Verkfallsréttur, neyðarúrræði í kjarabaráttu, er grunnréttur. Þennan rétt höfum
við flest. Mikilvægt er að allir standi vörð um hann.
Og er ekki eðlilegt að launafólk geri kröfu um að vera metið að verðleikum?
En hvað er það í okkar samfélagi sem gerir að verkum að við látum réttmætar
kröfur kennara sem vind um eyru þjóta, enda þótt þeirra starf sé eitt það
mikilvægasta í samfélaginu?
Í landinu öllu sátu um 43 þúsund nemendur heima í gær og búast má við
öðru eins tvo aðra daga í mánuðinum. Launin eru almennt lág. Tugir staða
eru auglýstar, því fólk leitar annað. Meðalaldur kennara er hár. Dregið hefur
úr aðsókn í kennaranámið.
Menntun er undirstaða og grunnur framtíðarinnar. Kennarinn er lykilmaður.
Við þurfum að taka höndum saman um að viðurkenna mikilvægi hans og
láta umræðuna snúast um samfélagið í heild og framtíð þess. Við eigum ekki
að láta tímabundin óþægindi eins og verkfall flugmanna setja allt á annan
endann, og heldur ekki láta glepja okkur til að afsala okkur réttindum eða
tekjutengja þau. Verri hugmyndir hafa vart heyrst.
Skynsamlegra væri að beina sjónum að kennurunum. Það er löngu kominn
tími til þess að þeir verði metnir að verðleikum og að kjör þeirra endurspegli
mikilvægi þeirra í samfélaginu, bæði í nútíð og um alla framtíð.
Ingimar Karl Helgason
Tekjutengdur
verkfallsréttur?
Leiðari
Hreinn bær
- okkur kær
Eldri hafnfirðingar kannast við þetta slagorð, Hreinn bær- okkur kær frá gamalli
tíð en nú fyrir þessar kosningar
eru þetta einmitt einkunnarorð
Sjálfstæðisflokksins í umhverfis og
hreinsunarmálum. Sjálfstæðisflokk-
urinn vill að Hafnarfjörður verði í
forystu sem umhverfisvænt sveitar-
félag. Við viljum að fegrun bæjar-
ins, hreinsun stíga og opinna svæða
verði sett í forgang ásamt því að ljúka
frágangi og fegrun í nýjum hverfum.
Við eigum yndislega fallegan bæ en
það er skuggi á bæjarbragnum að of
mikið rusl er víða um bæinn. Fjöl-
mörg græn svæði eru í bænum sem
þarf að sinna betur þannig að þau
séu bæjarprýði og nýtist til útiveru
fyrir bæjarbúa.
Síðasta vetur var hálka til mikilla
trafala fyrir bæjarbúa en klakabunkar
lágu yfir bænum í margar vikur og
árið á undan var einstaklega snjó-
þungt. Gera þarf bragarbót og auka
fjármagn til snjómoksturs og hálku-
varna þannig að bæjarbúar komist
klakklaust á milli staða, bæði akandi
og gangandi vegfarendur. Sú for-
gangsröðun sem notast hefur verið
við undanfarin ár er ekki viðunandi
þjónusta og það þarf að gera betur
fyrir bæjarbúa.
Hjólreiðar og hlaupahópar
Margir vilja nota reiðhjól sem sam-
göngutæki og þá skiptir miklu máli að
betur sé hugsað um sópun á stígun til
að fyrirbyggja slys sem geta orðið ef
til dæmis glerbrot fara í hjólbarða og
ennfremur er mikil gróska í almenn-
ingsíþróttum í bænum og fjölmennir
hlaupahópar nota stíga mikið til æf-
inga. Strandstígurinn er ákaflega vin-
sæll hjá öllum aldurshópum til göngu-
ferða og útiveru en það þarf að sinna
honum betur og ljúka lagningu hans
og því stefnum við sjálfstæðismenn að.
Gleðilegt sumar kæru hafnfirðingar!
Atvinna er okkar mál
Atvinna og verðmætasköpun eru forsendur þess að unnt sé að halda uppi hagsæld og
velferð. Í komandi bæjarstjórnarkosn-
ingum munu Hafnfirðingar meðal
annars horfa til atvinnumála þegar
ákveðið verður hverjir fari með stjórn
bæjarins næstu fjögur árin.
Sjálfstæðisflokkurinn hefur í
gegnum tíðina verið málsvari þess
að efla atvinnulíf, styðja frumkvöðla
og framtak einstaklinga og fyrirtækja.
Stuðningur annarra stjórnmálaflokka
við þessi sjónarmið hefur verið brokk-
gengur og er skemmst að minnast þess
er bæjarfulltrúar Samfylkingarinnar
veigruðu sér við að taka afstöðu
þegar stærsta fyrirtæki bæjarins leit-
aði eftir samstarfi um að efla starf-
semi sína í Hafnarfirði. Fyrir vikið
urðu bæjarbúar af samgöngubótum
við Reykjanesbrautina, frágangi
háspennulína við Vellina, auknum
atvinnutækifærum í hátækni, vel
launuðum störfum og efnahagslegum
ávinningi. Það er hlutverk kjörinna
fulltrúa að vinna með þau margvíslegu
sjónarmið sem koma upp í málum af
þessu tagi og öll geta haft nokkuð til
síns ágætis, leiða málin til lykta, taka
afstöðu og standa skil á henni gagn-
vart kjósendum.
Þegar við horfum til framtíðar er
ljóst að Hafnarfjörður býr yfir eins-
tökum tækifærum í atvinnumálum.
Bærinn er staðsettur í þjóðbraut milli
höfuðborgarinnar og alþjóðaflug-
vallarins í Keflavík, með höfn sem
býður upp á flutninga með vörur og
siglingar með farþega til og frá bænum.
Við búum að auðlindum orku og vatns,
og náttúru sem mikilvægt er að um-
gangast og nýta af hófsemi og framsýni.
Fyrir næsta kjörtímabil munum
við sjálfstæðismenn setja atvinnumál
í Hafnarfirði í forgang. Við munum
hefja átak í atvinnuþróun í bænum,
þar sem Hafnarfjörður verður mark-
aðssettur með virkum hætti til þess
að bjóða nýjum fyrirtækjum að setj-
ast hér að. Fyrirtæki hafa mismunandi
þarfir, starfsemi þeirra og vöxtur er
mismunandi, og mikilvægt er að miða
sölu, verðlagningu og skilmála lóða
við þarfir hvers og eins. Þannig hafa t.
d. smáfyrirtæki aðrar þarfir en stærri
fyrirtæki og það sama má segja um
sprotafyrirtæki í nýjum greinum eða
hin sem starfa í hefðbundnari atvinnu-
starfsemi. Taka þarf tillit til þessara
mismunandi þarfa og aðstæðna og
styrkja þarf stjórnsýslu bæjarins til þess
að sinna betur atvinnulífinu, bæði því
sem fyrir er og þeim sem hingað eiga
eftir að sækja.
Við sjálfstæðismenn horfum með
bjartsýni til komandi tíma, enda höfum
við allar forsendur til að byggja hér
upp blómlegt atvinnulíf í góðri sátt við
íbúa bæjarins, náttúru og umhverfi.
Við höfum þá reynslu og höfum
haldið uppi þeim málflutningi í bæj-
arstjórn sem við leggjum til grund-
vallar breytingum í vor. Við þurfum
ekki systurflokkana á vinstri vængnum
til að sameinast um að fylla 16 ár í
meirihluta í Hafnarfirði.
Höfundur er
Kristinn Andersen,
verkfræðingur og bæjarfulltrúi
Sjálfstæðisflokksins í Hafnarfirði
Höfundur er
Helga Ingólfsdóttir,
bæjarfulltrúi Sjálfstæðisflokksins
Húsnæðismálin:
Raunhæfar lausnir
Ef vilji er til þess hér á landi að byggja upp leigumarkað til framtíðar, þar sem fólki stendur
til boða öruggt húsnæði á hagstæðum
kjörum, þá verða stjórnvöld að marka
sér skýra stefnu í þá átt, sveitarfélögin
ekki síður en ríkið.
Samfylkingin leggur áherslu á að
sveitarfélögin leggi sitt af mörkum til
þess að skapa raunhæfar lausnir á hús-
næðismarkaði. Með samstilltu átaki
er hægt að mæta stöðu leigjenda mun
betur en gert er í dag. Fyrsta skrefið á
þeirri leið er að sveitarfélögin setji sér
skýra og afdráttarlausa stefnu um upp-
byggingu, horfist í augu við stöðuna
eins og hún er og leiti sem breiðastrar
samstöðu um raunhæfar lausnir.
Við verðum líka af áhuga á það
sem aðrir hafa til málanna að leggja,
meðal annars Alþýðusambandið sem
hefur kynnt áhugaverðar tillögur um
samstarfsverkefni sem miðar að því
að byggja upp hagkvæmt leiguíbúða-
kerfi sem stendur öllum til boða, óháð
efnahag. Á þeim grunni geta skapast
tækifæri til að byggja upp fjölbreytt
húsnæðiskerfi fyrir alla.
Horfum á stóru myndina
Samfylkingin vill taka þátt í slíkum
verkefnum, beita skipulagsvaldi
sveitarfélagsins til að stuðla að því að
vítt og breytt um bæinn verði byggðar
íbúðir sem samræmast kröfum þeirra
sem vilja litlar- og meðalstórar íbúðir.
Við horfum á stóru myndina og teljum
að samhliða þurfi að að efla almenn-
ingssamgöngur til að stytta þann tíma
sem íbúar þurfa að verja í ferðir milli
lykilsvæða á höfuðborgarsvæðinu, og
vinna að þéttingu byggðar.
Lausnir í samræmi
við nútímann
Við viljum alvöru lausnir og alvöru
uppbyggingu leiguhúsnæðis í bænum
í takt við nútímann og hugmyndir og
þarfir íbúa Hafnarfjarðar í dag. Við
viljum mæta ólíkum þörfum með
fjölbreyttum lausnum og við viljum
vinna með íbúunum og fulltrúum allra
stjórnmálaflokka að því að skapa sam-
stöðu um leiðir að því markmiði.
Höfundur er
Gunnar Axel Axelsson,
oddviti Samfylkingarinnar í
Hafnarfirði
Skemmtilegri Hafnarfjörð
Ég gladdist innilega um daginn við þá frétt að menningar- og ferðamálanefnd Hafnarfjarðar
samþykkti að ganga til samninga við
Menningar- og listafélag Hafnarfjarðar
um rekstur á Bæjarbíói. Að sjá fleiri
viðburði og meira líf í bíóinu finnast
mér frábærar fréttir, því að meira líf í
bæinn er það sem Hafnarfjörð vantar.
Í fjárhagserfiðleikum fá menning
og listir fljótt að finna fyrir niður-
skurðarhnífnum og er það kannski vel
skiljanlegt en til lengdar er þess háttar
samfélag ansi snautt og lífsgæði íbúa
þess einnig verulega skert.
Víst er ýmislegt vel gert í bænum
sem snýr að því að reyna að lífga upp
á bæinn, 17. júní í fyrra var mjög
vel heppnaður, Austugötuhátíðin
sömuleiðis, Víkingahátíðin vex og
dafnar og Jólaþorpið setur svip á bæ-
inn en ég verð að viðurkenna að ég
vil meira. Það væri frábært að þurfa
ekki að sækja nánast alla skemmtun út
fyrir bæjarmörkin. Ég vil hlusta á fleiri
tónleika í Hafnarborg. Ég vil að bærinn
komi til móts við listamenn með því
að auðvelda þeim aðgengi að húsnæði
í eigu bæjarins þar sem halda mætti
viðburði. Ég vil hampa æsku bæjarins
og greiða aðgengi hennar að tónleika-
stöðum svo að ég verði búin að upplifa
hana sjálf áður en þau slá í gegn í Mús-
íktilraunum. Ég vil uppistand, tónleika
og fleiri bíósýningar í Bæjarbíó. Ég
vil hafnfirskar hönnunar- og listasýn-
ingar. Ég vil þaulhugsað skipulag sem
kemur að því að efla menningu og líf
í bænum.
Ég vil einfaldlega skemmtilegri
Hafnarfjörð.
Höfundur er
Helga Björg Arnardóttir,
situr í 5. sæti á lista Bjartrar
Framtíðar í Hafnarfirði.
SveitarStjórnarmál