Skessuhorn - 21.05.2014, Blaðsíða 27

27MIÐVIKUDAGUR 21. MAÍ 2014
Að hjóla er frábær valkostur á all-
an mögulegan hátt. Þú færð úti-
veru, góða hreyfingu, kemst milli
staða hratt og örugglega og á um-
hverfisvænan hátt svo ég tali ekki
um alla aurana sem sparast við að
hreyfa ekki bílinn. Þegar við skilj-
um bílinn eftir í hlaðinu og hjól-
um af stað erum við líka góð fyrir-
mynd fyrir börnin okkar og kenn-
um þeim gildi góðrar hreyfingar og
umhverfisverndar.
Við sem búum á Akranesi vitum
flest að hér er jafn auðvelt að hjóla
og að drekka vatn. Hér finnast vart
brekkur og vegalengdirnar milli
bæjarhluta eru stuttar. Frá því að ég
flutti hingað fyrir nokkrum árum
síðan hefur mig dreymt um að sjá
Akranesbæ marka sér sérstöðu sem
hjólreiðabæ að fyrirmynd erlendra
borga eins og Kaupmannahafnar.
Eins og staðan er í dag er nánast
ómögulegt að hjóla neðri Skagann
og eiginlega hættulegt oft á tíðum.
Fólk flakkar upp og niður af gang-
stéttum á hjólum sínum til að finna
sér leið í gegnum bæinn yfir háa og
illa farna kanta. Bæði skapar þetta
hættu í umferðinni sem og dregur
það úr ánægjunni og lönguninni til
að ferðast þar um á hjóli. Með sam-
stilltu átaki og skipulagi væri hægt
að gera virkilega skemmtilegt um-
hverfi hér á Akranesi þar sem hjól-
reiðar yrðu jafngildur ferðamáti og
almenningssamgöngur eða einka-
bílar.
Þar sem við stöndum frammi fyr-
ir löngu tímabæru viðhaldi á götum
bæjarins þá tel ég nauðsynlegt og
skynsamlegt að horfa til framtíðar
og sjá þetta tækifæri sem við höf-
um. Mikið er af óþarfa bílastæðum
niður alla Skagabraut sem væri til
að mynda hægt að nýta fyrir hjól-
reiðastíg (þá gjarnan upphækkaðan
frá götunni) sem og væri gaman að
sjá nýtt gatnaskipulag fyrir Kirkju-
og Skólabraut í tengslum við nýja
torgið. Þar ætti að mínu mati að
vera einstefnuumferð og þá ætti að
vera hægt að hafa góða göngu- og
hjólastíga eins góðum miðbæ sæm-
ir.
Skipuleggjum til framtíðar og
framkvæmum svo.
Elísabet Ingadóttir.
Höf. skipar 3. sæti á lista VG og
óháðra á Akranesi
Málefni fatlaðs fólks hafa verið í
brennidepli undanfarið. Það er þó
ekki nýtilkomið, enda hafa samtök
þeirra verið eljusöm við að halda
á lofti réttmætum kröfum og við-
horfum þeirra sem við fötlun búa.
Á síðustu misserum hefur þó um-
ræðan tekið á sig nýja mynd, en það
markast fyrst og fremst af því að
sveitarfélögin hafa með samningi
við ríkið yfirtekið málaflokkinn og
hann því á borði sveitarstjórnar-
manna.
Sporin hræða
Þegar samningarnir um yfirtökuna
voru gerðir gagnrýndu margir það
að ekki fylgdu nægilegar fjárhæðir
frá ríki til sveitarfélaganna. Marg-
ir reyndir sveitarstjórnarmenn ótt-
uðust að fara myndi með svipuð-
um hætti og þegar grunnskólinn
var tekinn yfir fyrir margt löngu.
Reynslan af þeim samningum var
mörgum sveitarfélögum sár, þó
sum þeirra slyppu með skrekkinn.
Niðurstaðan er þó yfir heildina sú
að nú greiða sveitarfélögin hærri
upphæðir til skólamála en áður, en
ríkið setur fram kröfurnar.
Í ljósi þessarar reynslu var gengið
svo frá samningum að þeir skyldu
teknir til endurskoðunar á þessu ári.
Ekki hefur enn verið lokið neinu
samkomulagi varðandi framtíðina,
en reynslan sýnir að málaflokkur-
inn er miklu dýrari en ráð var fyrir
gert. Einkum er þetta augljóst þeg-
ar skoðaðar eru nýjustu hugmynd-
ir um notendastýrða persónulega
aðstoð, en það þjónustufyrirkomu-
lag mun kosta drjúgum meira en
fjárframlögin frá ríkinu gera ráð
fyrir. Þetta er þó krafa dagsins og
við henni verður að bregðast með
auknum fjármunum. Rannsóknir
erlendis gefa þó vísbendingar um
að NPA sé ekki dýrari en hefðbund-
in þjónusta þegar fram líða stundir
og ánægja og lífsgæði þjónustuþega
aukist til muna.
Ríkið verður að
standa sig
Hvernig til tekst með framhald-
ið er ekki gott að spá um, ríkissjóð-
ur er ekki útlátasamur á fjármuni
til þessa málaflokks. Sveitarfélögin
eru almennt ekki í færum til að taka
á sig hallann, þó Akraneskaupstað-
ur hafi gert það tvö undanfarin ár.
Skera hefði þurft niður í þjónust-
unni ef bæjarsjóður hefði haldið
sig innan fjárheimilda og er því lagt
meir til málefnisins en nokkru sinni
var gert á meðan ríkið sá um það
alfarið. Samt vantar enn upp á að
nóg sé gert.
Samfylkingin er jafnaðarflokkur
og leggur áherslu á að allir þegn-
ar þjóðfélagsins eigi sama rétt til
þjónustu, tækifæra og virðingar. Í
því ljósi mun Samfylkingin beita
sér í þessu máli og krefst þess að
ríkissjóður leggi til nægilegt fé til
þess að þessu mikilvæga málefni sé
sinnt af sóma og reisn. Minni kröfu
er ekki hægt að gera.
Gunnhildur Björnsdóttir
Höf. skipar 3. sæti á lista
Samfylkingarinnar á Akranesi.
Nú líður að sveita-
stjórnarkosningum í
Borgarbyggð og hef
ég ákveðið að taka
slaginn með öflugum hópi fram-
bjóðenda á lista Sjálfstæðisflokksins
í Borgarbyggð sem samanstendur
bæði af fólki með mikla reynslu og
fólki sem er að stíga sín fyrstu skref
á þessum vettvangi.
Ég er borin og barnfædd í Döl-
unum og bjó þar til 16 ára aldurs en
þá flutti ég til Akraness til frekara
náms. Ég hef búið í Borgarfirði síð-
an 2006 en maðurinn minn, Þor-
steinn Pálsson, er fæddur og upp-
alinn á Signýjarstöðum. Á fyrstu
sambúðarárunum bjuggum við á
höfuðborgarsvæðinu en brunuð-
um í Borgarfjörðinn í öllum frí-
um og oft um helgar. Var það mik-
ið hitamál hjá okkur hjónunum að
geta flutt hingað í sveitina og veitt
börnunum okkar þau forréttindi að
fá að alast upp í sveit. Ég er mennt-
aður grunnskólakennari, vann við
kennslu í Grunnskóla Borgarfjarð-
ar um nokkurra ára skeið en nem
nú viðskiptalögfræði við Háskólann
á Bifröst.
Metnaður, gæði og
skapandi starf
Borgarfjörður er eftirsóknarverð-
ur staður til að búa á. Hér eru góð-
ir leik- og grunnskólar, fyrirmynd-
ar menntaskóli, fjölbreytt tóm-
stundastarf, öflugur tónlistarskóli
og góðar samgöngur. Háskólarnir í
byggðarlaginu eru tveir þannig að
úrval til náms á háskólastigi er gott.
Frábært starf er unnið á leikskól-
um sveitarfélagsins og sést það til
dæmis vel á þeim viðurkenningum
sem þeir hafa fengið fyrir störf sín.
Nú síðast fengu bæði Ugluklettur
og Klettaborg úthlutað styrkjum
úr Lýðheilsusjóði til þess að þróa
verkefnið „Heilsueflandi leikskóli
- jákvæð sálfræði í leikskólastarfi”.
Aðstöðu verður að bæta, bæði fyrir
nemendur og starfsfólk á Hnoðra-
bóli í Reykholtsdal; meira rými
og hentugra húsnæði til enn frek-
ari eflingar þess góða starfs sem þar
er unnið. Mikilvægt er að styðja vel
við þessar stofnanir og veita þeim
kjöraðstæður til að ná enn frekari
árangri.
Við viljum að aðalsmerki grunn-
skóla sveitarfélagsins fyrir næsta
kjörtímabil verði áfram metnað-
ur, gæði og skapandi starfsum-
hverfi. Með þessu viljum við und-
irstrika þá sókn sem hefur verið í
skólastarfi grunnskólanna í Borgar-
byggð. Markið er sett enn hærra og
viljum við sjá grunnskólana okkar í
fremstu röð á næstu misserum.
Tölum saman –
vinnum saman
Byggðin í Borgarbyggð er mjög
dreifð en hér búa svipað margir í
þétt- og dreifbýli. Taka verður mið
af þörfum íbúa alls staðar í sveitar-
félaginu og tryggja jöfnuð að þjón-
ustu og að tækifærum á atvinnu-
markaði. Ferðaþjónustan er í mik-
illi uppsveiflu og hefur verið mjög
gaman að ferðast um sveitarfélagið
og fá innsýn í þau verkefni sem eru
í bígerð. Styðja þarf við þessa að-
ila og ýta undir frumkvæðni og ný-
sköpun til að búa til sóknarfæri á
sviði atvinnusköpunar. Ferðmanna-
iðnaðurinn kemur enn til með að
stækka og megum við Borgfirðing-
ar ekki verða öðrum sveitarfélögum
eftirbátur í þeim efnum. Hlúa þarf
vel að þeirri atvinnustarfsemi sem
fyrir er í sveitarfélaginu því grunn-
forsenda sterks samfélags er gott og
gjöfult atvinnulíf. Sterkt atvinnu-
líf er grunnforsenda þess að samfé-
lagið nái að vaxa og dafna.
Mikil uppsveifla er í samfélaginu
í heild og ef þeir kraftar eru nýtt-
ir með hagsmuni heildarinnar að
leiðarljósi eru allir vegir færir. Við
frambjóðendur D - listans óskum
eftir stuðningi kjósenda í Borgar-
byggð til þess að geta haldið áfram
að styðja við þau mörgu kröftugu
og blómlegu verkefni sem í gangi
eru. Við hvetjum íbúa til þess að
taka þátt í lýðræðisumræðu og
láta verkin tala. Tölum saman –
vinnum saman.
Lilja Björg Ágústsdóttir.
Höf. skipar 4. sætið á D- lista
Sjálfstæðisflokksins í Borgarbyggð.
Ég hef búið á Akra-
nesi frá árinu 1986,
eða frá 10 ára aldri. Ég flutti á Skag-
ann úr Breiðholtinu, en þar átti ég
heima í tvö ár. Akranes er fallegur bær
og skemmtilegt fyrir börn að alast upp.
Frelsið sem við höfum hér á Skaganum
flokkast undir forréttindi. Ég ólst upp á
neðri Skaganum. Í minningunni eydd-
um við krakkarnir stórum hluta sumars
niðri á bryggju og á Haraldarplani að
dorga og veiða. Það má kannski segja
að ég hafi að einhverju leyti alist upp
hér á bryggjunum. Hoppandi milli báta
á flotbryggjunni, í leit að bandspotta til
að búa til spröngu, sem hengd var upp á
lýsistankinn stóra eða við gömlu Nóta-
stöðina.
Þessi frásögn að ofan er brot af
bernskuminningum mínum og þær
segja jafnframt margt um forréttindi
okkar Skagamanna.
Á Akranesi er góð grunnþjónusta en
alltaf má gera betur. Grunnþarfirnar
skipta einnig máli og þær þurfa að vera
til staðar þegar ákvörðun er tekin um að
setjast niður á ákveðnum stað og stofna
fjölskyldu. Þessar grunnforsendur eru
m.a. örugg vinna sem tryggir örugga
innkomu. Jafnframt eru stöðug búseta,
aðgangur að íþróttum og menningu
mikilvægur þáttur. Auk þessa er mikil-
vægt að leikskólamálin séu í lagi.
Akranes er stærsta bæjarfélagið á
Vesturlandi og í mikilli nálægð við
Reykjavík. Það eitt og sér getur haft
mikil áhrif á atvinnuuppbygginu hér
á Skaganum. Við erum aðeins um 35
mínútur frá Reykjavík, en við þurfum
að koma okkur betur á kortið. Með því
að efla heilbrigðisþjónustu, bæta hús-
næðismál, efla menntun, tómstundir,
íþróttir og listir, þá leggjum við grunn
að betra atvinnuástandi. Allir þessir
þættir haldast í hendur. Það að bæta t.d.
íþróttaaðstöðu okkar Skagamanna með
byggingu nýrrar fimleikaaðstöðu skap-
ar atvinnu, annarsvegar í uppbyggingu
hússins, og einnig í umsjón og viðhaldi
á því til framtíðar. Svo má ekki gleyma
þeirri frábæru aðstöðu sem af þessu
skapast, sem rennir stoðum undir enn
meiri árangur hjá öllum þeim íþrótta-
félögum, er hafa aðstöðu í íþrótta-
mannvirkjum Akraneskaupsstaðar.
Það þarf að hugsa í lausnum þegar
kemur að atvinnumálum. Getur verið
að tækifærin séu til staðar? Þurfum við
eingöngu að opna augun og líta okk-
ur nær? Ég er sannfærður um að mik-
il lausn felist í litlu atriðunum og hag-
ræðingu. Getur Akranes orðið fyrsti
bærinn til að verða sjálfbær um að
rækta grænmeti og kartöflur, m.a. fyr-
ir skóla og stofnanir? Getum við hag-
rætt í leikvallamálum? Getur Akra-
neskaupsstaður stuðlað að því að leik-
tækin verði framleidd hér á Akranesi?
Getur Akraneskaupsstaður skoðað þá
möguleika að bæjarbúar sjái um hönn-
un og viðhald leikvalla í bænum? Þann-
ig væri hægt að halda vinnukostnaði í
lágmarki. Hægt væri að nýta peningana
betur í leiktæki og viðhald.
Ferðamönnum fer fjölgandi á Akra-
nesi. Víða má sjá trébekki og borð,
þar sem hægt er að setjast niður og
njóta útsýnis. Er hægt að fjölga þessum
bekkjum? Ég er sannfærður um að hér
á Akranesi séu metnaðarfullir einstak-
lingar sem gætu séð um hönnun og við-
hald þessara hluta, á mun lægra verði en
við höfum vanist.
Getur það verið forgangsatriði að
rykbinda, með bundnu slitlagi, í kring-
um vitann og niður að Hafnarbjargar-
húsinu? Koma þarf hita í vitann og setja
upp snyrtilega salernisaðstöðu á svæðið.
En Breiðin nýtist vel til útivistar, menn-
ingar og listar. Er hægt að leggja góðan
göngu- og hjólastíg hringinn í kringum
Akranes? Er hægt að koma upp sögu-
skiltum sem verða íbúum og ferða-
mönnum til fróðleiks og skemmtunar?
Hér að ofan hef ég talið upp litlu at-
riðin sem koma upp í huga mér. Þetta
er aðeins brot af þeim tækifærum sem
eru allt í kringum okkur. Við verðum
að nýta þessi tækifæri til að gera enn
betur og stuðla að enn betri uppbygg-
ingu og sjálfbærri þróun hér á Akranesi.
Þetta eru litlu atriðin og ég tel að þetta
sé bara brot af þeim tækifærum sem eru
allt í kringum okkur, tækifæri til þess að
gera enn betur og stuðla að enn betri
uppbyggingu og sjálfbærri þróun hér á
Akranesi. Með hagræðingu í litlu mál-
unum má mögulega losa um fé sem
nýta má markvisst í allri almennri upp-
byggingu hér á Akranesi.
Leitum inn á við! Nýtum kraftana
og hæfileikana sem búa í Skagamönn-
um. Ef við önnumst þessa hluti sjálf,
þá sköpum við einstaklingum eða fyr-
irtækjum verkefni. Jafnframt stuðlar þá
bæjarfélagið um leið að nýsköpun, sem
eflaust stækkar með tímanum og gef-
ur af sér atvinnu. Með því verður fjár-
magnið frekar eftir á Skaganum og nýt-
ist bæjarbúum betur.
Sementsreiturinn býður upp á tæki-
færi. Hægt væri að nýta reitinn und-
ir hótel. Jafnvel væri hægt að nýta hús-
næðið og byggja upp menningarmið-
stöð. Það væri eflaust mikið aðdráttarafl
í ferðamálum á svæðinu. Ég leyfi mér
að fullyrða, að ef vel tekst til með Sem-
entsreitinn þá gæti hann orðið hjarta
Akraneskaupsstaðar.
Allt sem ég hef nefnt í greininni, geta
orðið atriði sem stuðla að betra lífi.
Allt eru þetta atriði sem gætu stuðlað
að bættari og fjölbreyttari atvinnumál-
um fyrir okkur bæjarbúa. Síðast en ekki
síst: Akranes á að vera staður þar sem
við sköpum börnunum okkar fleiri frá-
bærar bernskuminningar.
Ole Jakob Volden.
Höf. er húsasmiður sem starfar á vökt-
um hjá Norðuráli á Grundatanga. Hann
skipar 8. sæti á lista Frjálsra með Fram-
sókn á Akranesi.
Pennagrein
Allir eiga sinn rétt
Pennagrein
Að hjóla eða ekki hjóla?
Pennagrein
Tölum saman – Vinnum saman
Pennagrein
Atvinnumál - Stuðlum að
góðum minningum