Skessuhorn - 25.06.2014, Blaðsíða 29

29MIÐVIKUDAGUR 25. JÚNÍ 2014
Hvalvertíðin hófst á þjóðhátíðardaginn
Um nónbil á 17. júní kom Hvalur
9 með fyrstu langreyðina á þessari
vertíð í Hvalstöðina í Hvalfirði. Um
svipað leyti veiddi Hvalur 8 einnig
sinn fyrsta hval vestur af landinu.
Fyrsti hvalurinn á land var 62 feta
kýr. Hvalurinn var strax dreginn
upp á plan og fljótlega hófst hval-
skurðurinn; flensunin. Greinilegt
var að vanir menn hafa fengist til
starfa á þessari vertíð því einungis
leið innan við klukkustund frá því
hvalurinn kom á planið og búið var
að ná öllu kjöti í hús. Á fyrstu vik-
unni hefur á annan tug hvala veiðst
og vinnslan gengið prýðilega.
Nú tekur við stíf vertíð hjá starfs-
mönnum Hvals hf. þar sem unnið
verður á átta tíma vöktum, og átta
tíma hvíld, þar til vertíðinni lýk-
ur, líklega í september. Heimilt er
að veiða 154 dýr á þessari vertíð.
Veður og skyggni ræður mestu um
hversu hratt gengur að veiða upp í
kvótann. Mikil endurnýjun búnað-
ar og mannvirkja hefur átt sér stað
í Hvalstöðinni á síðustu árum og
stöðin orðin hin snyrtilegasta á að
líta. Mjög hefur verið aukið á ýms-
ar öryggis- og hreinlætiskröfur á
vinnustaðnum og er t.a.m. engum
óviðkomandi hleypt inn á vinnu-
svæðið sem tryggilega er girt af fyr-
ir umferð fólks. Hægt er að fylgjast
með hvalskurðinum úr brekkunni
ofan við stöðina. Þar voru nokkr-
ir hvalfriðunarsinnar með spjöld í
upphafi hvalskurðarins sl. þriðju-
dag, en stoppuðu stutt við í rign-
ingunni og héldu á brott.
Einungis beinagrind og innyfli
liggja eftir þegar búið er að ná öllu
kjöti í hús. Spik er brætt í lýsi sem
meðal annars er blandað við olíuna
á hvalveiðibátunum. Bein og inn-
yfli fara í mjölvinnslu. Hið verð-
mikla kjöt af hvalnum fer strax til
vinnslu, sumt er fryst í hvalstöðinni
en ekið með annað á Akranes þar
sem það er unnið í Heimaskaga-
húsinu til frystingar. Meðfylgjandi
myndir voru teknar þegar verið var
að flensa fyrsta hvalinn á 2014 ver-
tíðinni.
mm
Allir vilja komast á netið
Ferðaþjónustan í Geirshlíð hefur
fallið ferðalöngum vel í geð. Inni á
booking.com eru dómar um gisti-
staði sem nota það kerfi. Umsagnir
75 gesta gefa gistiheimilinu fram-
úrskarandi einkunn eða 9,2. Hulda
Hrönn Sigurðardóttir bóndi og
gestgjafi segir að þrátt fyrir að þau
bjóði upp á eins mikla netþjónustu
og hægt sé, kvarti flestir yfir því að
á svæðinu sé lélegt netsamband.
Tekið var hús á Huldu á dögunum.
Byrjaði vegna
verkefnaskorts
Í Geirshlíð er gistiheimilið rekið í
eldra íbúðarhúsinu á staðnum, en
alls geta 11-12 gestir dvalið þar í
einu. Húsið er á tveimur hæðum,
fjögur herbergi uppi og eitt niðri,
en auk þess eru þrjú baðherbergi í
húsinu. Um áramótin 2010-11 var
byrjað að breyta fyrir gistirekstur-
inn og opnað 11. júní 2012. Hulda
segir ástæðuna fyrir því að ákveðið
var að opna gistiþjónustu vera ein-
falda. Hún er kennari að mennt en
hætti að kenna og vantaði eitthvað
að gera. Öll herbergin í húsinu
hafa heiti. Þau eru tilkomin vegna
þeirrar notkunar sem þau höfðu á
meðan búið var í húsinu. „Stærsta
herbergið er Stofan sem var spari-
stofan hér áður fyrr. Svo er annað
herbergi sem heitir Vinnumanna-
herbergið, einfaldlega vegna þess
að þar sváfu vinnumennirnir alltaf
í gamla daga,“ segir Hulda um leið
og hún sýnir blaðamann hvert her-
bergið á fætur öðru.
Sígandi lukka
Sígandi lukka hefur verið í starf-
seminni en þetta sumar er þó öðru-
vísi en það síðasta. Minna er bók-
að fyrirfram en meira er af svokall-
aðir lausatraffík. Ástæðurnar seg-
ir Hulda vera þær að nú séu fleiri
gististaðir í boði á svæðinu. „Það
breytti hins vegar öllu fyrir okkur
að fara inn á booking.com en fólk
virðist nota þessa síðu mjög mik-
ið og einnig að þar fær maður um-
mæli um hvernig ferðamanninum
hefur líkað. Það er ómetanlegt.
Um 70% af okkar gistingu kem-
ur þarna í gegn.“ Það eru þó að-
ilar sem ekkert greiða fyrir næt-
urgistingu en það eru björgunar-
sveitirnar, en þegar þær eru með
æfingu á svæðinu bíður þeirra frí
gisting í Geirshlíð. „Þeir eru okk-
ar auglýsing,“ segir Hulda bros-
andi. Þeir gestir sem velja Geirs-
hlíð sem gististað koma af ýmsum
ástæðum en ekki síst af því að þar
er rekið bú. „Fólki finnst gaman að
sjá bændur að störfum. Fá að skoða
dýrin og jafnvel taka þátt í bústörf-
um. Það er virkilega ánægjulegt.“
Engin matsala á
svæðinu á veturna
Hulda segir að umferð ferðamanna
yfir veturinn sé vaxandi. Margir
komi vegna Norðurljósanna þótt
það sé auðvitað nokkuð einstak-
lingsbundið. Hins vegar sé það
vandamál að engin matsala sé opin
á svæðinu yfir vetrarmánuðina.
„Þegar Íslendingar ferðast þá taka
þeir yfirleitt með sér nesti og koma
við í búð til að kaupa sér hráefni
til eldamennsku. Þótt hér sé eldhús
sem fólk getur eldað í þá virðast er-
lendir gestir oft ekki gera ráð fyrir
því að elda sjálfir. Því hefur skort-
ur á matsölustöðum hér yfir vetur-
inn verið vandamál. Mér finnst al-
veg ómögulegt að fólk fari svangt í
rúmið og því höfum við stundum
boðið fólki að borða. Morgunverð-
ur er innifalinn í gistingunni, en
það er náttúrulega ekki nóg fyrir
allan daginn.“ Aðspurð hvort fólk
misnoti aðstöðu sína og taki sér
nesti til dagsins, segir hún afar lít-
ið vera um það hún muni eftir einu
tilviki þar sem það hefur gerst.
Góð samvinna í héraði
Fleiri bændur en búendur í Geirs-
hlíð bjóða gistingu í héraðinu. Að-
spurð segir Hulda að góð sam-
vinna sé á milli aðila í nágrenn-
inu. „Ef einhver hringir til mín og
allt er fullt, bendi ég gjarnan á aðra
bæi. Mér finnst það sjálfsagt og það
sama gildir á öðrum stöðum. Ég
hef sem dæmi fengið fólk hingað
sem t.d. ætlaði að gista á Steindórs-
stöðum. Mér finnst skemmtilegt
að standa í þessu. Það hafa skapast
tengsl og myndast vinátta við gesti
sem heldur. Það er ánægjulegt. Það
eina sem fer að verða vandamál
hér er lélegt netsamband. Þótt við
séum með „router“ í húsinu þá vill
fólk hafa samband á öllum stöðum.
Þetta er í raun helsta umkvörtun-
arefnið og afar brýnt að laga. Við
verðum skör lægra en samkeppn-
isaðilarnir verði þetta ekki lagað.
Það er ekkert flókið.“
bgk
Við húsið er sólpallur, heitur pottur og leiktæki fyrir börn, aðstaða sem margir gestir nýta sér. Hulda Hrönn Sigurðardóttir
býður fólk velkomið í Geirshlíð.
Stofan er stærsta herbergið í Geirshlíð. Hún gegndi hlutverki stofu hér áður fyrr. Gestir bændagistingarinnar í Geirshlíð eru ánægðir með aðbúnað og aðkomu.