Skessuhorn - 12.03.2014, Blaðsíða 14
14 MIÐVIKUDAGUR 12. MARS 2014
Ferðaþjónusta var stærsta útflutn-
ingsatvinnugrein Íslendinga á síð-
asta ári. Er það í fyrsta skipti í
seinni tíð sem sjávarútvegurinn
er ekki í fyrsta sætinu hvað þetta
snertir. Árið 2013 voru útflutn-
ingstekjur af ferðaþjónustu 26,8%
af heild en sjávarútvegurinn skil-
aði á sama tíma 26,5% og áliðn-
aðurinn tæplega 21%. Það mun-
ar því ekki miklu á verðmæti efstu
tveggja greinanna, en hlutfall
álútflutnings dróst í fyrra saman
um tæpt prósentustig sem hlutfall
af heildarútflutningi landsmanna.
Hlutfall ferðaþjónustunnar af út-
flutningstekjum jókst um rúmlega
þrjú prósentustig milli ára og hef-
ur á þremur árum aukist um 7,7
prósentustig.
Helga Árnadóttir er fram-
kvæmdastjóri Samtaka ferða-
þjónustunnar. Hún segir þetta
afar ánægjuleg tíðindi og í raun
séu þau í takt við það sem sam-
tök ferðaþjónustunnar gerðu ráð
fyrir. Það hefði orðið mikill vöxt-
ur í fjölda ferðamanna á síðasta ári
og ánægjulegt að hann virtist ætla
að halda áfram. Tölur fyrir janú-
ar- og febrúarmánað gefi sterka
vísbendingu um að árið 2014
verði enn stærra í greininni. Nú
er ekki lengur svartasta skamm-
degið hefðbundnir frímánuðir
hjá ferðaþjónustufyrirtækjum sem
vilja nýta sér þá miklu breytingu
sem er að verða. Helga Árnadóttir
segir stjórnvöld verða að veita at-
vinnugreininni aukna athygli. Það
vanti til dæmis rannsóknir í ferða-
þjónustu, svo sem um fjölda starf-
andi fólks í greininni en ekki síð-
ur þolmarkarannsóknir. Bendir
hún á að nú verði að byggja upp
innviðina og gera það hratt, enda
eigi landsmenn allir mikið undir
að það gangi vel. mm
Íslandsmót iðn- og verkgreina
var haldið um helgina í Kórnum í
Kópavogi. Var keppnin sú stærsta
til þessa en í henni taka framhalds-
skólar landsins þátt og kynna um
leið starfsemi sína fyrir grunnskóla-
nemendum sem brátt skipta um
skólastig. Landbúnaðarháskóli Ís-
lands kynnti m.a. garðyrkjunám og
búfræði á sýningunni en á Íslands-
móti iðn- og verkgreina er keppt í
ýmsum greinum, m.a. skrúðgarð-
yrkju, blómaskreytingum og fleiru.
Keppendur voru fimm að þessu
sinni í skrúðgarðyrkjunni og stóðu
þeir sig allir með prýði. Mjótt var
á munum milli keppenda því ein-
ungis munaði 1,1 í einkunn af 10 á
milli fyrsta og fimmta sætis. Það var
Arnór Guðmundsson frá Laufskál-
um í Borgarfirði sem hrósaði sigri
í keppninni og hlaut sæmdarheitið
Íslandsmeistari í skrúðgarðyrkju.
Árangur piltsins þarf ekki að
koma á óvart þar sem hann er fjórði
ættliður í móðurfjölskyldu sinni á
Laufskálum sem hefur garðyrkju
að atvinnu. Langafi hans var Aðal-
steinn Símonarson sem byggði ný-
býlið Laufskála árið 1945 og hóf þar
garðyrkju. Kári sonur hans tók við
búinu og rak það um tíma, eða þar
til Ása Erlingsdóttir, móðir Arnórs,
ásamt Sindra Arnfjörð garðyrkju-
meistara tók við. Samhliða þessu
rak Erlingur Aðalsteinsson afi Arn-
órs aðra garðyrkjustöð á Laufskál-
um II. Arnór segir sjálfur að hann
hafi fyrir tveimur árum verið plat-
aður í að ganga í „fjölskyldufagið“
og skráð sig til náms í garðyrkju-
skóla LbhÍ í Hveragerði. Hann mun
því útskrifast í vor. Þess má geta að
móðursystir Arnórs, Ágústa Er-
lingsdóttir, er brautarstjóri skrúð-
garðyrkjubrautar við LbhÍ og Kári
föðurbróðir Ágústu starfar einnig
við skólann. Ekki er því ofsagt hjá
Arnóri að skrúðgarðyrkja sé fjöl-
skyldufagið.
mm
Arion banki stóð fyrir opnum
fundi í útibúi sínu í Borgarnesi
síðastliðinn þriðjudag þar sem
hagspá greiningardeildar bank-
ans til næstu þriggja ára var kynnt.
Bjartsýnistón mátti greina í spánni
sem kynnt var af Regínu Bjarna-
dóttur forstöðumanni deildarinn-
ar undir yfirskriftinni „Við erum
hætt að spóla.“ Í máli Regínu kom
fram að árlegur hagvöxtur á Ís-
landi verður um 3% á næstu þrem-
ur árum, gangi spáin eftir. Hag-
vöxturinn verður drifinn að mestu
áfram af innlendri eftirspurn og
vexti í útflutningsatvinnuvegum,
einkum ferðaþjónustu. Atvinnu-
leysi mun minnka á sama tíma-
bili og spáir greiningardeildin að
það fari niður í 3,3% árið 2016, en
það var 4,4% í fyrra. Einkaneysla
mun fara upp á við þrátt fyrir að
það dragi allnokkuð úr svokölluð-
um sértækum útgreiðslum til al-
mennings sem markað hafa einka-
neyslu frá bankahruni. Þetta eru
útgreiðslur á borð við séreigna-
sparnað og skuldaleiðréttingar.
Búist er við að fjárfesting taki kipp
á tímabilinu, strax á næsta ári um
10% af vergri landsframleiðslu.
Fjárfesting verður myndarlegust
í atvinnuvegum og í íbúðarhús-
næði, að mestu leyti á höfuðborg-
arsvæðinu. Ekki er gert ráð fyrir
stórfjárfestingum í stóriðju á spá-
tímabilinu.
Þrátt fyrir að verðbólgan sé
um þessar mundir að stefna und-
ir verðbólgumarkið Seðlabank-
ans gerir greiningardeildin ráð
fyrir að hún verði yfir markmið-
unum á spátímabilinu. Verðbólg-
an verði um 3,1% á þessu ári sam-
kvæmt spánni en muni hækka
í 3,7% árið 2016. Regína tók
fram að einn helsti áhættuþáttur-
inn í verðbólgu spánni væri kjara-
samningar. Taldi hún einsýnt að
ef samningar færu úr böndunum
myndi þrýstingur á verðbólguna
aukast sem leitt gæti til um pró-
sents hærri verðbólgu á spátím-
anum. Hóflegar launhækkanir og
stöðugt gengi myndi af þessum
sökum styðja við lága verðbólgu.
Jákvæð teikn
á Vesturlandi
Á undan erindi Regínu hélt Bern-
hard Þór Bernhardsson svæðis-
stjóri Arion banka á Vesturlandi
stutta framsögu um efnahags-
ástandið í landshlutanum. Í máli
Bernhards kom fram að jákvæð
teikn væru á lofti á Vesturlandi.
Að hans mati væri fasteignamark-
aðurinn að ná jafnvægi á nýjan leik
og þá væri að merkja skort á leigu-
húsnæði víða, sem benti til þess að
atvinnulíf á svæðinu væri í vexti.
Á vegum bankans væri verið að
vinna að nokkrum fjármögnunar-
verkefnum, mest í ferðaþjónustu
og sjávarútvegi, en einnig í ný-
sköpun í landbúnaði sem og í fisk-
eldi. Taldi hann að nýfjárfesting-
ar- og endurfjármögnunarverk-
efni fyrir um 1,5 milljarð væru í
vinnslu í landshlutanum á vegum
bankans. hlh
Arnór við verðlaunaverkefnið á sýningunni.
Fjórði ættliður garðyrkjufólks
hampar Íslandsmeistaratitli
Arnór og Ágústa brautarstjóri á skrúðgarðyrkjubraut LbhÍ og móðursystir hins
nýkrýnda Íslandsmeistara.
Ferðaþjónustan fór yfir
sjávarútveg í verðmætum
Um 30 manns mættu á kynningarfundinn.
Spá vexti í hagkerfinu á næstu þremur árum
Bernhard Þór Bernhardsson svæðisstjóri Arion banka og Regína Bjarnadóttir for-
stöðumaður greiningardeildar bankans.