Skessuhorn - 25.06.2014, Blaðsíða 18

18 MIÐVIKUDAGUR 25. JÚNÍ 2014
Fyrsti fundur nýrrar
bæjarstjórnar í Snæfellsbæ
Fyrsti fundur nýkjörinna bæjarfull-
trúa í Snæfellsbæ var haldinn fimmtu-
daginn 19. júní síðastliðinn. Kristján
Þórðarson, sá bæjarfulltrúa sem átt
hefur lengsta setu í bæjarstjórn, setti
fundinn og bauð fundarmenn vel-
komna og þá sérstaklega nýkjörna
bæjarfulltrúa. Kristín Björg Árna-
dóttir var kosin forseti bæjarstjórnar
til eins árs með öllum greiddum at-
kvæðum og tók þá við stjórn fundar-
ins. Kosið var í helstu nefndir og ráð
á vegum bæjarfélagsins. Lagður var
fram ráðningarsamningur við Krist-
inn Jónasson um starf bæjarstjóra
Snæfellsbæjar næstu fjögur árin og
hann samþykktur. Endurnýjað var
einnig samhljóða prókúruumboð til
bæjarstjóra og bæjarritara til næstu
fjögurra ára. Þegar dagskrá fundar-
ins hafði verið tæmd var ákveðið að
næsti reglulegi fundur bæjarstjórnar
verði fimmtudaginn 4. september.
þa
Siglt framhjá hlaðinu í Gröf
Hvalfjörðurinn er víða aðdjúpur
og siglingaleið skipa liggur gjarnan
skammt frá bæjunum norðan fjarðar.
Umferð skipa inn til Grundartanga-
hafnar er orðin talsverð, eða um eitt
skip á dag að meðaltali, og yfir sum-
arið eru það svo hvalskipin sem eiga
einnig þarna leið um. Því má segja
að umferð við bæi sé talsvert mikil í
Hvalfjarðarsveitinni, stundum meiri
skipa en bíla. Myndin var tekin sl.
miðvikudag þegar Goðafoss Eim-
skipafélagsins var á leið inn fjörðinn
við bæinn Gröf. þá
Veiddu fyrsta makrílinn
Feðgarnir Páll Guðmundsson og
Hermundur Pálsson í Stykkishólmi
fengu 50 stykki af makríl í grá-
sleppunetin síðastliðinn föstudag.
Netin voru við Elliðaey rétt norð-
ur af Stykkishólmi. Var þetta stór
og vænn makríll. Þeir feðgar eiga
og róa á Hönnu Ellerts SH 4. Grá-
sleppuveiðinni hjá flestum var jafn-
framt að ljúka í vikulokin hjá þeim
sem fiska við innanverðan Breiða-
fjörð. mm/ Ljósm. Símon Sturluson.
Ferðamenn vilja gjarnan geta
heimsótt sveitabæi
Á Brennistöðum í Flókadal í Borg-
arfirði hefur verið rekin ferðaþjón-
usta síðan árið 1971. Þar eru nú þrjú
sumarhús auk þess þrjú stök her-
bergi og ein stúdíóíbúð ásamt heit-
um potti sem virðist vera ómissandi
í ferðaþjónustu. Þóra Árnadóttir og
Hafsteinn Þórisson búa á Brenni-
stöðum og í eldra húsnæði býr móð-
ir Þóru, Vigdís Sigvaldadóttir. Upp-
haf ferðaþjónustu á staðnum er
nokkuð sérstakt og ekki margir sem
voru í þessum geira til sveita fyrir
ríflega fjörutíu árum.
Flugfélag Íslands
auglýsti
Þóra er fædd og uppalin á Brenni-
stöðum. Hún er líffræðingur að
mennt og kennir raungreinar við
Menntaskóla Borgarfjarðar í Borg-
arnesi. Áður en ákvörðun um að búa
í sveitinni var tekin, kenndi hún við
Menntaskólann í Reykjavík í tíu ár.
Það var hins vegar árið 1971 sem
foreldrar hennar, Árni Theódórs-
son og Vigdís Sigvaldadóttir ákveða
að fara út í ferðaþjónustu. „Ég var
einmitt að taka þetta saman um dag-
inn,“segir Þóra þegar spurt er um
upphaf ferðaþjónustunnar. „Flug-
félag Íslands auglýsti eftir samstarfs-
aðilum og síðan tóku Flugleiðir fljót-
lega við og foreldrar mínir ákváðu að
slá til og þannig hófst þetta allt hér.
Byggðir voru þrír sumarbústaðir og
herbergi voru til leigu í húsinu hjá
pabba og mömmu og síðan bættum
við stúdíóíbúð í flóruna hérna í hús-
inu hjá okkur. Þetta hefur gengið
upp og ofan. Það er reyndar töluvert
um gestakomur en nýtingin mætti
að sönnu vera meiri og lausatraffík-
in hefur minnkað með tilkomu fleiri
gististaða.“
Þúsundþjalasmiður
Eiginmaður Þóru er Hafsteinn Þór-
isson, fæddur og uppalinn í Borgar-
nesi. „Ég er sá eini af mínum systkin-
um sem aldrei fór í sveit sem krakki
en er í dag sá eini sem bý í sveit,“
segir Hafsteinn brosandi þegar spurt
er um uppruna hans. „Meðfram bú-
störfunum kenni ég við Tónlistar-
skóla Borgarfjarðar á veturna á gít-
ar, bassa og ukulele, það er nýjasta
æðið í dag. Mínir kennslustaðir eru
á Kleppjárnsreykjum, Hvanneyri og
svo einn dagur í viku í Borgarnesi.
Þetta er svona um 80% staða, þrír
dagar í viku.“
Þá daga sem Hafsteinn er ekki að
kenna hefur hann í nógu öðru að
snúast. Ásamt því að þau Þóra búa
með kindur, geitur og hross þá ger-
ir hann ýmislegt í höndunum. „Ég
hnýtti gríðarlega mikið af veiðiflug-
um og geri svolítið enn og þá mest
fyrir sjálfan mig, en einnig er vin-
sælt að gefa flugubox í tækifærisgjaf-
ir. Í 13 ár hnýtti ég um og yfir 4.500
flugur á vetri fyrir Vesturröst. Svo
fór ég að stoppa upp fugla að gamni
mínu. Sá markaður minnkaði með
hruninu en er ögn að glæðast aftur.
Svo er það tónlistin. Ég hef svolít-
ið dundað mér við að semja lög, er
með lítið stúdíó hér í húsinu þar sem
ég get grunnunnið allt efni. Nú þeg-
ar er ég búinn að taka upp þrjú lög
fyrir næsta disk, sem kemur út ein-
hvern tímann,“ segir Hafsteinn og
brosir út í annað.
Geitur fyrir ferðamenn
Á Brennistöðum var áður fyrr búið
með kýr, hross og kindur. Kýrnar
voru seldar en geitur eru komnar í
staðinn. Þóra og Hafsteinn segja að
upphaf geitabúskapar megi einfald-
lega rekja til ferðamannanna sem
hafa gaman af því að skoða dýrin en
svo hafi þau tekið að sér fleiri dýr.
„Við komumst einnig að því hvað
kjötið af geitunum er svakalega
hollt og gott,“ segir Þóra og held-
ur áfram. „Geitakjöt hefur ekki mik-
ið verið markaðssett hérlendis en
það hefur m.a. gríðarlega góð áhrif
á psoriasis. Hafsteinn heldur því al-
veg niðri með því að borða geita-
kjöt reglulega.“ Hafsteinn samsinn-
ir því og bætir við að þau hafi kynnt
kjötið fyrir Félagi matreiðslumeist-
ara á Bifröst í vor og þar sé mikill
spenningur fyrir vörunni. „Kannski
að landsmenn fari að sjá meira af
geitakjöti í réttum og verslunum
fljótlega. Það væri alla vega ósk-
andi.“ Aðspurð hvort þau séu ekki
í vandræðum með að halda geitun-
um á sínum stað, segja þau svo ekki
vera. Þau hafi einfaldlega passað sig
á því að grisja úr leiðindaskepnur og
halda girðingum í lagi.
Friðsæld og persónuleg
þjónusta
Hjónin á Brennistöðum segja
ferðamenn sækja í friðsældina
og skepnurnar. „Við höfum orð-
ið þess áskynja að ferðamaður-
inn saknar þess að komast ekki á
sveitabæi,“ segir Þóra. „Hér er það
okkar styrkleiki ásamt því að geta
boðið upp á persónulegt spjall og
þjónustu. Fólki líkar það afar vel
enda erum við í Ferðaþjónustu
bænda og leggjum áherslu á það.
Því er hins vegar ekki að neita að
fólk kvartar yfir því hversu lélegt
netsamband er hér og síminn er
einnig vandamál. Þetta gæti orð-
ið fótakefli því þótt fólk vilji frið-
sældina vill það einnig komast á
netið og geta fylgst með. Við erum
jú á 21. öldinni.“
Dundað við ýmislegt
Eins og fram hefur komið eru
hjónin bæði í kennslu á veturna,
Þóra í fullri kennslu við MB en
Hafsteinn í 80% starfi við tón-
listarskólann. En kennslan er ekki
eina viðfangsefnið. Á Brennistöð-
um er einnig reykkofi sem vel er
nýttur. Þau reykja í raun hvað sem
er og grípa í þegar færi gefst, hvort
sem er sumar eða vetur. Hafsteinn
hefur einnig verið að taka nám-
skeið í þjálfun íþrótta og hefur að-
eins gripið í það, enda með tvo
drengi, ellefu og fjórtán ára, sem
hafa áhuga á íþróttum. Þóra hef-
ur gríðarlegan áhuga á náttúrunni
enda líffræðingur að mennt. „Ég
hef gaman af því að skoða lífrík-
ið á víðum grundvelli, kannski
ekki síst fugla og nýt þess að vera í
samneyti við lífið. Það er hins veg-
ar ljóst að ef ég væri ekki héðan,
hefði ég ekki sest hér að. Ég var
mjög sátt við það sem ég var að
gera í Reykjavík og undi mér þar
vel. En römm er sú taug og sveitin
býður upp á mjög margt sem ekki
er hægt að fá í kaupstað. En raf-
magn, sími og net er nokkuð sem
verður að fara að bæta á lands-
byggðinni. Kostnaður við raf-
magn á köldum svæðum er gríð-
arlegur og net- og símasamband
er víða bágborið. Við búum við
skarðan hlut sem brýnt er að verði
leiðréttur,“ segir Þóra Árnadóttir.
bgk
Þóra Árnadóttir og Hafsteinn Þórisson á Brennistöðum.
Séð heim að Brennistöðum í Flókadal.
Árni Hrafn Hafsteinsson í leik með
kiðlingum.
Þórir Hafsteinsson að fóðra heim­
alningana, lamb og kiðling.